Botila berrerabiliekin egindako zuhaitza Iruñeko Eguberria argitzen

Atalak: Berrerabilpena

Iruñerriko mankomunitateak bigarren urtez jarraian nafar hiriburuko Baluarte plazan zuhaitz berezia ipini du Eguberriotarako: botila berrerabiliz egindako arbola. Ideia sortu duen Pedro García Torresek -ardoa botila berritan saltzen hasi eta usatuak garbitu eta berrerabiltzen berezitu den enpresagizona- gaiari buruzko argitasun ugari eskaini dizkio Compañía de las 3 R elkarteko Jesus Arbizu “Txurio”ri.

Baluarte plazan jarririk 6,5 metroko altuera duen zuhaitza Faltzesko Bodegas San Estebanek eskainitako 2.530 botila berrerabilgarriz osatuta dago. Pedro Gonzalez Torres Pedrola aspaldiko ardogilea da, baina berezitasun baten jabe: betidanik lan egiten du ez botila berriak baina berrerabiliak usatuz. 1978tik ari delarik ardogintzan, 1987an botilen berrerabilpenean ari zen enpresa bat erosi zuen, lana errezago egin ahal izateko.

Pedrolak iaz Iruñean emandako hitzaldi batean garbi azaldu zituen kristalezko ontziak berrerabiltzea lehenetsi beharra dagoela: “Botila bat birziklatzeko urtu eta berriro egiteko 100 gramo petrolio behar dira, usatua garbitu eta prestatzeko 5 gramo baizik ez. (…) Botila bat 80 aldiz berrerabil dezakegunez, azkenean botilako 8 kilo petrolio aurrezten dugu”. Gainera, urtualdi bakoitzean etiketa eta gaineako zikinen kutsadura gehituz doakio botilen beirari.

Legedia ontziak itzuli eta berriro usatzearen aldekoa da, baina ez da betetzen, besteren artean beiraren produkzio eta komertzializazioan ari diren multinazionalen presioz. Administrazioak botilen bilketarako azpiegitura egokirik antolatzen ez duenez, hondakinak murrizteko atal oso bat dago kasik landu gabe.

Navarra Verde “Don Pedro el bodeguero, ecologista sin saberlo”

Noticias de Navarra “Mañana, encendido del árbol navideño con botellas recuperadas“