Elias Kerejeta (oihartzuna)

2013-06-18  //  Iritzia  //  Iruzkinik ez

Ikusten? Azkenean ez da hainbesterako izan. Hernanin ez garela hain jende gaiztoa bizi. E’tzazue guregatik lorik galdu zine aurrerakoiaren zaleok, Hernaniko Kronikak zabaldu duenez “Elias Querejetaren izena jarriko zaio Hernaniko kale edo plaza bati“.

Ez ezkutuko karkaba batean, herriaren fisonomia aldatu duen Txantxilla auzoan baizik. Han omen zegoen Villa Gurutze, zinegile ospetsuaren jaiotetxea. Herrian galdetzen baldin baduzue, Laubidietan, gure aita Balentini zekorrak saltzen zizkioten “Prailia” Lujanbiotarren etxe (eraitsi) inguruan.

Bestalde, “Elias Querejeta, gai sozialak pantaila haundira eraman zituen zinegilea” titulua daraman kronikak dio hasiera aldean: “Elias Querejeta Hernanin jaio zen 1934an. Dirudun familiakoa zen. Bere aita Gipuzkoa­ko Di­pu­tazioko presidentea izan zen frankismo garaian eta Villa Gu­ru­tzen bizi izan ziren, Txan­txi­llan. Kimika eta Zu­zenbidea ika­si zituen eta 18 urterekin lehe­nengo mailan debutatu zu­en Real Sociedad futbol taldearekin…” Horixe besterik ez zela… baina ageri denez, hori guztia.

Hisako Sakiyama doktorearen hitzaldia Fukushimako hondamendiaz (bideoa)

2013-06-17  //  Fukushima  //  Iruzkinik ez

Helen Caldicott mediku australiarrak daukan Nuclear Free Planet fundazioak martxoaren 11 eta 12an antolatu zuen Fukushimako istripua eta bere ondorioak aztertzeko simposiuma. Mundu osotik eramandako adituek han aurkeztutakoen grabazioak edonoren eskueran jarri ditu fundazioak orain Interneten. Lekukotasun garrantzitsuetako batzuk, gainera, frantsesezko azpitituluz aberastu ditu Fukushimari buruzko iturri txit preziatua den Knak bere blogean. Hitzaldi bat da Hisako Sakiyama doktorearena. (gehiago…)

Pedro Grijalbaren azken erreleboa

2013-06-14  //  Iritzia, Kondarrak  //  Iruzkinik ez

Pedro Grijalba kazetariekin. (Argazkia: Hernaniko Kronika)

Hernaniko Kronika egunkariak jakinarazi digu: “Pedro Grijalba hil da, amiantoak eraginda“. 57 urte ez da aski zahar bizia amaitu zaizula onartzeko. Grijalbari lanerako ezintasuna aitortzearekin batera jakinarazi zioten: asbestosiak jota zaude, hilabete gutxiko bizia daukazu. Jesus Uzkudun CCOOko sindikalista historikoak esanik dakigu langile ezkertiarrak erabaki zuela “morir matando“, esan nahi baita bere kasua kontatuz herriari.

(gehiago…)

Elias Kerejetaren semea

2013-06-10  //  Iritzia  //  2 iruzkin

El Pais egunkariaren Semanal gehigarria ez dudan arren aurkitzen Interneten, hartan orain hiruzpalau urte Elias Kerejeta Garateri egin zioten erreportajearen pasarte pare bat ezin ditut ahaztu. Hernaniko bere haurtzaroaz gogoratzean, kontatzen zuen zinearekiko lehen harremana sortu zitzaiola ikusi zuelarik etxeko jardinean barrena aitaren txoferra traste berri baten garraio: ondoko hilabeteetan hainbat filme ikustea ekarriko zion proiektorea zen. Etxe bakar jardindunaz gain autoa eta txoferra zeuzkan aita baten oparia. (gehiago…)

‘Pizti’ Iturbide

2013-06-07  //  Iritzia  //  Iruzkinik ez

Hala deitu beharko genion duela pare bat egun Bilboko Pagasarri aldean hilik aurkitu omen duten Ignacio Iturbide Alkain Piti famatuari. Omen diogu, bera ez bezala herrian errespetatuak diren senideei ez baitie Barne Sailak askoz xehetasun gehiago luzatu. Ez non bizi zen, ez ezkondua ala gabe, ez haurrik bazuenez… Behar handirik ere ez, berrogei urteotan haren albisterik jakin baino ez jakin nahiago zutenentzako, baina Hernanin bart txapelokerrek eraman izan balute gizajoren bat eskuak loturik, honez gero haren zapataren neurria zalapartan iragarriko genuen periodistok.

Non egon da, zertan, nola, Piti Espainiako ultraeskuindarren enkarguz zazpi herritar hil eta beste zenbait zauritzeagatik hamar urtez preso egonda libratu zutenez geroztik? Madrilen jakingo dute, Gervasio Gabirondok ere bai. Biktimen memoriaren propaganda eginez bizimodua ateratzen duten askok ezikusia egin dioten itzaleko mundu horretan asko bizi dira lasai ederrean. Demokraziak derrigorrezkak ditu estolderiak, denon onerako.

