kronologia

1975

• Anjel Otaegi eta Juan Paredes Manot "Txiki" etakideen eta Espainiako FRAP talde armatuko hiru kideren heriotza-zigorra bete zuen: gerra-kontseilua egin ondoren fusilatu egin zituzten irailaren 27an.
• Francisco Franco Espainiako diktadorea hil zelarik, mugimendu errebindikatiboak areago egin ziren Hego Euskal Herrian.
• Hego eta Ipar Euskal Herriko bi talde sozialistak bat egin eta EHAS alderdia sortu zuten. Euskal Herri askatu, batu, euskaldun eta sozialista zuen helburu.

• Euskal Irakasle Titulua lortzeko azterketak egin ziren hainbat hiritan.
• Labayru Ikastegiak Etniker aldizkaria sortu zuen.
• Koldo Izagirrek eta Bernardo Atxagak Panpina Ustela literatur aldizkaria sortu zuten. Euskal literaturak dinamika berezirik ez zuela eta lan asko literatur zentzuz baino zenbait arrazoi estraliterarioz plazaratzen zirela zioten. Aldizkari gisa agertu aurretik, Zeruko Argia-ren gehigarri gisa kaleratu zen bolada batean.
• Beste askoren artean, Joan Mari Irigoienen "Hutsetik esperantzara" poesi lana, Lasarte bertsolariaren "Gordeak neuzkanak", Eñaut Etxamendiren "Azken elurra", Mikel Zarateren "Ipuin antzeko alegi mingotsak" eta Antton Olariagaren "Eta abar" umore-liburua plazaratu ziren.
• Bizkaiko irakasle-talde batek "Euskalduntzen" eta "Alfabetatzen" metodoak argitaratu zituen CINSA etxearen eskutik. Lehen zenbakia Rikardo Arregi zenari eskaini zioten.
• Seaskak Ikastolak izeneko aldizkaria plazaratu zuen eta hurrengo ikasturterako Pauen ikastola sortuko zela iragarri.
• Lur argitaletxea banandu egin zen. Bertako kide zen Luis Haranburu Altuna eta beste zenbaiten ekimenez Kriseilu argitaletxea sortu zen.
• RTVE "Euskalerria" izeneko euskarazko ordu erdiko saioa emititzen hasi zen. Jose Mari Iriondo, Manuel Oñatibia, Jose Mari Etxebeste eta Juan Mari Iraolagoitiak ekin zioten lan honi.
• Izukaitz taldea sortu zen.
• Odol Berria talde zuberotarrak "Amiketako Bortian", "Kasernatik", "Ene maitia" eta "Debrien euhera" abestiekin disko txikia plazaratu zuen. Txomin Artolak ere "Olaxta" bere lehen diskoa kaleratu zuen eta Anje Duhaldek bakarkako lehen lana.

• Manex Pagola kantariak "Ortziken" eta "Euskaldunen Herrialdeak" ikuskariak aurkeztu zituen Baionako Erakustokian. Manex Pagola bera, Maite Idirin, Pantxoa eta Peio, Eneko Labegerie, Iker Robles, Iñaki Urtizberea, Maribel Etxezarreta, Jean Treku eta Pantxika Aldalur bildu ziren saioetan. "Baga, biga, higa" eta "Zazpiribai" ikuskizunen antzean, antzerkia, dantza, kantua, musika eta beste hainbat alor artistiko uztartu zituzten.
• Jean Louis Davantek Guillermo Epherrek utzitako lekua hartu zuen Euskaltzaindian. Akademiak, bestalde, Emakumearen Nazioarteko Urtea zen honetan Julene Azpeitia, Madeleine Jauregiberri eta Tene Mujika euskaltzain ohorezko izendatu zituen.
• Azaroaren 29an Txillardegi, D. Landart, Intxausti, J.M. Torrealdai, L. Etxezaharreta, E. Salaberri, B. Oihartzabal, G. Lantziri, R. Kanblong eta beste hainbat idazle Baionako Erakustokian bildu ziren Euskal Idazleen Elkartea indartzeko asmotan.
• Iker taldeak Lehen Sari Nagusia jaso zuen Durangoko Azokan Saioka testu-liburuei esker.
• Gure Herria aldizkariaren bigarren aldiko lehen zenbakia plazaratu zen.
• Isidro Ansorena txistu-konpositorea, Iturri eta Jose Ignacio Etxeberria bertsolariak, Mari Paz Jimenez pintorea, Juan Zaragueta filosofoa eta Gabriel Aresti idazlea hil ziren.