kronologia

1987

• Apirilean, Gernikako txikizioaren 50. urteurrenaren inguruko ekitaldiek jantzi zuten Aberri Eguna, bereziki "Gernika 37-87" plataformaren eskutik heldutako lau egunetako egitarauak: 24 orduko musika-jaialdia, antzezpenak eta hitzaldi politikoak... Egun sonatua izan zen oso, herri bizkaitarra memoria historikoaren, erresistentziaren eta kulturaren hiria bilakatzeko asmo hura. Ertzaintzaren karga bortitzak zauritu ugari utzi zituen.
• La Gaceta del Norte egunkariak bere azken zenbakia plazaratu zuen irailaren 29an.
• Argia-k salaketa kanpaina egin zuen, aldizkariaren 50. urteurrenean. Subentzioak ia erdira jaitsi zizkioten.
• Ikas-Bi Batasuna sortu zen, Iparraldeko Eskola Publikoaren elebitasunaren bultzatzaile gisa. Ezinegona sortu zuen Seaskakoen artean, askok konpetentzia egiteko eta euskararen eskakizunak epeltzeko sortu zenaren susmoa baitzuten.
• Ikastolen Federazioak "Eskola Publikoaren baitako autonomia eta kontrola Europan" sinposiuma antolatu zuten Donostian.
• Hezkuntza eta Kultur Ministerioak Iruñeko Udal ikastola osatzen zuten hiru zentroak legeztatu zituen.
• Nafarroako Unibertsitate Publikoa sortzeko legea onartu zuten apirilean.
• EHUko ikasleek protesta eta manifestazio ugari antolatu zituzten martxoan eta apirilean, Maravall Espainiako Hezkuntza ministroak bultzatutako LRU edo ikasketa-plan berriaren aurka.
• AEK-k mobilizazioak egin zituen Nafarroan, gobernuak jarritako baldintza estuen aurka protesta egiteko. Besteak beste, subentzioa izatekotan taldeetako ikasle-kopuruak 12koa izan behar zuen eta ez zortzikoa, AEK-k proposatzen zuen gisan. 1987an Nafarroan ez zegoen kopuru horretara heltzen zen talderik, Iruñerrian salbu. Beraz, Nafarroako Gobernuaren baldintzak indarrean jarrita Nafarroan gehiengoa diru-laguntzarik gabe utziko zuten.
• Eusko Jaurlaritzako Hezkuntzako kontseilari zen Rekaldek, Euskal Eskola Publiko bakarraren alde apustu egin zuen. Ikastolak barnean integratzea proposatu zuen.
• Manifestazio baimendua Baionan, "Ikastola ez ito!" lemapean. Gutxienik bretoien pareko tratua eskatu zuten.
• Baionako Euskal Museoko ateak itxi zituzten, bertako alkate zen Grenet-en hitzetan, egoitza zaintzeko «jende kualifikaturik ez zegoelako eta bere mantenua oso karioa zelako».

• Arrasateko AED elkarteak Euskalan, euskara lantegietara eramatea helburu duen taldea sortu zuen.
• Ondarroako euskararen udal batzordeak erdara hutsezko agiri ofizialik ez onartzea erabaki zuen.
• EKBk Hizkuntza Minorizatuen Nazioarteko Topaketak antolatu zituen.
• EHEk Donostiako, Bilboko eta Gasteizko udaletxeak okupatu zituen, udalei euskararen aldeko neurriak eskatzeko kanpainaren hasiera gisa.
• Euskaltzale talde batek, Jean Haritxelhar buru zuelarik, euskal diploma eskatu zion Frantziako Hezkuntza Ministerioari.
• Victor Manuel Arbeloa PSOEko eurodiputatuak euskara babes zezan eskatu zion Europako Parlamentuari.
• UZEIk Euskalterm izeneko euskal terminologi bankua sortu zuen.
• "Aurten Bai" izeneko Bizkaiko Alfabetatze kanpaina egin zen.
• Vasco Press albiste-agentzia euskarazko zerbitzuak eskaintzen hasi zen.

• Miramongo zentroa zabaldu zuen ETBk.
• Eskualduna aldizkariaren mendeurrena ospatu zen Baionan.
• "Euskal Hitz" euskararen historiari buruzko erakusketa ibiltaria antolatu zuen Eusko Jaurlaritzak.
• Geroa antzerki-taldeak Mario Onaindiaren "Grand Placen aurkituko gara" nobela moldatua taularatu zuen, Oztibarreko taldeak Imanol Eliasen "Haunditasun ametsak", Antxietak "Hiru morroiak", Zintzilik taldeak "Pippin" komedia musikala eta Hiruak Bat taldeak Hirigoienen "Hamar manu minduak".

