Erdem Gunduz Taksim plazan bigarren gauean.

Istanbulgo Taksim plazan astelehenean sei orduz zutik egon zen turkiar batek, herrialde osoan protestekin jarraitu nahi duten ehunka lagun inspiratu ditu. Ia hiru astez Gezi parkean eutsi ostean, poliziak indarrez hustu zuen kanpalekua eta, halako batean, biolentziaz beteriko egunen ostean, jendea kalean zutik tinko geratzen hasi da gobernuaren aurkako protesta gisa.

Astelehenean ekin zion protestari Erdem Gunduz izeneko artistak eta ondorengo bideoan ikus daitekeenez, polizia etorri zitzaion, ‘katxeatu’ egin zuten, duin eutsi zion momentuari, ez zen mugitu, grabatuta geratu zen unea, beste sei orduz geratu zen bertan, bideoak sarera salto egin zuen, eta gau hartan bertan 300 bat pertsonak egin zuten bat berarekin. Goizaldeko 2:00etan poliziak atxilotu egin zituen bertatik mugitu nahi ez zutenak. Hurrengo egunean ehunka izan ziren Gunduzek inspiratuta kalera atera eta zutik geratzea erabaki zutenak.

Gunduzen hitzak jaso dituzte BBCn. Protesta egiteko geratzen zitzaion modu bakarra zutik jartzea eta bertan tinko eustea dela dio.

Turkiako protestetan ere sare sozialek garrantzi handia izan dute, batez ere, informazio zuzena eskuratu nahi zuten herritarrek hori lortzeko modua izan dutelako. Joan den astean Info7 irratiko Mundurama saioan gaiari buruzko oso saio interesgarria egin zuten: elkarrizketatuetako batek azaldu zuen herrialdeko hedabide nagusiek protestak zentsuratu zituztela. Gezi parkea gobernuari desafio egiten ari zen jendez beteta zegoen unean, Turkiako CNN katean pinguinoei buruzko dokumental bat botatzen ari zirela, eta hala, pinguinoak zentsuraren sinbolo bihurtu direla.

Zentsura irudikatzen duen pinguinoa, zutik, tinko. Sareko ekintzaileen muntaia.

Twitterren #Duranadam (zutik dagoen gizona) eta #Durankadin (zutik den emakumea) etiketak erabiltzen ari dira.

Albiste hau idazteko orduan, asteazken goizean, 36 bat ordu pasa dira Gunduz lehen aldiz bertan zutik jarri zenetik, Turkiako leku ugaritan jendea zutik dago protestan.

Taksim plazan jendea zutik.

Protestariak Istanbulgo kaleetan zutik, geldi.

Desobedientzia zibilaren indarra

Protesta hau kontraste handia da orain arteko poliziaren jarrerarekin (negar-gasak, tiroak eta tankeetatik ura botatzen ibili dira), baita poliziari erantzun gisa bortizkeria erabili duten manifestarien jarrerarekin ere.

Ekintza erraza da eta edonork egin dezake.

The Guardianeko artikulu honetan Richard Seymour egileak ondorengo analisia egiten du.

Erresistentzia pasiboa ez da soilik neurri sinbolikoa, boterea nahastu egiten du eta bere kalkuluak oker egitera eraman. (…) Gunduzen protestak bi alde ditu, aurre egiten dio botereari eta aldi berean galdera planteatu: Jo egin behar dute? Zergatik? Bera bertan zutik besterik ez dagoen pertsona da. Beraz, bakarrik utzi? Orduan irabazi egiten du, ezta?

Recep Tayip Erdogan lehen ministroak esan du, protestekin jarraitzen badute, kalera militarrak aterako dituela. Hala egiten badu, manifestarien aurkako biolentzia Gobernuaren aurkako nola bihurtu asmatu beharko dute herrialdearen demokratizazioa eskatzen dutenek.

Informazio gehiago:

Argia.com/turkia kanalean, herrialdeari buruz ARGIAn ateartzen dugun informazio guztia.

