Oñatiko plataformak aurkitu du

Atalak: Kondarrak

Gaur Diario Vascok plazaratu du Oñatiz: “La plataforma contra el PaP se disuelve por las ‘represalias’ sufridas“. Beranduago Goienak osatu du informazioa. Seguru ondoko egunetan jakingo ditugula Oñatin bizi duten giroari buruzko albiste gehiago, ezagutzeko zer izan diren errepresalia horiek. Gainerakoan, plataformakoek despedidakoan oñatiarrak animatu dituzte Atez Atekoaren kontrako protestan segitzeko, balkoietan zabor zorroak eskegiz. Baina gainera, Atez Atekoaren kontrako argudio berri bat aurkeztu dute.

Irakurri diegu: “Hauxe galdetzen diogu geure buruari: zer egingo ote dute zaborrarekin Atez Atekoa ezartzen ez duten herrietan, besteak beste Donostian, probintziako hondakinen zati nagusietako bat berak sortzen baitu? Santa Klaran bilduko ote dute? Ala Donostian hain… ezberdinak dira eta ez dute sortzen zaborrik?”.

Hain zuzen ere, “zer balio du nik egitea auzokoak egingo ez badu” hori aldaketari uko egiteko argudio klasikoetako bat da. Ez oso kristaua, bai humanoa. Denok ez egitekotan, nik egiteak ez du deusetarako balioko. Egingo nituzke erosketak herriko denda txikietan, baina gero denak hiperrera baldin badoaz… Ni prest nengoke gutxiagorekin bizitzeko Afrikan gehiago eduki dezaten, baina guztiok aldatu beharko genuke. Total, ez duela merezi lehen keinua egiteak.

Ibili-ibilian, Oñatiko plataformak azaldu digu modurik garbienean zergatik ezin duen emaitza hoberik eskaini 5. edukiontzi marroi famatuak: hautazkoa delako.

Izan ARGIAko bazkide: Astekariko harpidedun edo webgunearen laguntzaile.