kronologia

1969

• Ikastola sortu zen Baionan.
• Telesforo Monzonek anai-Artea euskal errefuxiatuen laguntzarako elkartea sortu zuen.
• Arantzazuko basilikako lanak bukatu ziren.
• Rikardo Arregi, Gabriel Aresti, Ibon Sarasola, Ramon Saizarbitoria, Arantxa Urretabizkaia, Xabier Kintana eta beste hainbatek osaturiko taldeak Lur argitaletxea sortu zuen. Urte hartan "Euskal Elerti 69" euskal literaturaren belaunaldi berriaren eredua den liburua kaleratu zuen.
• Anaitasuna aldizkari bizkaitarrak, diru arazoak zirela eta, kaleratzeari utzi zion.
• Jon Oñatibiak Lapurdiko euskara irrati bidez ikasteko metodoa plazaratu zuen "Methode d'eskuara radiophonique" izenburupean. Lehentxeago gipuzkera eta bizkaiera ikasteko liburu bana argitaratu zituen.
• Irakur Sail argitaletxea sortu zen.
• Ramon Saizarbitoriak "Egunero hasten delako" nobela plazaratu zuen. Plazaratu ziren, gainera:
  - Iñaki Begiristain antzerkigilearen "Bizia bizi-truk" obra.
  - Manuel Matxainen "Uste gabean" eta Bordariren "Goraintzi" poesi lanak.
  - Xabier Peñaren "Abere alaiak" haurrentzako ipuin-liburua.
  - Juan San Martinen "Euskararen inguruan".
  - Fernando Mendizabalen "Euskaldunentzat gramatika euskeraz".
  - Xalbador bertsolariaren "Ezin bertzean" bertso-liburua.
  
• Mikel Laboak "Haika mutil" diskoa plazaratu zuen.
• Pantxoa eta Peio kantari-bikote lapurtarrak bere lehen disko ttipia plazaratu zuen. Manex Pagola eta Telesforo Monzonen kantuak bildu zituzten: "Itziarren semea", "Lepoan hartu ta segi aurrera", "Batasuna"...
• Joan Baezek "Gernika" abestia plazaratu zuen bere izena zeraman diskoan.
• Donostiako Astorian omenaldia eskaini zitzaion Xalbador bertsolariari.
• Hil ziren:
  
  - Jesus Apellaniz eta Simon Arrieta pintoreak.
  - Julio Beobide eskultore zumaiarra.
  - Gabino Garriga idazle bilbotarra, Buenos Airesko Euskaltzaleak aldizkariaren sortzailea, La Platan.
  - Rikardo Arregi idazle, kazetari eta kultur eragilea, auto-istripuz.
  - Jose Olaizola konpositorea. "Zorigaiztoko egunea" eta "Oleskari zarra" operak edota "Aupa mutillak", "Agur jaunak", "Mendian bai alai", "Oñaze egalpean", "Uxo bat eldu zait", "Euskal Meza" edota "Agur Jesusen ama" herri-kantuak eta musika erlijiosoa sortu zuen.
  - Dominique Soubelet idazle erlijioso lapurtarra.
  
  - Eusebio Eizmendi Txapel bertsolaria. Urte txarrak egokitu zitzaizkion bertsotan aritzeko. 36ko gerra zela eta, maiz kartzelaratu zuten jendaurrean euskaraz kantatzeagatik. Irratian bertso-saioak antolatzen zituen errezildar honek.
  - Bingen Amezaga idazle eta itzultzailea, Caracasen.