OccupyGezi mugimenduko irudiak.

Bitxikeria gisa, drone batekin airetik irudiak grabatzen ditu pertsona honek. Gezi parkea jendez beteta zegoela egindako hau gomendagarria da.

Egunon jaun-andreok. EH Bilduko Julen Arzuagak gonbidatuta, Erakunde, Segurtasun eta Justizia Batzordean nago Donostiako AskeGunean gertatu zenari buruzko nire testigantza emateko.

Lehenik eta behin aurkeztu egingo naiz. Lander Arbelaitz naiz, Donostiakoa eta 27 urte ditut. Sei urte daramatzat Argian lanean kazetari gisa. Egun webguneko erredaktore burua naiz. Egunerokoan webgunean aritzen naiz lanean, baina kazetaritza-lanak egitera hainbat lekutara joateko zortea izan dut: Norvegia iparraldean bizi diren samiengana, Estoniara komunitate errusiarraren integrazioa aztertzera, Irlanda Iparraldera hango bake prozesuaren 10. urteurrenean ea bakegintzan nola ari ziren ikustera, Eskoziako azken hauteskundeekin batera independentzia erreferendumari buruzko eztabaida bertatik-bertara ezagutzera, Madrilera M15aren lehen urteurrenean, eta Hegoafrikan ere izan nintzen 3 astez, Apartheida amaitu eta demokrazia ezarri zutenetik 16 urte zeramatzatenean, bertako zuri eta beltzen arteko bizikidetza zertan zen jorratzera, baita gudatik bakerako egin zuten bidea aztertzen ere.

Donostiako AskeGunea

Donostiako AskeGuneari eusteko, gogora dezagun Donostiako 8 gazte espetxeratzeko agindua eman zuela Espainiako Auzitegi Nazionalak Segikoak izatea egotzita. Jarduera politikoa egiteagatik 6 urteko kartzela zigorra ezarri zieten. Epaia atera aurretik, Donostian urte batzuk zeramatzaten gaia lantzen eta azken hilabeteetan bilkura isilak egin zituzten babesa ematen zieten herritarrekin astean behin.

Elkarretaratzea ostegun batean.

Behin epaia atera zenean eta 200 bat pertsonaren babesarekin, Donostiako Boulevardean egindako agerraldian kartzela aginduak hautsi zituzten eta herri harresia antolatzeko deia zuten. Legeak injustutzat jo zituzten eta desobedientzia zibila planteatu zuten. Eraman behar bazituzten, behintzat kostako zitzaiela aldarrikatu zuten.

ARGIA

ARGIAko erredakzioan gaiari buruz hitz egin genuen, eta gaia informatiboki jarraitu behar genuela erabaki genuen. Horretarako, ni denbora guztian eta Axier Lopez lankidea une askotan bertan egotea erabaki genuen.

ARGIAn gazte hauek beren jarduera politiko soilagatik espetxera bidaltzea injustizia dela ikusten dugu batetik; eta bestetik, gaur egun bake prozesu bat behar dugu eta espetxeratzeak oztopo dira aurrera egiteko. Garrantzitsua da bake prozesua bultzatzea, eta guk gure jardun periodistikotik hori bultzatzen dugu.

Gainera, gure komunitatearentzat intereseko gaia zela argi genuen. Balio informatibo handia zuen gertatzen ari zenak. Albistea zen guretzat.

Azken urteotan Interneten apustua indartu dugu eta ikusten dugu, hedabide txikia izan arren, eskura ditugun baliabide murritzekin kazetaritza ezberdina eta bertatik bertara jorratzeko aukera dugula halako gaietan.

Euskal kazetaritzak puntan egon behar duela pentsatzen dugu ARGIAn, eta guk puntan egon nahi dugu.

