Durangoko
Azokako emaitza baikorrek gure kultura osasuntsu
dagoela pentsatzera eraman gaitzakete urtea amaitzeko egun
gutxi falta direnean. Bainan Durangokoa ez da gure kulturaren
neurgailu bakarra eta guk urtarriletik hona gertatutako guztia
hartu nahi izan dugu kontuan 2000 urteak euskal
kulturan emandakoaren balantzea egiterakoan. Nagore
Irazustabarrenak eta Izaskun Jauregik kulturaren alor ezberdinak
ongi ezagutzen duten pertsonen laguntza jaso dute lan hori
egiteko orduan eta protagonisten
hitzak ere ekarri nahi izan dituzte.
Literaturari
dagokionez, aurtengo liburu produkzioa 1.500 aletik gertu
egon da eta emakume idazleen urtea izan dela esan daiteke.
Hala ere, egon da beste ekimen garrantzitsurik ere: bizkaitarrek
idatziriko liburu mordoa kaleratu da aurten, Gasteizko eskolak
ere berea egin du, Gabriel
Aresti hil zela 25 urte bete dira, Durangoko Azokako
salmentek gora egin dute... Hala ere, irakurzaletasunaren
inguruko inkestek kezka sortzen jarraitzen dute. Musika
arloan, disko berri ugari entzun da azken 12 hilabeteotan.
Uda partean jazz musika izan genuen nagusi eta ondoren klasikoa
Musika
Hamabostaldian. Elektronikaldia
ere burutu zen iraila amaitzear zela Donostian eta musika
elektronikoak eskaria izan dezakela erakutsi zuen.
Bertsolaritza
ere gai nagusia izan dugu 2000. urtean, Nafarroako nahiz Bizkaiko
Bertsolari Txapelketen ondorioz. Antzerkian,
aldiz, euskal antzezlan batzuen arrakasta handia eta Euskal
Herritik kanpo hainbat euskal taldek jasotako sariak euskal
antzerkiaren gorakadaren adierazgarri dira. Baina euskarazko
eskaintza urria da oraindik. Hurrengo urterako helburuak, aldiz,
Dokumentazio Zentrua eta Euskal Zentru Dramatikoa.
Dantza
klasiko edo garaikidea jorratzeko zailatsunak daude Euskal Herrian.
Euskal dantzei dagokienez, Erromeria eguna sendotzear dago,
txapelketa ugari burutzen da urtero. Bainan, dirulaguntzak urritu
egin dira eta emanaldi eskaria nabarmen murriztu. "Saturazioaren
ordainak" Ramon Santxezen hitzetan. Artearen
arloan, Txillida-Leku
etorriko zaio gehiengoari gogora. Baina beste hainbat proiektu
ere landu da aurten, Oteizaren Museoa,
Gasteizko Arte Garaikidearen Museoa, esaterako. Erakusketak
ere ugariak izan dira bukatzear dagoen urte honetan eta bat
aipatzekotan Donostiako "Atarian"
arrakastatsua aukera daiteke.
Eta, azkenik, euskal zinemaren
inguruan hitz bi. Batetik, azken egunotan hedabidetan entzun
dugu berria: hainbat film euskarara itzuliko direla, Eusko Jaurlaritzaren
dirulaguntzari esker. Eta, bestetik, marrazki bizidunen euskal
produkzioen gorakada aipatu beharra dago. Azken emaitzak: "Karramarroen
uhartea" (Irusoin)
eta "Ametsen
Lapurra" (Dibulitoon
Studio).
français 
