BERTSOLARITZA: BERTSO ESKOLETATIK MUNDURA
"Bertso eskoletatik mundura" Larrun txostenak bertsolaritzaren munduan murgiltzen gaitu Estitxu eta Ixiar Eizaguirreren eskutik. Bertsolaritzaren zurrunbiloak jende eta alor asko astintzen ditu: bertso eskolak, saioak, komunikabideak, ikerlanak... Azken hogei urteotan inspirazioz, berez, edo haizearen arabera aritzeari utzi, eta bertsolaritzako alor denak konszienteki lantzen hasi dira. Egun bertsolaritza mugimendu autoantolatu eta eraginkorra da. Kamaleonikoa, orain artean bezala etorkizunean baldintza klimatologiko berrietara egokitzen jarraitu beharko du bizirik eta zutik ekiteko, edo bestela fosildu egingo da. Egun ikusten da jada haize berriak bultzaka datozela: belaunaldi korronte berri bat, gizartean joera-gustu berriak... Hargatik, bertsolaritzaren mugimendu autoantolatua nola sortu zen, egun nola dagoen eta zein diren etorkizuneko erronka eta iragarpenak aztertu nahi izan ditugu.

Bertsolaritzaren inguruko mahainguruan lau mahakide bildu dira, euskal kulturan oso ezagunak guztiak. Batetik, Xabier Amuriza bertsolaria. Bertsotan 80-82an txapela jantzi eta beste txapel asko hankaz gora utzi zituen. Bigarrenik, Bertsozale Elkarteko idazkaria den Koldo Tapia izan zen mahainguruan. Bartzelona bizitakoa, bi aldiz egonda zizurkildarra. Santurtziko Udalean euskara eragile gisa ere ibili da. Jon Sarasua bertsolaria dugu hirugarren mahakidea. Bertso eskola kumeen lehen generazioetakoa, Kazetaritza eta Soziologian lizentziatua eta doktorea dugu. Gaur egun, beste gauza askoren artean, Bertsozale Elkarteko Komunikazio Arduraduna, Mondragon Unibertsitateko irakasle eta ikerketa institutu baten arduraduna da. Eta, azkenik, mahaingurua osatuz, Joxerra Garzia gaijartzailea dugu laugarren mahaikidea, Kazetaritzan eta Publizitatean lizentziatua eta doktorea. Egun, beste gauza gehiegiren artean, Euskal Herriko Unibertsitateko irakasle eta Alberdania argitaletxeko "Zer berri" sailaren arduraduna da.

Mahainguruaz gai, Larrun azken alean bertsolaritzarekin erlazioa duten lau pertsonen artikuluak ere jaso dira. Andoni Egaña, Igor Elortza eta Iñaki Murua bertsolariak dira txostenean idatzi dutenetako hiru. Laugarrena, aldiz, Laxaro Azkuene, gai jartzailea dugu eta bere artikuluan bertsolaritzaren azken 20 urteetako bilakaeraz mintzo da.

* Bertsolariei elkarrizketak:
- 1963-97 bitartekoak, Argia
- Joxe Agirre
- Xabier Amuriza
- Manolo Arozena
- Amets Arzallus-Sustrai Colina
- Andoni Egaña: I, II
- Txomin Garmendia
- Joxe Lizaso
- Sebastian Lizaso

* Beste lotura batzuk:
- Bertsolaritza, Argian
- Bertso bilduma, Elkarlanean
- Urepeleko bertso saioa
- Bertso berriak