Gerora, gainera, ikusi dugu erabakia zuzena izan zela, gaiak oihartzun informatibo haundia izan baitu, atzerrian ere atera da, eta egun horietan milaka bisita izan genituen webgunean. Ordutik asko dira gure proiektura hurbildu diren herritarrak eta hori bisitetan nabari da. Uste dut lan profesionala egin genuela, eta jende askok zoriondu gaitu, beraz, ARGIAn pozik gaude.

Egunak aurrera

Egunak joan hala, bola handitzen zihoan. Astebetez ehunka pertsonak babestuta joaten ziren AskeGunean babesa hartzea erabaki zuten 6 pertsonak. Goizero eta gauero etxeetara zutabeak ibili ziren etxeetatik Boulevardera 8:30ean eta 20:30ean buelta.

Hala, Auzitegi Nazionalak 8 gazteok atxilotzeko agindua eman zuenean, polizia beren etxeetara sar zitekeela jakitun, AskeGunean 24 orduko herri harresia antolatu zuten. Momentu horretatik aurrera, hiru egun eta hiru gauez, ni bertan izan nintzen gaia jarraitzen.

Nire lana ARGIAko blogean orduz ordu gertatzen ari zena kontatzea zen. Gauza txikietatik hasita, orduak arinagoak egiteko egunero antolatzen zuten programazioa, zertan ari zen jendea uneoro, zein ziren janaria doan ematen zuten kolektibo, norbanako edo tabernak, ze musikari etorri zen babesa adieraztera, sindikatuak zetozela babesa ematera edo EAJri herri harresiarekin bat egin eta Espainiako lege injustuak betetzera Ertzaintza ez zezatela bidali eskaera, Iñigo Urkulluren erantzunaz informatzea ETBko elkarrizketan eta abar. Baita momentu tentsoagoak ere, bideoan grabatzea Ertzaintza bi aldiz etorri zenean eta herri harresia antolatu lehen aldiz adibidez atxilotu aurreko gauean…

Nire lana publikoa da, 24 orduko jarraipena zen, eta hori jarraitu ahal izan zuen ARGIAko irakurleak webgunean. Hainbat mediok beste alde batera begiratzea erabaki zuten.

Egunez egun Boulevardean gertatzen ari zena dimentsio handia hartzen ari zen. Lehen gauean 200 batek egin zuten bertan lo, bigarrenean 400ek, eta azken arratsean, lotara joan aurretik 2000 pertsonatik gora zegoen AskeGunean, gazteei babesa adierazten. Inork ez zekien zer gertatuko zen. Oso momentu intentsuak ziren eta ni bideoetan hori dokumentatuta uzten saiatu nintzen. Hala, gaua iritsi zen eta goizeko 6:00etan esnatu ginen. Bertan zeuden 800dik gora pertsona.

Azkenean iritsi zen gaua

Hainbeste egun bertan pasa ostean, momentu informatibo gorena iritsi zen, eta bertan nengoen.

AskeGuneko kide bat kopeta irekita Ertzaintzaren kolpe baten ondorioz.

Ertzaintzako 300 bat agente etorri ziren Boulevardera. Inork ez zekien zein jarrerarekin etorriko zen Ertzaintza. Aurreko arratsaldean mikrofonotik gogoratu zuten AskeGuneko lehen egunean Ekaitz Ibero atxilotzera joan zenean Ertzaintza, jendea lurrean eserita egon arren, jarrera bortitza erabili zutela. Horren adibide dira sarean zirkulatu duten hainbat bideo eta argazki, non jendea odoletan ikus daitekeen.

Ertzaintzak megafonotik

Ertzaintza beste jarrera batekin etorri zen apirilaren 19an. Ikusten zen agindu politikoak jaso zituztela, eta hor izango zuen pisurik bertan zegoen kobertura mediatikoak, profesionalak eta herrikoiak. Megafonoarekin etorri zen ertzain bat aginduak ematen, euskaraz eta gaztelaniaz. Gauzak beste modu batera egiteko agindua emana zutela agerikoa zen.

