kronologia

1960

• Baionako ikasle-talde batek Enbata aldizkaria sortu zuen.
• Lau euskal diozesietako 339 apaizek Francoren erregimenak Euskal Herrian ezarritako zapalkuntza eta genozidioa salatu zuten.
• Basarrik Euskal Herriko Bertsolari Txapelketa Nagusia irabazi zuen. 36ko gerraren osteko lehen txapelketa genuen.
• Jacques Allières Okzitaniako Tolosako irakasle eta euskaltzaleak "Petit atlas linguistique basque française" argitaratu zuen. Lehentxeago, "Les Basques" euskaldunen hizkuntza, literatura eta historiari buruzko lana plazaratu zuen.
• Mixel Labegerie Eskualzaleen Biltzarreko lehendakari hautatu zuten.
• Espainiako Informazio eta Turismo Ministerioak debekatu egin zuen Zeruko Argia. Aldizkaria itxi baino zertxobait lehenago, urte hartan bertan, "Pan-Pin" haurrentzako komiki-gehigarria, garaiko bakarra, plazaratu zuen. Kaputxinoen aldizkariak hiru urte eman zituen isilik.
• Pierre Narbaitz historialariak Oxobiren lekua hartu zuen Euskaltzaindian.
• Manuel Maria Apalategiren "Gure aditza" eta Joseba Intxaustiren "Euskal aditza" gramatika-liburuak plazaratu ziren. Argitaratu ziren, gainera:
  - Piarres Larzabalen "Pierre Loti eta gu".
  - Koldo Mitxelenaren "Historia de la Literatura Vasca".
  - Klaudio Sagarzazuren "Nik zuri eta zuk neri", Satarka sinadurapean.
  - Juan San Martinen "Zirikadak".
  - Telesforo Monzonen "Menditarrak" eta "Gure behia hila da" antzerki-lanak.
  - Marie Jeanne Minaberri idazle behenafarraren "Amaño Kantua" eta "Esku miresgarria" poesi lanak.
• Hil ziren:
  - Jose Antonio Agirre Eusko Jaurlaritzako lehendakaria. Jesus Maria Leizaola izendatu zen haren ordezko.
  - Jean Ithurriage kultur eragile behenafarra. Lehen Mundu Gerratik itzuli zelarik Bordele eta Parisera jo zuen ikastera. Eskualtzaleen Biltzarreko eta Baionako Euskal Museoko lehendakari izan zen. Bertso-txapelketetako epaimahaikide izan zen. Euskal Herriari buruzko liburuak idatzi zituen frantsesez.
  - Jabier Ziga pintore nafarra.