XXI. MENDEKO EZKERRAREN BILA

Larrun pentsamendu aldizkariaren 41. alean etorkizuneko ezkerra dute hizpide Xabier Letonak eta Katixa Garatek. Globalizazioaren aroan, munduko txiroenen eta aberatsenen arteko desberdintasunak gaur egun inoiz baino handiagoak direla esaten da. Neoliberalismoak bere errezetekin jarraitzen du han eta hemen, mundializazioaren sarea zabalduz eta sendotuz; "garapenean" diren herrialdeetako herritarren gehiengoak gero eta zailtasun handiagoak ditu miseri gorritik ateratzeko. Eta ezkerra? Non da ezkerra? Eta sozialismoa? Horiek dira ezkertiar mugimendu zabal eta zehaztugabean aireratzen diren galderetakoak. Kapitalismoak jadanik irentsitako kontzeptua dela diote batzuek; ezetz besteek, bideak topatzen eta jorratzen jarraitu behar dela. Noraezaren erdian, gizarte mugimenduak indartsu dira, hor topatu ei dute babesa ezkerraren baloreetako batzuek.

XXI. mendeko ezkerraren inguruko mahainguruak lau gonbidatu bildu zituen. Batetik Antton, Karrera Gipuzkoako Ezker Batuko koordinatzaileak. Nafarroako CCOOko sortzaileetako bat, LKIn militatu izan du urte luzez eta azken sei urteetan Ezker Batuan. Bigarrenik, Zutikeko buruetakoa eta EHko biltzarkidea den Joxe Irirarte, "Bikila", izan zen eztabaikide. Hirugarrenik, Julen Zabalo irakasle eta idazlea izan zen mahainguruan. Geografia eta historian lizentziatua, espetxean geografia politikoaren doktoradutza tesia egin zuen, eta zientzia politikoa eta soziologiaren lizentziatura. Eta, azkenik, laugarren mahakidea, Iņaki Urrestarazu irakaslea izan genuen. 8 urtez errefuxiatu gisa egona, LAIAn militatu eta KAS eta HBn ibili zen sorreratik, desadostasunengatik alde egin arte. Gaur egun gizarte mugimenduetan ari da.

Lau iritzi artikulu ere biltzen ditu Larrunen azken aleak. Emilio Lopez Adanek, "Ezkerraren bila" izeneko artikuluan, "sistema nondik hautsi oraingoan pentsaera iraultzaileak bilatu behar duela" dio. Antton Azkargorta EHUtik kanporatutako irakaslea dugu eta berak "ezkerrak esanahi politikorik ba ote duen" galdetzen dio bere buruari. LAB sindikatuko idazkari nagusia den Rafa Diez Usabiagak "ezkerra eta burujabetzari" buruz idazten du bere artikuluan. Eta, azkenik, Milagros Rubio Batzarreko nafar parlamentarioak Hego Euskal Herriko ezkerraren inguruko hainbat burutazio aurkezten dizkigu.

* Loturak:
- Araba eta abertzaletsasuna, Larrun pentsamendu aldizkaria
- Euskal Herriko politika alderdiak sarean
- Euskal sindikalgintza sarean
- Sindikalgintza abertzalea: Larrun pentsamendu aldizkaria, gai berezia Argian