Espainiako Estatuak 45.000 euroko isuna jarri dio EAri ETB ikusteko hedagailua paratzeagatik

Atalak: Hedabideak

Maiorga Ramirezek Espainiako Estatuak ezarritako isuna kritikatu du. Argazkia: Argia.

Eusko Alkartasunak 2012ko urtarrilean paratu zuen hedagailua ETB1 eta ETB2 Lurreko Telebista Digitalaren bidez ikusi ahal izateko, ordura arte analogikoan baino ezin baitziren ikusi. Horren ondorioa da Espainiako Industria, Energia eta Turismo Ministerioaren isuna. 45.000 euro EAri eta 15.000 euro hedagailua jartzen lan egin zuen Ingest enpresari.

Maiorga Ramirez EAko Nafarroako idazkari nagusiak adierazi duenez, Nafarroako Gobernua eta Eusko Jaurlaritza gezurretan dabiltza, arrazoi ekonomikoak erabili baitzituzten ETBren seinaleak LTDz ez zabaltzeko, eta haien ustez afera politikoa da.

Nafarroan ETB3 eta ETBSat baino ezin dira ikusi LTD bidez, eta Nafarroako Gobernua eta Eusko Jaurlaritza harria bata bestearen teilatura boteaz ibili dira, hedagailua nork ordaindu behar duen eztabaidatzen. Haien ustez, ETB1 eta ETB2 LTD bidez ikusteko egin beharreko lanek kostu ekonomiko handia dute. EAko militanteek, iazko urtarrilean 12.000 euro baino gutxiagorekin Erreniegan hedagailua jarri zuten Iruñerrian seinalea jasotzeko moduan, eta haien kalkuluen arabera, 40.000 eurorekin Nafarroa osora helduko litzateke seinalea.

Martxoaren 7an Guardia Zibilak hedagailua zigilatu zuen eta EAk helegitea jarri zuen. Auzia Auzitegi Nazionalean dago.