kronologia

1981

• Joseba Arregi hil zuten komisaldegian torturatuta.
• ETAk Jose Maria Ryan Lemoizko zentral nuklearreko injineru nagusia bahitu eta hil zuen.
• Segura Irratiari su eman zioten.
• Estatu-kolpea Espainian otsailaren 23an. Guardia zibilek Kongresua okupatu zuten, eta armadako tankeak kaleratu zituzten Valentzian.

• Nafarroako Foru Aldundiak Eusko Ikaskuntza utzi zuen. Erakundea «politizatuta» zegoela aipatu zuten arrazoien artean.
• EHEkoak Radio Nacional de España irratiko egoitzan sartu eta euskarak jasaten zuen bazterketa salatu zuten. Poliziak Txillardegi eta Luis Mari Mujika EHEko kideak atxilotu eta komisaldegian gaua pasatu ostean, epailearengana eraman zituzten. Epaileak ez zekien euskaraz eta atxilotuek euskaraz bakarrik egin nahi (Labaien kontseilari zenak itzultzaile lanetan jardun behar izan zuen). Bestalde, Migel Castells beren abokatuarekin ere nekez komunikatu ziren atxilotuak, hau ere erdalduna izaki.
• Komertzioak iragarki publizitarioak gaztelaniaz ez ezik euskaraz ere jartzera behartu zituen Andoaingo udalak.
• "Nafarroa Oinez" ikastolen festaren lehen edizioa, Altsasun.
• Francisco Ondarrak Polikarpo Iraizozen lekua hartu zuen Euskaltzaindian.
• Ibon Sarasolak doktore tesia irakurri zuen Bartzelonako Unibertsitatean. Lanak "Materiales para un thesaurus de la lengua vasca" zuen izenburutzat.
• Loidisaletxe eta Paulo Txikia bertsolariak omendu zituzten.
• Eusko Jaurlaritzaren ekimenez, HABE erakundea sortu zen.
• Ipar Euskal Herriko hainbat elkartek Pizkundea federazioa sortu zuten euskal kulturaren garapenerako programa finkatu eta euskararen ofizialtasuna eskatzeko.
• "Irrati-telebista euskaraz" kanpaina egin zen gabonetan.
• Euskaltzaleek Irulegi Irratia sortu zuten Donibane-Garazin eta Gure Irratia Milafrangan.

• Araba Films-ek eta Iñaki Nuñezek "Ignacio Zurikalday" filma aurkeztu zuten Gasteizen.
• Imanol Uribek "Segoviako ihesa" 1976an 29 preso politikoren gertakarian oinarrituriko filma egin zuen.

• Xabier Portugal zine-zuzendariak "Xalbador" dokumentala egin zuen eta Nestor Basterretxeak eta Fernando Larrukertek "Agur, Everest".
• Anjel Lertxundik "Ajea du Urturik" nobela idatzi zuen, Joanito Dorronsorok "Bertsotan 1789-1936" liburua, Xabier Mendiguren Elizegik "Sei ipuin amodiozko", Itxaro Bordak "Krokodil bat daukat bihotzaren ordez", Alfonso Irigoienek "Orbel eta Orri", Maite Lazkanok "Gartzelako ateak", Mattin bertsolariak "Ene xokotik kantari", Koldo Izagirrek "Euskal Lokuzioak"...
• Donostian Lehen Nazioarteko Folk biltzarra egin zen ekainean.
• Daniel Landartek "Erranak erran".
• Karmen Larunbe koreografo eta ballet-zuzendari nafarrak Sarasate eta Leonardo Baladaren musikaz eta Paul Eluard poetaren testuaz moldatutako "Gernika" obra aurkeztu zuen.
• Anje Duhaldek "Errobiaren hegitik" diskoa plazaratu zuen, Erramun Martikorenak "Otsobi", Benito Lertxundik "Altabizkar-Itzaltzuko bardoari", Akelarrek "Asfaltuko lorea" eta Imanol Urbietak "Xixupika-I"... Laja eta Landakanda trikitilariek eta Maurizio Elizalde eta Felix Iriartek ere diskoa plazaratu zuten.
• Hil ziren:
  - Agustin Zumalabe, Eusko Ikaskuntzako idazkaria. Argia, Zeruko Argia, Tierra Vasca, Yakintza eta Yagi aldizkarietan argitaratu zituen bere lanak.
  - Telesforo Monzon idazle eta politikaria.
  - Agustin Anabitarte idazlea.
  - Mattin bertsolaria. Omenaldi beroa jaso berria zuen.
  - Imanol Berriatua Anaitasuna aldizkariaren sortzailea.
  
  - Philipe Aranart idazle eta erlijioso behenafarra. Eskualduna eta Aintzina aldizkarietan idatzi zuen eta Pierre Lhandek amaitu gabe utzi zuen "Vocabulaire Français Basque" lana burutu zuen Lafitterekin batera.
  - Etienne Salaberri idazle behenafarra.
  

1981, Bilbo - Farenheit 451

Muga aldizkariari erantzunez | ETB etabar... | Euskara ez da Kultura | Bakea eta euskara | Erdera baturantz?