kronologia

1947

• Enrike Albizu pintoreak Gipuzkoako artista berrien lehen saria irabazi zuen.
• Euzko Jaurlaritzak greba orokorrerako deia egin zuen Araba, Bizkaia eta Gipuzkoan. Bestalde, OPE (Oficina de Prensa de Euzkadi) prentsa-bulegoak OPE buletina argitaratu zuen Euskal Herrian eta erbesteko euskaldunen artean sortzen ziren berriak zabaltzeko. Gaztelaniaz idatzita zegoen.

• Gernika Bazkuna Eusko-Jakintza kultur aldizkaria argitaratzen hasi zen Baionan. Jose Migel Barandiaranek zuzendu zuen lehen urteetan eta euskaraz, gaztelaniaz eta frantsesez idatzi zuten.
• 1936tik isilik egon ostean, Gasteizen sortutako Eusko-Folklore etnologiako urtekaria berriz argitaratzen hasi ziren Baionan.
• Arantzazuko frantziskotarrek Jose Antonio Garateren ekimenez, Arantzazuko Andre Mariaren Egutegia sortu zuten.
• Aranzadi Zientzi Elkartea sortu zen Donostian.
• Antonio Labaienek "Escenas Papeleras" Tolosako eta inguruko paper fabrikei buruzko liburua argitaratu zuen. Guardia Zibilak edizio osoa erretiratu zuen, erbestean zegoen Ixaka Lopez Mendizabal idazle eta inprentari tolosarraren izena aipatzeagatik.
• Iratzederrek "Tontoteiko hiru semeak" antzerkia-lana idatzi zuen.
• Telesforo Monzonek "Gudarien egiñak" poema-liburua argitaratu zuen. Donibane-Lohizunera etorrita, "Gernika askatasunaren bidean" hitzaldia eman zuen.
• Aldizkarietan euskara erabiltzea debekatu zuen Espainiako Gobernuak.
• Federiko Krutwig euskaltzain oso izendatu zuten. Orduan harrigarria bazen ere, sarrera-hitzaldia euskaraz irakurri zuen.
• Rodrigo Santiago konpositore eta orkestra-zuzendari bizkaitarrak "Concierto vasco" obra sortu zuen.
• Hil ziren:
  – Manuel Arriandiaga euskararen garbizaletasunaren defendatzaile sutsua.
  
  – Georges Lacombe idazle, hizkuntzalari eta euskaltzalea, Parisen.
  – Nikolas Mujika pintorea. Paisajista gisa nabarmendu zen.
  - Federiko Belaustegigoitia euskaltzale sutsu eta kultur eragile laudiotarra.