ANTXETA kanpaina Ziburun Euskal Kolegio bat finkatzeko helburuarekin sortu dugu, gure haurren geroa euskal giro batean eraikitzeko. Bihar ere euskaraz mintzatzeko, irakurtzeko, entzuteko eta pentsatzeko eskubideak bizirik iraun dezan.

Kanboko Xalbador kolegioa, ikasleen emendatzearen aurrean ttipiegi agertu bezain laster, bigarren kolegio bat idekitzea erabaki zen. Horrelaxe 98.ko Irailetik goiti Ziburuko Marinel Eskola zaharrean kokatzen da Seaskaren bigarren Kolegioa.

Nahiz eta momentukotz ukanarekin kontent izan, gure geroa ez da batere finkatua. Erran bezala, bi urteko "alokamendu izenpetze" horrek ez digu deus segurtatzen.

Kolegio finkatzea azkartzeko jendearen sustengua eskatzen dugu, eta bide honi segituz ANTXETA kanpaina bultzatu dugu, helburutzat milioi bateko diru-laguntza ukaiteko xedearekin.

Antxeta, itsas bazterreko xori miresgarria, Ziburutik Euskal herrian zehar bultzatuko dugu, hegalkada bakoitzeko jendearen laguntza eskatuko dugularik. Jakinik gure beharrak betetzeko 200 liberako 5000 hegalkada behar ditugula.

Sustengua ekarri nahi diguten jende guziei, oroitzapen gisako zerbait eskainiko diegu.

Eta ez ahantz, Antxetak herriz herri, eskualdez eskualde, probintziz probintzi, Euskal Herriko xoko guztietatik denen laguntza beharko du, euskararen eraskaskuntzaren etorkizuna kostaldean behin betikotz finkatua izan dadin.

---

Ziburuko Seaskako
Bigarren Kolegioa

---

Seaskaren Ziburuko Euskal Kolegioa, 98-99 ikasturteko irailetik idekia da.

Gaur egun 5. eta 6.eko diren 75 ikasleak lau gelatan banatuak dira, eta 18 erakaslek usaiazko gaiak erakasten dizkiete.

Kolegioak Lehen Mailatik etorritako ikasleen eraspena bere gain hartzen du, Seaskaren pedagogia oinarriak segituz; erran nahi baitu: norberaren nortasuna azkartu, taldean elkar bizitzen erakatsiz. Era berean partaide ainitzek kudeatzen duen kolegioa da, bertan irakasleek, burasoek, laguntzaileek eta haurrek berek ere, parte hartzen baitute.

Kostaldean Kolegio hau da egun euskarazko irakaskuntza normalizatua eman dezakeen irakaskuntza egitura bakarra, eta geroari begira euskalduntzearen alde lan egiten duen estruktura bakarra. Kanboko Xalbador kolegioa ttipiegi zelako idekia izan da Ziburuko Kolegioa eta gaur eskualde zabal bateko ikasleak hartzen ditu bere gain : Ziburu, Donibane Lohizune, Getari, Bidarte, Ahetze, Urruna, Hendaia, Azkaine, Biriatu, Sara, Senpere eta Ainhoakoak hain zuzen ere.

Honela gaur egun 75 ikasle baldin badira ere, Ziburuko ikasleen kopuruaren emendatze estimazioa frogatzat jotzen dugu:

Ohar gaitezken bezala, hiru urtetan kolegioak 110 ikasle gehiago ukanen ditu; eta honek kostaldeko Kolegioaren finkatzearen beharra erakusten digu nabarmenki.