kronologia

1974

• LAB sindikatua sortu zen.
• ETA bitan zatitu zen: ETA militarra eta ETA politiko-militarra.
• Enbata mugimendua debekatu egin zuten.
• Luis Haranburu Altunak Haranburu Editor argitaletxea sortu zuen.
• Elhuyar Zientzia eta Teknika aldizkaria plazaratu zen.
• Argitaratutako liburuen artean, aipagarri: Bitoriano Gandiagaren "Hiru Gizon bakarka" poema-liburua, Patri Urkizuren "Xaribariak" saiakera, Txomin Peillenen "Jon Miranderen idazlan hautatuak", Edorta Kortadiren "Artegintza, Artista, Gizartea"...
• Intxitxu antzerki-taldeak "Orria-778" obra taularatu zuen Eugenio Arozenaren zuzendaritzapean eta Debako Goaz antzerki-talde sortu berriak Larzabalen "Senperen gertatua", Lukas Dorronsoren zuzendaritzapean.
• Donostiako La Voz de España egunkariak euskarazko orrialdea plazaratzeari ekin zion ekainaren 9an. Basarri, Enrike Zurutuza eta Santiago Aizarnak osatzen zuten igandero orria.

• Euskal Konpositoreen Eresbil artxiboa sortu zuen Jose Luis Ansorenak. Urtebete lehenago Musikasteren lehen edizioa antolatu zuen.
• Arabako Ikastolen Elkartea sortu zen zerbitzu-kooperatiba gisa.
• Ken Kirby zinemagileak "Borroka, la lutte des Basques" dokumentala errodatu zuen.

• Joxan Artzek eta Mikel Laboak "Ikimilikiliklik" ikustaldia ondu zuten.
• Antton Valverde, Julian Lekuona eta Xabier Letek bertso eta kopla zahar eta berrien ikuskizuna antolatu zuten.

• Beñat Sarasola, E. Martikorena, Peio Etxegoi, Joanes Borda, J.P. Lekarrieu, P. Berzets eta D. Davantek Guk taldea sortu zuten. Lehen saioa otsailaren 3an eskaini zuten Aiherran: "Aita, seme, laborari".

• Uztapide bertsolaria behin eta berriz omendu zuten. Gorazarreetan aipagarriena, udan Zestoako herriak eskaini ziona. Bestalde, bertsolari handi honek "Leengo egunak gogoan" liburua plazaratu zuen, askoren sorpresarako, hitz lauz idatzita.

• Uztapide ez zen goraipatu bakarra izan urte hartan. Azaroaren 17an hamabost bertsolari zahar omendu zituzten Donostiako Balda pilotalekuan: Joxe I. Etxeberria, Klemente Ezkurdia, German Uriguen Etxagiña, Joxe Mari Aristondo Muño, Frantzisko Mari Lasa, Jose Mari Mutuberria, Joxe A. Sorasu Zubeltzu, Bautista Kortajarena Ondartza, Joxe Kruz Larrañaga Nekazabal, Tomas Arrizabalaga, Lorentzo Zulaika, Juan Ormaetxe, Kosme Aristimuño.
• "Etxahunen trajeria" pastorala eskaini zuten Barkoxen, Eskuararen Egunean.
• Gorka Knörr kantari arabarrak bere lehen diskoa osatu zuen kantu zaharrekin.
• Eibarren, Jon Bergaretxe kantariak bere lehen agerraldia egin zuen.
• Hitz aldizkaria sortu zen Ipar Euskal Herrirako.

• Frantziako telebista euskarazko ordu erdiko programa emitizen hasi zen bi astetik behin.
• Xeberri kantari durangarrak Iparragirreren hiru kantu bildu zituen disko batean; "Zugana Manuela", "Ezkongaietan" eta "Nere amak baleki".
• Metalezko bi txarteltxo jarri ziren salgai komertzioetan eta tabernetan jartzeko. Batek "Euskaraz egiten da" zioen eta besteak, "Cerrado/hertsirik" alde batean "abierto/zabalik" bestean.
• Emile Larrek Lafonek utzitako lekua hartu zuen Euskaltzaindian eta Jose Juan Bautista Merino etnologo eta politikari bizkaitarra euskaltzain ohorezko izendatu zuten.
• Gregoire eta Guillaume Epherre anaia zuberotarrak hil ziren.