Nik harresia nola antolatu zen, ondoren megafonoko ertzainaren mezua, jendea lurrean eserita nola zegoen, zer giro zegoen… grabatzen aritu nintzen.

Eta desalojoa hasi zenean, hori grabatzera joan nintzen lehen lerrora. Niri inork ez zidan ezer ere esan hor ezin nuela egon, areago, Ertzain batek esan zidan “de aquí no pases” eta bertan hartu nuen nire posizioa, badaezpada ere txartela eskuan nuela, ikus zezaten kazetaria nintzela eta lanean ari nintzela. Bertan egin nuen ez dakit zenbat denbora, lehen lerroan, 10 bat minutu, 15, eta momentuan bertan bideoak grabatu eta YouTubera igotzen ari nintzen. Grabatu, igo eta Twitterretik zabaldu.

Ertzaintzako batzuk nire bila

Lanean ari nintzela, halako batean, Ertzain bat zuzenean ni seinalatzen ikusi nuen, niregana zetorrela. Pauso batzuk eman nituen atzera, eta konturatu nintzenerako gainean nuen. Lehen gauza eskukolpea eman zion nire mugikorrari eta airean bota zidan. Argi ikusten zen ez zuela gertutik grabatzerik nahi. Inongo dudarik gabe adierazpen askatasunaren aurkako erasoa izan zen hau, kazetari txartela agerian nuela ni erditik kentzera etorri baitziren.

Ertzaintzak eragindako markak lepoan.

Nik hor ezin nuen sinestu gertatzen ari zena. Nik momentuan erreakzionatu nuen mobila hartzera joateko, baina berehala lurrera bota ninduten. Lauren artean eusten ninduten, lepotik batek. Nik ez nuen onartzen gertatzen ari zena, eta nire indar guztiekin erresistitu nintzen. Bideoan ikusten da “deja que se canse” nola esaten duten.

Bat-batean, hainbeste egun hor momentu horren zain egon eta gero, bat-batean mugikorrik gabe eta lurrean lau ertzainekin ikusi nintzen. Ez nekien zer nahi zuten, ni kanporatu edo zer, baina ez nuen onartzen. Hala, zutik jarri nindutenean, gertatzen ari zenarekin kezkatuta (gogoratu, nire laneko tresna funtsezkoa mobila zela eta eskuetatik kendu zidatela), nire aurrean ertzain bat nire mobila zapaltzen ari zela ikusi nuen eta nire indar guztiekin lurrera bota nintzen. Bere bota azpitik mugikorra hartzea lortu nuen, eskuan zauri on bat egin nuen, eta hor, nire zorionerako eta nik jakin gabe, grabatzen hasi zen. Dena amaitutakoan Youtubera igo nuen.

Gerora, milaka aldiz ikusi den nire erasoaren bideoa AskeGuneako komunikazioko kideek egin zuten, eta nire mobilaren audioarekin sinkronizatu zuten, etxeetatik grabatu zuten momentuan zer esaten ari ziren argi erakutsiz. Herritar horiei esker iritsi da hau honaino.

Benetan tristea iruditzen zait segurtasun indarretako kide batek “que se muera” esatea gorrotoz beterik ezer egin ez dion pertsona batengatik, hain gratuitoki. Ezin dut ulertu nola gerta daitezkeen gauza hauek. Egitan. Agente horiek ez dakit zer daukaten buruan halakoak egiteko. Ziur nago segurtasun sailburua bera ere lotsatzen dela agente horien jarreraz.

Behin ulertuta ere kazetaria nintzela, astinduekin jarraitu.

Interbentzio hau prestatzen ari nintzela, Twitterren momentuan idatzi nuena aurkitu dut, eta gogoratzen naiz, nik momentu horretan ez nuela inongo protagonismorik nahi, eta paradoja badirudi ere, Ertzainen jarrera ezkutatu zuen lehena ni izan nintzela. Protagonistak herri harresian zeuden horiek izatea nahi nuen. Ez nuen jarri jo nindutenik. Bakarrik Ertzaintza txartela agerian nuela mugikorra kentzen saiatu zela.

