1967

kronologia

1967

Carrero Blanco almirantea Espainiako Gobernuko lehendakariorde izendatu zuten.
SIADECO (Sozio-ekonomi Ikerketa Erkartea) sortu zen.
Ez Dok Amairuk sekulako arrakasta lortu zuen Bartzelonan. 2.500 lagun bildu ziren Palau de la Musica-n Benito Lertxundi, Lurdes Iriondo, Mikel Laboa eta Francesc Pi de la Serrak eskainitako kantaldian.
Julian Lekuona Ez Dok Amairu taldeko kideak diskoa plazaratu zuen CINSA etxearen eskutik. "Ez dut nai", "Illargira noa", "Euskal emigranteen abestia", "Aizak, i" eta "Iltzalle bat bezela" abestiak bildu zituen. Lurdes Iriondok ere disko txikia jarri zuen kalean. Bere lehen grabazioa zuen eta "Abesten dizut jauna", "Etzaitut ikusi nai", "Agurra" eta "Loa" kantuak bildu zituen bertan.
Pablo Sorozabalek "Gernika" hileta-doinua, "Irugarren kalez-kale", "Marcha de Deba" ta "Zortziko de las Bateleras" abestiekin diskoa osatu zuen.
Etxamendi eta Larralde bikotea herriz herri kantatzen hasi zen.
Francisco Escuderok "Zigor" opera estreinatu zuen.

Nemesio Etxanizen "Lur berri billa" olerki-bilduma plazaratu zen. Gotzon Garitaonaindiak "Balendin Uriona" argitaratu zuen, Txomin Peillenek "Gatu beltza", Martin Ugaldek "Unamuno ta euskera" saiakera eta Jose Maria Satrustegik "Luzaideko kantiak" bilduma.
Bilboko Aiala antzokian Euskal Antzerki Astea antolatu zuten. Jarrai taldeak Camus-en "Gizon zuzenak" obra estreinatu zuen bertan, eta Kriseiluk "Sistema zoriontsu bat" eta katalanetik itzulitako "Ez du ardura nun jaio zaran" obrak taularatu zituen.
Battitta Urrutik Etxahun-Irurik idatzitako "Txikito de Kanbo" pastorala zuzendu zuen.
Manuel Lekuona Euskaltzaindiko lehendakari hautatu zuten.
Txistulari Elkarteak Euskal Dantza Berrien Txapelketa antolatu zuen. Jon Oñatibiak eraman zuen lehen saria.
Nafarroako Unibertsitateko 600 ikaslek euskararen aldeko eskabidea egin zioten bertako diputazioari.
Tolosako Udalak bere gain hartu zuen euskara hutsezko ikastolaren ardura.
Donostiako Udalak kale-izenak euskaraz eta gaztelaniaz paratzea erabaki zuen.

Euskaltzaindiak Rikardo Arregiren zuzendaritzapean alfabetatze kanpaina bati ekin zion. Rikardo Arregi bera, Aita Villasante, Patxi Altuna, Aingeru Irigarai, Manuel Lekuona, Juan San Martin, Xalbador Garmendia, Mari Karmen Garmendia, Begoña Arregi eta Ramon Saizarbitoriak esku hartu zuten.
Euskal Pintura Lehiaketan Jose Luis Zumetak eraman zuen lehen saria, "Picassoren Guernica delakoari omenaldia" obrari esker.
Hil ziren:
- Andima Ibiñagabeitia kultur eragilea, Caracasen. Euskara ikasteko lan didaktikoak plazaratu zituen eta Caracasko Eman euskal aldizkariaren sortzaileetariko bat izan zen.
- Kandido Izagirre hizkuntzalaria. Altsasu, Ultzama, Tolosa, Arantzazu eta Erronkariko azpieuskalkiak aztertu zituen. "Iztegiak" bilduma osatu zuen ikerketen emaitzekin.