1932

kronologia

1932

Antzerti literatur aldizkaria sortu zen Tolosan. Lopez Mendizabal argitaletxeak plazaratu zuen eta hilero Antonio Maria Labaienen zuzendaritzapean antzerkigile zahar eta berrien obrak biltzen zituen.

Baionako Lasserre et Le Livre argitaletxeak Piarres Lafitteren "Ithurralden kantuak" argitaratu zuen.
Xabier Lizardik "Biotz-Begietan" poema-bilduma plazaratu zuen.
Jose Migel Barandiaranek Bizkaiko aztarnarik zaharrenak aurkitu zituen Dimako Axlor haitzuloan: Erdi-Paleoli-toko eta Moustier aldiko hezur landuak, animaliak harrapatzeko tresneria eta hezur-hondakinak, besteak beste.
Ekainaren 19an Araba, Bizkaia, Gipuzkoa eta Nafarroako udalen ordezkariak Iruñean bildu ziren "Estatuto Vasco Navarro" delakoari buruz erabakitzeko. Ordura arte Hego Euskal Herrirako estatutu bakarraren alde agertu izan bazen ere, egun hartan Nafarroak kontrako hautua egin zuen, Emilio Azarola diputatuaren «Nafarroa bakarra» leloari jarraiki, eta estatutu-prozesutik kanpo geratu zen.
Emakume Abertzale Batzak Juventud Vasca-rekin batera Euzko Irakasle Batza eta Euzko Ikastola Batza sortu zituen. Azken elkarte honek urte hartan bertan "Zenbakiztija" aritmetika ikasteko metodoa argitaratu zuen Bilbon.

Anizeto Zugastik "Mendi mendian" poemak argitaratu zituen eta Agustin Anabitartek "Donostia" nobela.
Euskaltzaleak elkarteak Hernanin antolatutako III Euskal Olerti-Jaietako sariketa Loramendik irabazi zuen, "Barruntza-Leyoan" poemari esker.
EAJk Lehen Aberri Eguna antolatu zuen Bilbon, alderdiaren 50. urteurrena ospatzeko.

Luis Arana Goirik Bizkai Buru Batzarreko lehendakaritza-kargutik dimititu egin zuen. Euskaldunek espainolen arteko gerran esku hartzerik ez zuen ametitu eta estatutuaren aldeko gestioa ere ez zitzaion egokia iruditu.
Jose Mardones kantari liriko arabarra hil zen.