Erasoa fisikoaren aipamenik ez.

Hori bai, benetan haserretu nintzen eta ezin nuen sinistu kioskora sartuko gintuztela kazetari guztiak. Gerora kazetari, hedabide eta kazetarien elkarteek salatu dute erabaki hori informazio eskubidearen aurkako neurri gisa.

Kioskotik geneukan ikuspegia oso urruna zen profesional batzuontzat.

Kazetariak kioskoan kaiolan bezala. Onartezina. Ertzaintzaren jarrera gero eta bortitzagoa.

Ni kioskoan egon nintzen gainontzeko kazetariekin batera. Bertan ordu ta piko edo egon nintzen, eta neure begiekin ikusi nuen Donostiako AskeGunearen desalojoa. Lehen esan dudan bezala, hasiera batean Ertzaintza gauzak ezberdin egiteko asmoz etorri zela agerikoa bazen, pixkana pazientzia galtzen joan ziren agenteak, eta horietako batzuk kolpe bajuak eta nahita min egitera nola joaten ziren ikusten nuen nire begiekin. Zenbat eta denbora gehiago pasa, nekea geroz eta handiagoa zen Ertzainen artean. Zenbat eta nukleorago, jendea orduan eta indartsuago heltzen zen elkarri.

Ertzaintzako kide dexente momentu batetik aurrera lurrean eserita zeudenen aurka era oso ageriko batean kolpeka hasi zen. Nik kioskotik jaitsi nahi nuen, ezin nuelako grafikoki ongi dokumentatu, eta eskaileretan zeuden bi agenteei esan nien jaitsi nahi nuela eta ezetz esan zidaten. Nik erabat deskolokatuta nengoen astinduen ostean eta Ertzaintzaren arrazonamendu falta horren aurrean. Argi eta garbi herritarren informazio eskubidea urratzen ari ziren.

Gerora Euskal Kazetarien Elkarteko kideek esan duten bezala, “horrelako neurriak bakarrik justifika daitezke kazetariek poliziaren lana larriki oztopatzen badute, edo beren bizitza arriskuan jartzen badute”. Eta Euskal Kazetarien Elkarteak gogoratzen duenez, “horrelako egoerak gertatzea ia ezinezkoa da kontzentrazio baketsu batean”.

Nire ezintasunean, hanka bat barandaren kanpoan jarri eta bideo bat grabatzen hasi nintzen, behintzat pixka bat gertuago nengoela sentitzeko… eta hala ere sarrerako agentea etortzen zitzaidan eta jarrera harroputzez esan hanka sartzeko, ezin nuela kanpoan eduki eta horrelakoak. Benetan intsultantea zen Ertzainen jarrera egun horretan kazetariontzat.

Hala, bideoak grabatzen aritu nintzen ordubetez, baina geroz eta haserreago nengoen, ez nintzelako ongi egiten ari nire lana. Bertan inguruan zeuden kazetarien artean saiatu nintzen esaten ez genuela onartu behar hor egotea, etika periodistikoagatik, eta denok bertatik atera behar genuela batera. Desobeditu behar genuela jarri ziguten agindu hori. Baina beno, uste dut niri egin zidatena ikusita batzuk eta besteak ez zutelako beharrezkoa ikusten, inork ez zidan kasurik egin.

