Guk ere ez dugu paga kobratuko

Atalak: Gizartea

Nagusi den murrizketa politikaren kontrako protesta (Murrizketarik Ez webgunetik).

Gabonetako paga, paga estra, ezohikoa, hamalaurena… Izenak izen, dagokigun soldataren zati hori ez dugu kobratuko aurten Argiako langileok, astekarian aurreratu genuenez. Enpresa publiko, pribatu eta kontzertatuetako behargin asko eta askoren moduan. Funtzionarioen pagak sortu du iskanbila gehien, eta harritu egin nau funtzionario ez den hainbaten erreakzioak: “Guretzat dirurik ez badago, haientzat ere ez”. Eta alderantziz: “Pribatuak pribatu dira eta hor konpon gestio txarra egin badute, baina botere publikoak gu babestu behar gaitu” dioen funtzionarioa. Pozarren irudika ditzaket hondamendi ekonomikoaren erantzule –baina ez biktima– nagusiak, gure artean mutur joka jarrai dezagun desiratzen.

Zatituta nahi gaituzte, eta guk sinetsita daukagu gehiegi omen diren funtzionario alfer horiena dela errua, gure zerbitzuez aprobetxatzen diren etorkinena, “bere ahalbideen gaindi” bizi izan den gizartearena eta hipoteka handiegia sinatu zutenena, neurriz gaineko oporrak dituzten irakasle eta diru-laguntzez bizi diren kultur erakundeena, administrazioaren sosetatik bizi den langabetuarena, guk ordaindutako botiken kontsumitzaile handi diren pentsiodunena, sindikatu abertzaleen mobilizazioekin bat egiten ez duten sindikatu espainiarrena eta Espainiako protestekin bat egiten ez duten sindikatu abertzaleena. Zatituta nahi gaituzte, presio sozial indartsu eta bateratuak etxe desjabetzeak eta enpresetako EREak geratzea lortzen duelako. Benetako etsaiak beste batzuk dira, ordea: iruzurgile aberatsen amnistia fiskala ahalbidetu dutenak, dirudunen mesedetara antolatutako zerga sistema bidegabea aldatu nahi ez dutenak eta ondasun handien gaineko zergaren kontra daudenak, sosik ez dagoela baina azpiegitura burugabe eta erakunde jakinetara diru publiko mordoa bideratzen dutenak, murrizketa murrizketaren atzetik ongizate gizartea suntsitu eta zerbitzu publikoa pribatizatu nahi dutenak, botikak berrordaintzea inposatu eta onartu dutenak, protestak bortizki erreprimitu eta debekatu nahi dituztenak, herritarrei sakrifizioa eskatu eta luxuzko bizimodu, soldata eta dietak dituztenak.

Solidario izateko ere eskatzen digute horiek berek. Eta laguntza sare ugari sortu da han-hemenka, boluntario franko, behar handiena dutenei laguntzeko egitasmo asko. Esanguratsua iruditu zitzaidan EiTBk minbizia duten haurrentzako egindako diru-bilketa kanpainaren emaitza: krisi betean, inoiz baino ekarpen gehiago izan dituzte eta inoiz baino diru gehiago bildu da. Bai, solidarioa da jendartea, baina pazientzia agortzen ari zaio. Eta azkenean, etsaia ondo zehaztu ostean, bat eginik eta elkarrekin, eztanda egingo du.