Starring… Auzitegi Nazionala

Atalak: Politika

Hernaniar gazteak Madrilen, epaiketa hasi aurretik (Arg.: HGA)

Pablo Ruz epaileak Hernaniko hamar gazteren kontra idatzitako auzipetze autoa (pdf) eskuetan hartzen baduzu, telesail errepikakor batek aspertuko zaitu. Gidoi hori egitea ez da zaila: lehenik, aipatu erregistroetan aurkitutako kamisetak, pinak, etxafuegoak, paskinak –ez ahaztu Txalapartako liburuak– eta abar. Aukeran, “kaptazio” hitza erabiltzeak asko janzten du gidoia. Horri gehitu Gazte Asanblada arriskutsu bat, AHT gisako sigla erakargarriren bat, eta zer arraio!, 1990eko hamarkadako “Y” famosoa ere bai, kutsu retro bat emango dio-eta. Elementu inportanteena, trama guztia askatuko duena, amaierarako utzi: auto-inkulpazioak.

Edozein izan daiteke gaur egun Auzitegi Nazionaleko gidoilari.

Bultzada politikoa duten auzietan gertatu izan den bezala, fiskalak ez du frogarik hamar gazte horiek kale borroka erasoetan parte hartu zutela demostratzeko, ez eta Segiko kide zirela esateko ere. Atzo eta gaur Madrilen epaimahaiaren aurrean ukatu egin dute gazteek Segikoak izatea. Frogarik ezean, perituen hipotesietan eta atxilotuen inkomunikazio aldian egindako deklarazioetan oinarritzen da akusazioa, 7-9 urteko kartzela zigorra eskatzeko. Hernaniko Kronikan oso ondo adierazi dute auzipetuek zein den egoera:

Fiskaltzak informe bat egin du eta informe horrek dauzka bi zati nabarmen: batetik, poliziaren ikerketa, eta ez dute aurkitu froga objetiborik. Bestetik, inkomunikazio ga­rai­an ateratako deklarazioak daude eta hauek ez dute balio juridikorik. Ez dauka besterik. Gainera, ikerketa polizialak egiten dituzte hipotesietan oina­rrituta. Eta nahi duten be­zala sar­tzen zaituzte beraien hipotesietan. Hor sartzen da inkomunikazioaren erabilera.”

Segiren kontrako pertsekuzioak jauzi tamalgarria eman zuen 2007ko urtarrilean, Auzitegi Gorenak “talde terrorista” izendatu eta hainbat lagunen kontrako zigorrak gogortu zituenean. ETAk T-4a lehertu berri zuen eta Loiolako prozesua porrot eginda zegoen jada.

Jurisprudentzia hori eskuan, operazio polizial basatiak egin zituzten hainbat herritan hurrengo urteetan, tartean Hernanin. Guztira 150 lagun atxilotu zituzten Segikoak izatea eta kale erasoak egitea egotzita, kasu batzuetan beste talde eta elkarte batzuk nahasiz gainera. Espainiako Justiziak sarea zabaldu zuen hortaz eta “dena da Segi” esaten hasi zen nolabait. Horrela uler liteke nola amaitu behar izan duten batzuek epaileari esplikatzen Hernaniko Akelarrean parte hartzea ez dela Segiren deabrukeria bat.

Epailearen aurrean Segikoak izatea ukatu dute auzipetuek (Arg.: EFE)

Auzitegi Nazionalari, “dena da ETA” teoriaren garai beroetatik heredatutako auzi korapilatsu batek irrist egiten dio eskuetatik berriz ere; Hernanin 2009ko martxoan egindako operaziotik hona gauzak arras ezberdinak baitira. Segi bera desegin egin da hiru urte iraun duen hausnarketaren ondoren. Egoera labainkorra bihurtzen ari da. Agian horregatik fiskalak jada ez dizkie kale eraso ekintzak leporatzen? Inkomunikazio aldian atxilotuek deklaratutako kale erasoak froga modura erabili nahi ditu, gazteak Segikoak zirela erakusteko, baina ez ditu ekintza zehatz horiengatik zigorrak eskatu. Kuriosoa da.

Dena den, Espainiako Justizia abila da esperpentoak inprobisatzen, horren jakitun dira egunotan Madrilen daudenak. Nolatan daude bestela jarduera armatuaren amaiera ahalbidetu nahi izan zutenak kartzelan?