CAF, Kutxabank eta espantsionismoa

Atalak: Ekonomia

CAFeko langileak batzarrean, buzoa jarrita  (Arg: Enpresa Batzordea)

Rajoyren Gobernuak otsailean lan erreformarekin egin bortxaketaz hasi dira gozatzen enpresariak. Zehazki, langileen beldurrarekin espekulatzeko mauka dute: erreforma probestu dezakete enplegu erregulazio espediente (EEE) masiboak zartatzeko inori kontuak eskatu gabe, baita Beasaingo CAFen moduan enpresak etekin galantak baditu ere. Ditxosozko malgusegurtasuna.

Fabrika handiko 869 langile denbora batez etxera bidaltzea derrigorrezkoa dela kontatu digute bertoko kudeatzaileek, “lan karga” falta omen delako. Esaten ez digutena da lanik eza deliberazio osoz eragin duela enpresak, hala uste du behintzat bertoko langile ugarik.

2012ko martxo aldera –lan erreforma espainola onartu ostean– hasi ziren entzuten EEEaren zurrumurruak Oria bazterrean, baina uda osoan inoiz ez bezala aritu dira lanean IV. dibisioan, oporrak tarteko, topera ordu estrak sartzen, baita dibisio horretakoak ez diren langileak ere, vox populi denez. Emaitza jakina da: orain lana falta da.

Zer arraiorekin ari da jolasten zuzendaritza? Bi hipotesi:

1-    CAFek “negozio-lerro” berria hasi du: langileen bizitza laborala du saltzen, diru publikoa erosten. EEEarekin 2,5 milioi euro aurreztuko du langileen kotizazioaren lepotik. Baina merezi al dio aurten 100 milioitik gorako etekinak espero dituen enpresari halako saltsatan sartzea “uskeria” horrengatik? Horrek garamatza pabilioietan zirkulatzen ari den bigarren hipotesira:

2-    Zuzendaritzak aurrekaria jarri nahi du EEE honekin. Enpresa batzordeak dio langileek EEEa onartzen badute, atzetik gehiago etorriko direla, eta azkenik kaleratzeak. Hain justu, CAFeko sindikatuen beldur nagusietakoa da enpresaren deslokalizazioa, batez ere buzoa janzten duten langileen kaltetan.

EAJko ordezkariak CAFeko arduradunekin bilduta hauteskundeetan

Langileek ordezkari bakarra dute enpresako administrazio kontseiluan, akzioen %30ren jabe diren arren. Ordezkari hori gainera, ez da modu asanblearioan aukeratzen, sozietate anonimo bateko (Cartera Social S.A.) barne prozesu ilunetan baizik. Gainerako ordezkarien gehiengoa aurrezki kutxei (BBK, Vital, CAN eta batez ere Kutxa) nolabait loturik egon da azken bi hamarkadetan.

Kutxabank eta CAF, errail bereko bi habe

1991n, CAF hondoa jota zegoenean, erakunde horiek finantzatu zuten lantegia, eta orduan hartu zuen kontrola egungo administrazio kontseilua osatzen duen taldeak, ESK-k berrikitan gogorarazi duen gisan. 2005ean aurrezki kutxen partizipazioa %51 izatera ere heldu zen eta Kutxak beti izan du inbertsio estrategiko gisa trengintzaren negozioa, orain Kutxabankek duen moduan.

Patxi Lopez lehendakaria CAFek Brasilen duen lantegia bisitatzen

Ondo pentsatuta, enpresaren jokabideak logika dauka, Kutxabank tartean dela jakinik. Akaso ez dugu ikusi zein norabide hartzen ari den gure etorkizuneko BBVA berria? Espantsionismora emanak daude. CAFen gertatzen ari dena errail bereko habea baino ez litzateke. Kutxerazoak  badaude… zergatik ez caferazoak?

Hurrengo baterako utziko dugu Kutxanbak-CAFen atzean egon daitezkeen alderdi, filial, erakunde, enpresari eta indar ezkutuen organigrama osatzea…

Sindikatuek neurri ugari jarri dituzte mahai gainean lan karga faltarena soluzionatzeko, baina argi dute EEErik ez dutela negoziatuko. Zuzendaritza, mutu. Langileei geratzen zaiena, beti bezala, mobilizazioak dira. Alde horretatik ez daude egoera txarrenean, baina batasuna behar da hain enpresa handian. Oraingoz lortu dute: presio neurriekin jarraitzearen alde 1.261 langile, kontra 48. Aurrekoan hiru autobuskada joan ziren Beasaina Irungo lantegitik, eta gaur ere lau orduko paroa eta manifa dute. Buzoa jantzita.