1970

kronologia

1970

Joseba Elosegik bere buruari su eman zion Francoren aurrean eta Gora Euskadi Askatuta! oihukatu, Erregimen frankista eta Euskal Herriaren zapalkuntza salatzeko. Hiru urteko kartzela-zigorra ezarri zioten. Bertan "Quiero morir por algo" liburua idatzi zuen.

Burgoseko Epaiketa hasi zen. Meliton Manzanas hil eta beste hainbat ekintzekin zerikusia izatearen akusaziopean, Arantxa Arruti, Jose Maria Dorronsoro, Jabier Izko de la Iglesia, Gregorio Lopez, Xabier Larena, Itziar Aizpurua, Jokin Gorostidi, Jose Antonio Karrera, Josu Abrisketa, Bittor Arana, Mario Onaindia, Jone Dorronsoro, Jon Etxabe, Enrike Gesalaga, Eduardo Uriarte eta Julen Kaltzada epaitu egin zituzten gerra-kontseiluan.
ETAk Eugene Beihl kontsul alemana bahitu zuen epaituen bizia bermatzeko.
Ikastolen Federakundea sortu zen. 51 zentro eta 7.500 ikasletik gora zituen orduan.

Ia hamarkada beteko debekuaren ostean karmeldarrek Karmel argitaratzeari ekin zioten.
Fragaren ministerioak Jakin aldizkaria debekatu zuen «sozialista eta nazionalistatzat» jo ostean. Lege-babesik gabe gelditu zelarik, aldizkari izateari utzi eta liburugintzari heldu zion Jakin-eko taldeak.

Jon Mirandek "Haur besoetakoa" nobela argitaratu zuen. Plazaratu ziren, gainera: Patri Urkizuren "Literatura eta kritika" saiakera, Xabier Kintanaren "Linguistika orain arte", Anjel Lertxundiren "Hunik arrats artean", Txillardegiren "Sustrai bila", Pedro Pujanaren "Euskal aditza (Bizkaiera). Flexiones del verbo vasco vizcaino", Mikel Zarateren "Bizkaiko euskal idazleak", Juan San Martinen "Uhin berri", 1930etik aurrerako poeta askoren olerki-bilduma...
Derioko apaiztegiak Udako Euskal Ikastaroa antolatu zuen. Euskal gramatika eta literaturarekin lotutako gaiak lantzeko jardunaldi hauek 1977az geroztik Labayru Ikastegiak antolatzen ditu.
Maiatzaren 25ean Daniel Landart idazlearen "Bai ala Ez" antzerkia eskaini zuten Baionako antzokian. Daniel Landartek berak ere antzezle gisa parte hartu zuen. Bere "Noiz" obra ere estreinatu zen urte hartan.

Ez Dok Amairu taldeak "Baga, biga, higa... sentikaria" eskaini zuen.
Estitxu Robles-Arangiz kantariak "Agur Maria" diskoa plazaratu zuen.
Drindots emakumez osaturiko taldeak "Trixte bizi naiz", "Ederra da Donostiya", "Ku-ku" eta "Ala kinkirrin" abestiak disko txiki batean bildu zituen.
Hil ziren:
- Antonio Valverde idazle, marrazkilari eta pintorea.
- Secundino Zuazo arkitekto bizkaitarra.
- Victor Zubizarreta konpositorea. Piano eta orkestrarako lanak eta korurako herri-kantuak sortu zituen: "Ama begira zazu", "Agur ene maitia"...