• Urtarrilaren 9an Euskal Abesti Berrien Jaialdia antolatu zen Donostian eta Hernanin. Benito Lertxundik eman zion hasiera jaialdiari. Gero, Kemen izeneko neska-hirukoteak jardun zuen, ondoren Mikel Laboak, Lurdes Iriondok, Julian Lekuonak eta Bikondoa soinujoleek. Arantxa Gurmendik orkestinaz lagunduta kantatu zuen eta azkenik "Pelotari" filma erakutsi zuten.
• "Hazparneko Anderea" eta "Eneko Bizkai eta Maria Lorka" antzerki-lanak idatzi zituen Telesforo Monzonek.
• Imanol Urbietak "Haur kantariak" haurrentzako diskoa grabatu zuen.
• Nestor Basterretxeak eta Fernando Larrukertek "Alquezar" laburmetraia estreinatu zuten.
• Espainiako 1966ko Erakusketa Nazionalean Euskal Herriko 13 artista bildu ziren, besteak beste, German Donosti, Mentxu Gal, Karmelo Barrena, Ignazio Garzia Erguin, Jose Maria Gonzales, Pedro Marcos Bustamante, Antonio de Miguel Martinez, Angel Moraza, Karmen Perez-Seoane eta Luis Sanchez Martinez. Hamasei lan aurkeztu zituzten lehiaketan.

• Diario de Navarra-k, itxura aldatzearekin batera, euskarazko orrialde bat erantsi zion bere egunkariari. Euskarazko orri hori, lehen zenbakian zioenez, hilaren lehen eta hirugarren ostegunetan azalduko zen. Ez zen bakarra Nafarroan. El Pensamiento Navarro-k ere "Zaldiko Maldiko" gehigarria erantsi zion egunerokoari eta Nafarroako Diputazioak Principe de Viana-ren euskarazko bertsioa plazaratu zuen.
  
• Euskaltzaindiak Gipuzkoako letratuen Elkarteari agiri bat zuzendu zion, auzitegietan, maiz gertatzen ohi zen bezala, erdaraz ongi ez dakiten lekuko edo salatuentzat interpretaria jartzeko. Gipuzkoako Letratuen Elkarteak laster batean lanpostu hori betetzeko lehiaketa antolatuko zuela agindu zuen. Bestalde, Espainiako Heziketa eta Jakintza ministroari euskara zabaltzeko eskabidea egin zion, «hizkuntza hau ofizialki nolabait sar dakila ikastola eta beste irakaskintzetako etxe guztietan».
• Euskaltzaindia euskal hiztegiaren gainean lan egiten hasi zen ekainaren 5ean. Villasante, Lafitte eta Zatarain "A" letrarekin lanean hasiak ziren jada. Hurrengo bilerarako eta oinarri bezala, Azkueren hiztegia harturik "Aa" letrarekin hasten diren hitzak aztertzea erabaki zen, baina berehala hasi ziren "h"-ri buruzko eztabaidak.
• Ikastola sortu zen Gasteizen.
• Daniel Landartek "Gure haurra" antzerki-lana idatzi zuen, Etxahun-Irurik "Iruriko kuntia" pastorala, Joan Mari Lekuonak "Mindura gaur" poesia liburua eta Martin Ugaldek "Sorgiñaren urrea" haurrentzako ipuina.
• Manuel Matxainek Xenpelar Bertso-paper lehiaketa irabazi zuen.
• Aszension Martiarena eta Jesus Basiano pintoreak eta Frantzisko Torres idazlea hil ziren.

1966, Bilbo - Ez Dok Amairu | 1966 New York - Euskaldunok pantailan ez dugu parerik | 1966, Gasteiz - Domino fitxak legez

Lehen Euskal Abesti Berrien Jaialdiari buruz | Euskal Kultura gure gaurko gizartean | "H" dala-ta | Gabriel Aresti'ri ihardespena | Euskal Musika Berria | Eskritore falta | Euskararen iraupena Nafarroan | Neuk-en txistea

1966ko iragarkiak