• Argia dantza-taldeak errepertorio zabala eskaini zuen otsailaren 26an. Ikuskizunik handiena, ordea, beraiek berreskuratutako antzinako "Irradaka" dantza izan zen. Irradakak, berez, kantu luzeak omen ziren, kutsu erlijioso eta moralista barnean zeramatenak. Urbeltzek Nafarroako zenbait txokotan bizirik geratutako xehetasunen bitartez berreraiki zuen dantza hau.
• Joan Mari Lekuonak eta Patxi Zabaletak aulki bana hartu zuten Euskaltzaindian.
• Bertsozaleek Jon Azpillaga omendu zuten. Teodoro Herrandonea bertsolari zizurkildarrak ere gorazarrea jaso zuen Saran. Lapurdiko pertsulariek, bestalde, lehen txapelketa antolatu zuten. Jesus Arzallusek irabazi zuen.

• Trikitilarien Egunean Txikito Mendaro-Aizta, Arno-Martxel eta Ospaz-Sabin soinu eta panderojoleak omendu zituzten Eibarren.
• Euskal Kantu Txapelketa Euskal Herri osora hedatu zen. Sarituen artean: Irigoien anaiak, Solange Añorga, Patxi Sainz eta Izarra taldea. Eiheralarren finala jokatu zeneko hartan, ekainaren 20an, Musikaren Eguna ospatu zen mundu osoan.

• Argitaratutako diskoen artean: Eltzegor taldearen "Sasitik sarira", Amaia Zubiria eta Pascal Gaigneren "Kolorez eta ametsez", Zaramaren "Dena ongi dabil", Pier Paul Berzaitzen "Han eta hor", Tapia eta Leturiaren "Jo eta hautsi", Jotakie-ren "Piztu nazazu jauna", Kaki Arkarazoren "Matxinadak", Hertzainak taldearen hirugarren diskoa, Azalaren "Zaldiko Maldiko", Kepa, Zabaleta eta Mutrikuren "Infernuko hauspoa", Manex Pagolak moldaturiko "Biziaren altzotik" bilduma, Guk taldearen "Gerlarik ez"...
• Eresoinka, Britainia Handiko Xare Band eta Kaliforniako Tasende-ren arteko koprodukzioz, "Gernika, arbolaren espiritua" filma errodatu zuten.
• Anjel Lertxundiren "Kareletik" eta J.A. Zorrillak zuzendu eta A. Amigok produzitutako "Lauaxeta" filmak estreinatu ziren Donostian.

• Pello Varelaren "Azpiko gizona" laburmetraia aurkeztu zen Gasteizen.
• Arteleku Euskadiko lehen arte-lantegia inauguratu zen Martutenen.
• Eusko Jaurlaritzaren eta Editoreen Elkartearen laguntzaz euskal idazle klasikoei dedikatutako sail berria sortu zuten.
• Euskal Idazleen Elkarteak "Gaurko euskal narratibaren antologia" argitaratu zuen.
• Ereinek "Aitzolen Antologia" obra plazaratu zuen. Joxe Austin Arrietak "Manu Militari" argitaratu zuen, Patziku Perurenak "Emily", Robert Laxaltek "Kafea hartzea Iruñean", Laura Mintegik "Bai baina ez", Pako Aristik "Irene. Tempo di Adaggio", Juan Mari Irigoienek " Udazkenaren balkoitik", Pablo Sastrek "Joxemi", Arantxa Urretabizkaiak "Saturno", Astrain-Harrietek "simon Besaluze, Oilar jokoa", Juan Garziak "Akaso", Koldo Izagirrek "Mendekuak", Felipe Juaristik "Hiriaren melankolia"...
• Astrain eta Harriet-ek "Simon Besaluze, Oilar jokoa" komiki-liburua plazaratu zuten.
• Manuel Lekuona, Jose Estornes Lasa eta Koldo Mitxelena hizkuntzalaria hil ziren.

1987, Donostia - Mitxelenaren heriotzean | 1987, Donostia, Bilbo - Euskara, idazle txarren menpe

Gernika 37-87 | Euskara egunkarietan

1987ko iragarkiak