Euskarak (gaztelaniaz bada ere) balio du ligatzeko
Topaketa lesbianistak izan dira duela gutxi Bizkaiko Dima herrian. Jendaurreko bilkura dezentetan bezala, hizkuntzak nola erabili zehaztu gabe zeukaten. Anekdota kontatu didana mahaian zegoen eserita, aurrean aurpegi asko begira zituela. Aurrez gaztelaniaz arituak ziren hizlariak; berak garbi zeukan euskaraz egingo zuela. Mikroa parean jarri ziotenean galdera hau egin zuen: “Nork ez daki euskaraz?”. Batzu-batzuek besoa jaso zuten, Espainiako Estatutik etorritakoak zeuden. Eta hizlariak horrelako zerbait esan zien: “Nik euskaraz egingo dut hitzaldia. Ea, boluntario euskaldunak behar ditugu euskaraz ez dakitenei itzulpena xuxurlatzeko. Bide batez elkar ezagutuko duzue!”.
Hizlariak bere kabuz hartu zuen horrela egiteko erabakia, antolatzaileei aurrez ezer esan gabe. Kezkatuta geratu zen, zer irudituko ote zitzaien antolatzaileei…
Handik pixka batera antolatzaileak hurbildu zitzaizkion eta: “Ideia bikaina belarrira itzulpena egitea, ligatzeko balio du!”.
7 euskaldun + gaztelania hiztun 1 = 8 gaztelania hiztun formula bete ez dadin, xuxurla bidezko itzulpen-metodoa hainbat forotan probatu dute dagoeneko. Ez dakit ikuspegi linguistikotik emaitzak interesgarriak izan diren ala ez, ezta ligatzeko balio izan duten ala ez. Horrelakoetan zabiltzatenon iritzia eskertuko genuke.
Izan ARGIAko bazkide: astekariko harpidedun edo argia.comen laguntzaile
Zoragarria ekarpena! ikastoletako gurasoen batzarretan, sindikatuetako asanbladetan, portaleko batzarretan… aplikagarria guztiz. Bizi dugun gizarte hotz honetann elkar ezagutzeko aukera emango du seguruenik, eta onenean ligatzeko ere, zergatik ez? eskerrik asko benetan, Onintza, ekarpenagatik (eta aurreko harengatik)
Txalogarria benetan hizlariaren ekimena. Era berean, esanguratsua da hizlaria kezkatuta gelditzea hartutako erabakiarekin. Horra hor hizkuntza minorizatu bateko hiztunen portaera ohikoa. Aurreko hizlariak kezkatuta gelditu al ziren beraien hizkuntza portaerarekin? Ez. Aldiz bertako hizkuntzan hitz egin eta orduan kezka, deserosotasuna… Horregatik baloratu behar dugu hizlari euskaldunak bere beldurrak gainditzea eta euskaraz egiteko hautua egitea gainera irtenbide egingarri bat proposatuta. Euskaldunok euskaraz hitz egiteko ditugun beldurrak gainditzen ditugunean errealitateak erakusten digu gehienetan beldur horiek gure barnean baino ez daudela. Honi buruz gehiago jakin nahi izanez gero hona hemen lotura interesgarria: http://www.telptailerrak.com
Ligatzeko balio duen? Noski, jende berria ezagutzeko ere balio du
Guk gure herriko gaztetxean ere hala funtzionatzen dugu, erdaldun bat egon ohi delako. Ez dut uste horrela asko ligatzen dugunik, baina zuk aipatutako formula matematikoa saihesteko oso baliagarria da!
Halakoez aritzen gara hizketan Info7 irratiko Gureaz Blai saioan, Ainhoa Lasa EMUN kooperatibako kide eta telp tailerretako dinamizatzailea eta biok. Euskaldunok erdaren inposaketaren aurrean izaten ditugun portaerez, konplexuez, aurreiritziez… Hala nahi duenak, gaur 13:00etako albiste boletinaren ondoren izango du Gureaz Blai entzuteko aukera ordu erdiz, Info7 irratian.
Emunen sarritan erabiltzen dugun teknika da xuxurlatzearena, batez ere bileretan eta. Kide euskaldun bat (edo euskara teknikaria zenbait kasutan) kide erdaldunaren ondoan jarri eta bileraren berri ematen dio, labur-labur eta belarrira. Orain arte emaitza nahiko onak lortu ditu martxan jarri den lekuetan eta teknika eraginkorra da ulermen maila ere igotzeko.
Beste bide batzuk ere jorratu eta jorratzen ditugu: adibidez, Konprenitzen ekimena: http://www.lantalan.com/emun/euskara-planeko-helburuetako-bat-da-bileretako-euskararen-erabilera-gehitzea
Txalogarria eta hausarta,batez ere aurreko hizlariek ez badira euskaraz mintzatu.
Nire ustetan,gaizki ulertuak gerta ez daitezen aldez aurretik adostu behar da,baina sarritan urduri jartzen naiz nire jokabidearen azalpena emateko.
Hala ere ezezagunen artean errazagoa iruditzen zait lagun artean baino.