kronologia

1979

• Gladys del Estal hil zuen poliziak, Lemoiz geldiarazteko martxa erasotu zuenean Tuteran.
• Ipar Euskal Herriko gau-eskoletako arduradunak Baionan bildu ziren Ikas elkartearen bulegoan urtarrilaren 20an, koordinazioaz mintzatzeko.
• Gernikako Autonomi Estatutua onartu zen Araba, Bizkaia eta Gipuzkoako lurraldeentzat eta Euskal Autonomi Erkidegoa sortu zen.

• Auñamendi argitaletxeak "Enciclopedia General Ilustrada del País Vasco" entziklopediaren lehen liburukia plazaratu zuen.
• Abenduaren 24an EHEko partaide batzuk Foru Diputazioetan sartu eta euskararen normalkuntzarako plangintza eskatu zuten.
• Montxo Goikoetxearen ekimenez, Euskadi Sioux aldizkaria sortu zen. Bizente Ameztoi, Jose Mari Agirre, Rafa Castellano, Antton Olariaga, Juan Carlos Egillor, Maya Agiriano, Teo Uriarte, Tomas Goikoetxea ziren, besteak beste, taldea osatzen zutenak. Elebiduna zen.
• Osina Irrati librea sortu zen Donostialdean.
• Eusko Ikaskuntzak Euskal Herriko Historia Kontenporaneoari buruzko dokumentazio-zentroa zabaldu zuen.
• Paulo Igantzi Sariketa antolatu zuten Lesakan. Jose Migel Argiñarena bertsolari errazkindarrak irabazi zuen txapelketa eta bigarren saria Juan Perurena arizkundarrarentzat izan zen.
• Otsailaren 11n Joxe Agirre bertsolaria omendu zuten.

• Justo Garate eta Nemesio Etxaniz ohorezko euskaltzain izendatu zituzten.
• Ekainean Etxahun Iruriren "Ximena" pastorala taularatu zuten Atharratzen.
• Bertan Filmeak enpresak "Ikuska" dokumental-saila aurkeztu zuen. Serie honen ideia "Noticiero catalán" delakotik hartu zuten eta aktualitateko gaiak aztertzea zen helburua: Bilboko espekulazio urbanistikoa, Euskal Telebista, elebitasuna... Xabier Agirresarobe, Antton Ezeiza, Koldo Izagirre, Juanba Berasategi, Vicente Carda, Montxo Rejano, Jose Luis Zabalak eta gainerako egileek adierazi zutenez, «lehen helburua informatiboa da. Bigarrena profesional berri batzuk sortzea, azpiegitura antolatzen hasteko posibilitatea ematen baitu. Hirugarrena euskara finkatzea da —film guztiak euskaraz eginak direnez, herriarengan edukaziozko paper bat jokatzen dute— eta azkenik, filmatutako materialaren artxiboa osatuz joatea, gaur arte ez baita horrelako materialik egon».
• Pio Caro Barojak "Gipuzkoa" filma aurkeztu zuen. Hiru orduko iraupena du.
• Juanba Berasategiren "Fernando Amezketarra" laburmetraiak Bilboko Dokumental eta Laburmetraien lehiaketa irabazi zuen. Marrazki bizidunetako euskarazko lehen lana zen.
• Gomikia-2 komiki-taldearen bigarren zenbakia plazaratu zen.
• Saski-Naski aldizkaria sortu zen. Edili argitaldariaren lauhilabetekari hau beste hizkuntzetako "Reader's Digest" eredura eratua zen. Ez zituen euskara batuaren arauak jarraitzen.
• Antton Olariagak "Zakilixut", urtebetean egindako tiren bilduma plazaratu zuen.
• Beltzak "Euskadi 1984" liburua argitaratu zuen, SIADECOk "Hizkuntza Borroka Euskal Herrian" ikerketa, Arantxa Urretabizkaiak "Zergatik, Panpox?", Gotzon Garatek "Goizuetako ezkongaiak" polizi nobela, Joxe Austin Arrietak "Abuztuaren 15eko bazkalondoa", Amaia Lasak "Nere paradisuetan", Jon Oñatibiak "Erriaren Euskera Batua", Euskaltzaindiak "Euskal aditz batua"...
• Leon, Maurizia eta Fasiok "Alboka eta trikitixa" diskoa plazaratu zuten, Oskarbik "Euskara eta txakoliña", Oskorrik disko bikoitza, Sakre rock-taldeak "Bizitzako gauzak" eta Urkok "Goiherri"...
• Debako Goaz antzerki-taldeak Daniel Landarten "Xuri, gorriak eta...." obra taularatu zuen eta Irisarriko Iturri taldeak Daniel Landarten "Ama".

• Hil ziren:
  - Mikel Zarate idazlea.
  
  - Santiago Aznar politikari sozialista, Caracasen. Lehen Euzko Jaurlaritzako industri kontseilari zelarik eta bere proposamenari jarraiki, gobernuak ikurrina bandera ofizialtzat hartu zuen.
  - Pierre Bordazarre Etxahun-Iruri pastoralgile eta koblakaria.
  - Inazio Mokoroa konpositore eta organojolea.
  
  - Jose Mari Uzelai pintorea.
  - Jokin Zaitegi idazle eta itzultzailea.
  - Jon Oñatibia idazle eta kultur eragilea.
  

1979, Baiona - Seaska hil zorian | 1979, Lekeitio - Eta kale antzerkia itsasotik

"Euskal Herrian Euskaraz" elkartearen agiria | Nafarroa batua

1979ko iragarkiak