Gaur Hernanin familia batek pentsatuko du anaia bat txarra atera zitzaiela, Buruntzaldeko beste zazpi familiatan berriro urratuko zaie galdutako senideak utzi zauri zaharraren orbanak, eta Andres Etxeberriaren azken  anaiak norbaiti entzungo dio baratzean ari dela: “Hi, jakin al duk bere bi lagun hilda Andres zauritu zuen tipoa mendian azaldu dela hilik?”. Lurrean eserita, bastoia eskuetan, omen.

Alferrik bilatuko duzu Piti Iturbideren argazkirik Googlen. Desklasifikatuko dituzte 50 urte barru, komeni bada.

Azkaraten lan, bizi eta borrokatu

2013-06-06  //  Agiñarenak, Iritzia  //  Iruzkinik ez

Inpresionatu naute Azkarateko Erramun senar-emazteek “Transformazioa garatuz, bada bizitzeko manera gure etxaldean” elkarrizketan. Erakusten dute zenbat ahaleginekin biziraunarazi diren gure arteko baserrietatik gehientsuenak.
(gehiago…)

Euskal grebaren jarraian, Europa osoan ‘Blockupy’ ekainaren 1ean

2013-05-30  //  Gizartea, Nazioartea  //  Iruzkinik ez

Maiatzaren 30ekoak ekainaren 1ean izango du bigarren zatia. Hego Euskal Herrian mugimendu sindikalaren zati nagusiak bestelako mugimendu sozial multzo zabalarekin antolatutako grebaren biharamonean, ekainaren 1an murrizketen eta horien kudeatzailea den Troikaren kontrako ekintza eguna dago deituta Europa osoan barrena.
(gehiago…)

Zabor gutxiko herrien UEMA

2013-05-27  //  Kondarrak  //  Iruzkin bat

UEMAk bildu zituen bezala  biztanleen %80 euskalduna duten udalerriak, euskara hutsez funtzionatzeko ahalmenaz gain gogoa zutenak, gisa berean iritsia da hondakinak gaika %80 edo gehiagoz sailkaturik kudeatzen dituzten herrien federazio, mankomunitate edo elkartea antolatzeko unea. Bestela esanda: etxeetan sortutako hondakinen baitako zabor nahasia %20 baino gutxiago izatea egunero lortzen dutenena. Hernanin Zero Zabor taldearen izenean Bego Zuzak egin du proposamena prentsan azaldutako “Ehun ta ehun berrehun… Gora Astiarra!” gutunean: “Ez al da hau une egokia Astigarraga, Hernani, Usurbil, Orendain… errefusa hondakinen %20ra jaistea lortu dugun herrietako udalek elkar hartu eta UEMA berri bat sortzeko? Zaborrak murriztu ditugun herrien UEMA? Hondakinetan ondo ari garen herrion elkartea?”. Katalunian badaukate Atez Ateko udalerrien elkartea. Guk horiekin batera bildu ditzakegu Orendainen ereduari segituz dagoenekoz errefus-hondakina kopuru hori baino gutxiagora jaitsi duten herri txikiak, Sakanan ere badira organiko guztia herritik atera gabe ongarri bilakatuko dutenak. <%20 Zabor Herrien Elkartea… Zero Zabor Udalerrien Federazioa… Zabor Urriko Herrien Mankomunitatea… Fite aurkituko da izena, baldin bada izateko nahia. Elkar ezagutu elkarri laguntzeko (badago zertan) eta Zero Zabor helburuaren bila urrats berriak eman. Laster hurbilduko zaizkigu gehiago eta azkenerako denak, multinazionalek beren nahieran antolatu duten mundua XXI. mendeko krisi handian barnatu ahala.

Oñatiarron burua eta bihotza

2013-05-24  //  Kondarrak  //  Iruzkinik ez

Oñati Zero Zaborren murala

Zubietan errauskailua jarri nahi diguten espekulatzaile ustelen kontrako borrokak eman digu zoria ezagutzeko bestela sekula aurkituko ez genituen gizon eta emakumeak. Oñatiko gazte eta ez hain gazteokin topo egin izana eskertzen diot biziari.

(gehiago…)

Roberto Cavallo (eta 2): Ottavianon mafiari zaborra kendu ziotenekoa

2013-05-22  //  Kondarrak  //  Iruzkinik ez

2010eko martxoan etorri zen Roberto Cavallo Hernanira. Asteburu hartan “Atez Ateko Bilketatik, Zero Zaborrerantz” izeneko jardunaldiak antolatuak genituen Usurbil, Hernani, Urnieta eta Oiartzungo jendeok. Hernanin egun haietan hasi berria zen Atez Ateko bilketarako kuboen banaketa. Hitzaldia eman aurretik, karrikako giroaren maitale, ostatuez gain Atez Atekoaren bulegoa ere erakutsi genion, “Giroa bero daukagu Hernanin” ohartaraziz. Zaborraren inguruko demagogia ez zuten asmatu Zumaiako batzokian.  “Aldiz -kontsolatu gintuen Cavallok- nik giro lasaia atzeman dut bulegoan. Hamaika handiagorik ikusita gaude Italian…”

(gehiago…)