Kioskotik atera eta harresira salto

Hala, deskribatzea zail den sentimendu batekin, kioskotik atera behar nuela erabaki nuen. Nire aurrean 300 ertzaineko lerroa zegoen, guri bizkarra ematen eta harresira begira, honen inguruan jarrita. Halako batean, neure aurre-aurrean zegoena, 5 bat metrora zegoena, bat-batean furgonetara joan zen eta zuloa geratu zen biren artean. Banekienez kioskotik jaisten eta harrapatzen baninduten gaizki bukatuko nuela. Pentsatu nuen neure lana libre egiten utziko zidaten leku bakarra harresiaren barruan zela, eta gainera, nik bertatik bertara erakutsi nahi nuela gertatzen ari zena. Ematen ari ziren kolpeak benetan dokumentatu behar genituela sentitzen nuen eta denbora aurrera zihoala. Harresian jarri zen eta kolpeak jasotzen ari zen jende horrek gugandik espero zuela hori ongi dokumentatuko genuela gerora salatzeko.

Besoa lotuta Berriako elkarrizketan. (Arg: Berria)

Hala, kioskotik jaitsi nintzen salto batean, ahal nuen azkarren korrika joan, agenteen artetik pasa eta jendearen gainera bota nintzen. Ertzainek ez zuten erreakzionatu beren ondotik pasatzean eta barruan erori nintzen, bosgarren lerroan edo esan didatenez, jendearen gainera. Nik ez ditut oso ongi gogoratzen une hauek, eta gainera, momentu horretan sorbalda atera zitzaidan. Hau esaten dut, egiari zor, gerora Berrian egin zidaten elkarrizketa digitalean ospitalean besoan jarri zidaten kabestrilloarekin atera nintzelako, eta jende askok pentsatu duelako hori Ertzaintzak egin zidala.

Ez, erori nintzen momentuan sorbalda atera zitzaidan. Nire obsesioa momentu horretan barnetik grabatzea zen, bertatik bertara erakustea eta YouTubera igotzea etxetik jarraitzen ari ziren horiei zer ari zen gertatzen. Eta hala, ondoan seko harrituta zegoen Gernikako mutil batek lagunduta, bideo pare bat igo genituen. 10 bat minutu ostean, sorbalda sartu nuen bertako batzuen laguntzaz, ya zutik jarri nintzen erakusteko kazetaria nintzela, ez manifestaria, eta bertatik grabatu nituen azken 20 minutuak.

Ertzain gehienak, amaierarako erabat deskontrolatuta zeuden. Nire begiekin ikusi nuen. Jendeari begietatik, belarrietatik behatzak sartzen zizkioten. Kolpeak ere ematen zituzten, mina egitera joaten ari ziren asko. Nik ez nuen momentuan entzun, baina neskari dexentek komentario matxistak egin zizkieten. Eta jendeak, momentu tentso-tentso horietan, lurrean eutsi zion inongo kolperik itzuli gabe. 800 pertsona horiek desobedientzia zibila era masibo batean praktikara eramaten asmatu zuten eta Ertzaintzaren jarrera ez zen eredugarria izan. Ikusi bideo hau 1:45etik 8:00 minutura.

Hurrengo egunean hainbat politikarik esan zuten, segurtasun sailburu Estefania Beltran de Herediak adibidez, Ertzaintzaren jarrera eredugarria izan zela, ni manifestaria nintzela eta ni beste guztiak bezala atera nindutela.

Grabatzea nahi ez zuten bideo horietan argi geratzen da ezetz, lurrean eserita zegoen jendearen aurka biolentzia erabili zutela. Ni ez nintzen manifestaria, kazetari txartela erakusten ari nintzen eta hasiera-hasieratik hala identifikatua nengoen. Nire lana publikoa da eta ikus daiteke lanean ari nintzela. Eta erasotu nindutenean ere denbora guztian kazetaria nintzela esaten nuen barru-barrutik. Eta denak bezala atera nindutela? Jo dezagun ez zekitela ni kazetaria nintzela, ez zirela joan niri kamera kentzera eta beste guztiak bezala tratatu nindutela manifestaria nintzela uste zutelako. Horri erantzun nahi diot, Ertzaintzak ez duela inongo herritarrik horrela tratatzeko eskubiderik. Ez kazetaria izan ez manifestaria.

