Gari alea Weblog-a
(Ia) plazaratu zen neska bertsolariaren bila
2010(e)ko ekainaren 30a
Jon Ansa bertsolari oreretarrak bidali du pista. Xanti Zabala "Lexo"k duela 45 urte topo egin omen zuen Donostiako sariketa batean neska bertsolari batekin. Zoria edo ez dakigu zer motibo tarteko, ez omen zen plazaratzera iritsi. 70 urteren bueltan lituzke gaur.
Ansaren hitzak: "Xanti Zabala 'Lexo'-ri egindako elkarrizketan, bera eta berekin biltzen den bertso koadrilari emakume bertsolarien inguruan galdetu nien. Lexok kontatu zidan berak 22 urte inguru zituenean, duela 45 alegia, Donostiako Trinitate plazan bertso sariketa bat jokatu zela. 18-20 bertsolari omen zeuden eta tartean neska bat. Saioa hasi eta berehala, baina, euria zaparradaka hasi zen, eta bertan behera geratu zen sariketa. Neskak, oholtzan egonda ere, ez zuen kantatzeko aukerarik izan. Handik 8 egunera jokatu zen Sariketa hura, baina lehenengo egunean baino bertsolari bat gutxiago azaldu zen: neska, hain zuzen. Zergatik ez zen azaldu bigarrenean misterio bat da, eta neska bera zein den/zen ere bai. Lexoren arabera, Goierri aldekoa. (Gaur 70 urteen bueltan izango lituzke)".
Ikertzen jarraituko dute. Inork informaziorik balu, mesede ederra.
