kronologia

1963

• Zeruko Argia aldizkaria Donostian kokatu, itxura aldatu eta astekari bihurtu zen. Bilakaera honek eta bertan lanean hasi zen ekipo gazteak euskal kazetaritza modernoaren sorreran garrantzi handia izan zuten.

• Gabriel Arestik "Harri eta Herri" plazaratu zuen, Federiko Krutwig-ek "Vasconia" eta Jorge Oteizak "Quosque tandem!" euskal arimaren interpretazio saioa. Belaunaldi berri baten errefe-rentzia inportanteenetarikoak izan ziren.

• Telesforo Monzonen antzerki-taldeak Piarres Larzabalen "Paper mende" komedia berria antzeztu zuen Urruñan; Lizardi taldeak Antonio Labaienen "Malentxo alargun" Tolosan, eta Gure Txeru Getariako antzeztaldeak Abelino Barriolaren "Lagun Txar bat".

• Daniel Landartek "Hilak hil" antzerki-lana idatzi zuen.
• Gotaiñen "Santxo Azkarra" pastorala eskaini zuten abuztuaren 4an.
• Bertsolaritzaren loratzea:
  - Martxoaren 31n bertsolari jaia ospatu zuten Alduden. Mattin, Zubikoa, Azpillaga, Klemente eta Aintziarte izan ziren aritutakoak eta Mixel Labegerie gai-emaile. Gernikako arbola kantatuz eman zitzaion bukaera saioari.
  - Irailaren lehenean, Bertsolarien Eguna ospatu zuten Bilbon. Uztapide, Basarri, Arozamena, Enbeita, Mugartegi, Azpillaga eta Lopategik jardun zuten.
  - Azaroan Nafarroako Bertsolari Txapelketa jokatu zen. Manuel Huizi, Simon Ibarra, Andres Narbarte, Bautista Madariaga, Manuel Arozamena, Mattin Oreja, Aingeru Aldatz, Mikel Zabaleta, Erramon Mihura eta Mikel Arozamena lehiatu ziren eta azken honek irabazi zuen txapelketa. Bigarren saria, berriz, Andres Narbartek jaso zuen.
  - Joxe Mari Iriondok Bertsolari Gazteen bigarren Sariketa antolatu zuen Loiola Irratian. Bertsolari gazteok ‘liga' moduan lehiatu behar zuten elkarren kontra eta txapelduna entzulegoak hautatuko zuen. Irratian bildutako mila hirurehunetik gora iritzik Azpillaga aukeratu zuten txapeldun.
• Arantzadi taldeko hiru kidek Altxerri leizezuloa aurkitu zuten Orioko Aian.

• Jose Maria Satrustegi, Piarres Larzabal eta Juan Gorostiaga euskaltzain oso hautatu zituzten eta Jose Maria Lojendio, euskaltzainburu.
• Ikastola sortu zen Iruñean.
• Jose Maria Sanmartin konpositore gasteiztarrak Espainiako Musika Sari Nazionala irabazi zuen bere "Suite Arabarra" obra medio eta Rodrigo Santiago orkestra-zuzendari bizkaitarrak "Suite sinfónica vasca" obra aurkeztu zuen.

• Enrike Nieto eta Ramon Zubiaurre pintoreak eta Sebero Altube idazle eta filologoa hil ziren.