Neurriak hartu behar dira

Niri egin zidatenak ez du justifikaziorik eta informatzeko eskubideari horrelako erasoa egitea ez da onargarria XXI. mendeko zuzenbide estatu batean.

Estefania Beltran de Herediak esan berri du Ertzaintzaren funtzioa “gure herriaren segurtasun sentipena areagotzea” dela. “Gizartearekin bat datorren polizia integrala da Ertzaintza, bakea eta elkarbizitza sustatuko duen polizia. Herritarron ongizatea eta segurtasuna bermatuko duen Ertzaintza egingo dugu”.

Baina hemen arazo handi bat daukagu Ertzaintzako kideek duten zigorgabetasun edo inpunitatearekin.

Ni erasotu nindutenak nor dira? Zer egin dezaket nik? Nirea bezalako bideoa grabatuta izateko zorterik ez duten herritarrek zer egin behar dute, norengana jo, funtzionario publiko hauen gehiegikeriak pairatzen badituzte? Orain bertan, ezin dugu ezer egin. Eta nik lehen pertsonan kontatzen dizut jende askok daukan sentimendua Ertzaintzarekiko.

Gainera, nire kasura etorrita, zer esan segurtasun sailburua bera ere, barkamena eskatu beharrean, ni manifestaria nintzela eta beste guztiak bezala atera nindutela esanez ateratzen bada nirekin harremanetan jarri ere egin aurretik. Benetan uste dut politikari zintzo eta arduratsu batek beste jarrera bat hartu behar lukeela. Autokritika egiten ere jakin behar du segurtasun sailburuak, zilegitasuna irabaziko luke.

Halere, iruditzen zait aurrera egin behar dugula, eta herri hau aurrera egiteko gogoz dagoela. Euskal Herrian garai politiko berriak bizi ditugula ukaezina da, horregatik Ertzaintzak ere indar polizial bezala, aurrera egin behar duela sinisten dugu askok.

Joan den ekainaren 5ean Ertzaintzako 9 agente saritu dituzte Arkauten. Banku lapurretak saihestu dituzte bik, emakumeen aurkako erasoak beste bik, herritarrak salbatzeagatik hiru (uretatik konortea galduta zegoen jendea atera eta masajearekin berpizteagatik) eta beste bik beren buruaz beste egin behar zuten pertsonak in extremis salbatzen. Horietatik asko gainera beren lan orduetatik kanpo harrapatu zituen gertaerak, eta jarrera ezin eredugarriagoa izan zutelako saritu dituzte, batzuk gainera zaurituta bukatu dute. Ziur nago, ertzain hauek berak adibidez, edo anonimoan lana duin egiten pasatzen diren beste askok, lotsaz ikusten dituztela denen izena zikintzen duten agenteak. Seguru nago. Ni kazetaritza modu manipulatuan lotsarik gabe erabiltzen duten kazetariekin lotsatzen naizen bezala.

Neurriak barrura eta kanpora begira

Hau konpontzeko, barnera begira lan egin beharko da gogor, gorrototik lan egiten duten agente horiek identifikatu eta zuzentzeko, edo bestela kaleratzeko. Ez dadila berriz sekula gertatu inpunitatez astakeriak egiterik, nire kasuan bezala, edo askoz larriagoa, Iñigo Cabacasen kasuan bezala, bi kasu aipatzearren. Esan bezala, pentsatzen dut Ertzaintzan ere jende askok eskertuko duela barnera begira neurri batzuk hartzea.

Eta horrez gain, eta bigarren puntu gisa, nahita nahiezkoa da herritarrei begira ere neurriak hartzea, benetan ikus dezagun Jaurlaritza honek garai berrietara egokitzeko gogoa duela. Ez duela halako praktikak egiten dituzten agenteak ezkutatzen jarraitu nahi, eta beraz, modu oso garbian konplize izan. Berea baita ardura politikoa, eta hori garbi eduki behar dugu.

