kronologia

1964

• Frankistek Segura, Arrate eta Tolosa Herri Irratiak itxi zituzten. Informazio eta Turismo Ministerioak Loiolakoari bakarrik utzi zion emititzen.
• Jon Etxaidek "Gorrotoa lege" nobela plazaratu zuen eta Txomin Peillenek Domingo Agirre nobela saria irabazi zuen, "Gauaz ibiltzen dana" obrari esker.
• Koldo Mitxelenak "Sobre el pasado de la lengua vasca" argitaratu zuen.

• Antzerkiari buruzkoak:
  - Daniel Landarten "Herro eta nigar", Salbador Garmendiaren "Historia triste bat", Piarres Larzabalen "Senperen gertatua" eta Martin Ugalderen "Ama gaxo dago" lanak argitaratu ziren.
  - Donostiako Jarrai antzerki-taldeak J.B. Priestley-k sortu eta Julian Lekuonak euskaratutako "Ertzaina etxean" lana taularatu zuten estreinakoz Bilbon.
  - Maiatzean Antzerki Astea antolatu zuten Donostian. Taldeen saioez gain, Gabriel Arestik "Euskal Antzerki berri baten beharra" hitzaldia eman zuen.
  -Abuztuan antzerkigintzan aritzen ziren idazleak bildu ziren, besteak beste, euskal antzerkia berritu beharraz, sariketetaz eta etorkizunaz mintzatzeko. Euskal antzerkia goi mailara bultzatzeko «zentsura baten beharra» zegoela aipatu zenean eztabaida piztu zen, Iñaki Beobide Zeruko Argia-ko kronistak azaldu zuenez.
• Frantziskotarren Anaitasuna aldizkaria autonomo egin zen eta hilean behin argitaratzen hasi zen.
• Jose Antonio Retolazaren ekimenez, Kili-kili haurrentzako aldizkaria argitaratu zen.

• Ana Maria Marin zinegotziaren ekimenez, Baztandarren Biltzarra jaia ospatu zen estreinakoz Elizondon.
• Arantzadi Taldeak museo berria zabaldu zuen Donostiako San Telmon.
• Apirilaren 24an Aita Madinak kontzertua eskaini zuen New York-eko Tow Hall-en.
• Goizaldi dantza-taldeak lehen saria irabazi zuen Txekoslovakiako Folklore lehiaketan.

• Antonio Maria Labaien eta Juan San Martin euskaltzain oso hautatu zituzten.
• Bilboko Txistu Doinuen lehenengo Txapelketan eztabaida sortu zen, "Kanta eta Dantza" saritutako doinua erabat ortodoxoa ez zelako.
• Bilboko Herri Irratiak eta CINSAk Lehen Euskal Abesti Txapelketa antolatu zuten. Lehen saria Joxe Olaizolak eraman zuen "Mendietan" obra medio eta bigarrena Joxe Mari Gonzalez Bastidak, "Elurra teillatuan" abestia medio.
• Begoña Abaituak Llangollen herriko (Gales) Nazioarteko Abeslarien Lehiaketan bigarren saria irabazi zuen.
• Nestor Basterretxea eta Fernando Larrukert "Ama Lur" filma errodatzen hasi ziren.

• Jon Lopategik Bizkaiko Bertsolari Txapelketa irabazi zuen.
• Amezketako herriak Fernando Amezketarraren bigarren ehunurteburua ospatu zuen. Ekitaldien sarreran Fernando Amezketarrari buruzko liburua jarri zuten salgai, baina ez zuen arrakasta handiegirik izanez zen... Ez zen Gregorio Mujikarena. Gaztelaniaz idatzita zegoen.
• Angel Cabanas paisajista donostiarra hil zen Argentinan.

"Euskera atsegin zaigu" | Kennedy zanari | Euskal literatura bizi da | Soldadutza

1964ko iragarkiak