Isidrok eta Manuelek baino ez dute hitz egiten zoque-ayapaneco

Atalak: Hizkuntzak

Manuel Segovia, Zoque-ayapaneco hiztuna.

Isidro Velázquez eta Manuel Segovia Ayapakoak dira, Mexiko hego-ekialdeko Tabasco estatuko biztanleak. Elkarrekin hitz egiten dutenean baino ezin da entzun zoque-ayapaneco hizkuntza; ez dago beste hiztunik haien komunitatean.

Denisse Quintero zinegileak bi aitonak grabatuz dokumentala egin nahi du. Badaki ez duela hizkuntza biziaraziko, baina sikiera, hizkuntza gordeta geratuko da. Badu bestelako esperantza bat ere 28 urteko zinegile gazteak, dokumentala komunitate indigenetan eta nekazaritza guneetan erakutsiko du; haiengan norberaren hizkuntzarekiko kontzientzia piztu nahi du. Haren ustez, komunitate askok bertako kultura gutxiesten eta alboratzen dute, diskriminazioa oso barneratuta dutelako. Ikus-entzunezko lanari Hizkuntza Hila izena jarri dio eta duela pare bat hilabete hasi zen grabatzen.

Manuel Segoviaren semeak, izen berekoak, 30 urte ditu eta hizkuntza ikasten hastea erabaki du. Bost urte dira zoque-ayapaneco ikasten hasi zela eta egunero hainbat orduz aritzen da. Pena du txikitan ikasi ez zuelako. Badaki hiltzear den hizkuntza hau hitz egiteak inguruan ez duela pasiorik eragingo: “Hizkuntza hau hitz egiten duzulako iseka egin edo ezizenak jartzen dizkizute, hizkuntza hori indioek baino ez dutela hitz egiten esaten dizute. Hemen indio hitza, batzuentzat, iraina da, umiliazio sinboloa”.

Mexikon 364 hizkuntza dituzte bizirik, horietarik 21 desagertze bidean.

Informazio gehiago Grace Gálvezen blogean.

Zoque-ayapaneco hizkuntzan idatzitako hitzak.