Horretarako gauza asko egin litezke eta munduko herrialde askotan adibide onak aurki daitezke. Abiapuntu gisara, neurri zehatz bat exijitu nahi diot Eusko Jaurlaritza honi. Ertzainak identifikatuta joan daitezela argi eta garbi. Ez naiz esaten ari aurpegia agerian joan behar dutenik, –izan litekeela, ez badute ezer ezkutatzeko eta jada ez dago borroka armatuaren aitzakiarik–, esaten ari naiz behintzat denok ikusteko moduan zenbaki edo kode bat eraman dezatela sorbaldan, bizkarrean edo kaskoan.

Hau ez da nire ideia bat. Hainbat herritan aplikatzen da eta baita Espainiako 13/2007 instrukzioak ere, poliziak identifikatuta joan behar direla dio. Hemen adibide batzuk ditut. Estonian nire begiekin ikusi nuen kaskoetan zenbakiak zeramatzatela eta paparrean izen abizenak.

Kaskoetan dituzte zenbakiak Estoniako poliziek, baita izen abizenak paparrean ere.

Saretik atera dut Alemaniako hau.

Alemaniako polizia, bizkarrean identifikazioa duela.

Hau Suediako polizia.

Suediako polizia, kaskoan erreferentzia dutela.

Eta hau Norvegiako poliziaren argazkia da.

Norvegiako polizia.

Noizbait agenteren batek herritarrekin jarrera desegokiak baditu, biktimak esan ahal izango du “123″ zenbakiak jo zuela, eta erraz identifikatu ahal izango da nor izan den, Ertzaintza barruan ere ikerketa egin eta neurriak hartu behar badira, hartzeko. Imajinatu Cabacas auzian Ertzainek kaskoan zenbakia eraman izan balute, oso erraza izango lukete Ertzaintza barruan nor izan den identifikatzea.

Herritarrak askoz seguruago sentituko lirateke Ertzaintzarekin. Ez egin inongo dudarik.

Lehen neurri horrekin Jaurlaritza honek pauso handi bat emango luke. Garai berrietan bizi gara eta aurrera egin nahi dugu. Hitzetatik ekintzetara pasatzeko momentua da. Ertzaintzaren birmoldaketan dioena zintzoki esaten badu, eta hala dela sinistu nahi dut, espero dut Jaurlaritzak ahalik eta azkarren identifikatuko dituela Ertzainak eta ez duela inpunitaterako zirrikiturik utziko hemendik aurrerako agerraldietan.

Eta ez badu etorkizun hurbil batean halako neurririk hartzen, agerian geratuko litzateke poliziaren gehiegikeriekin amaitzeko borondate politiko falta lukeela.

Sinistu nahi dut Jaurlaritzak ez duela beste alde batera begiratuko eta pauso bat emango duela aurrera, elkarbizitzaren alde.

FLNCko kideak artxiboko irudi batean.

Korsikaren independentzia aldarrikatzen duen FLNC erakundeak oharra bidali dio Frantziako Estatuari: Berriz ere armak hartzeko prest dira Estatuaren aurka. Corse Matin egunkarira bidali dute sei orriko agiria, Manuel Valls Barne Ministroa uhartean zela baliatuz.

“Ez dugu sekula halako kaos egoerarik ezagutu. Langile duinak mehatxatu egiten dituzte, beren lanabesak eta beren bizitzak askotan suntsitu. Gizon eta emakumeak arrazoi ilunak tarteko hiltzen ari dira, edozein dela ere beren funtzioa. Zigorgabetasun osoz ari dira eraso egiten hemengo enpresariei, emakumeei, abokatuei, hautetsiei eta langileei”.

Pintaketak seinaleetan, Kortsikako uhartean oso zabalduta dagoen praktika. (Arg: Skender/Flickr)

Frantsesez idatzitako agirian diote azken urteetan borroka armatuaren intentsitatea murriztu dutela, baina ea zein den Frantziaren partetik jasotako erantzuna. Uhartean dauden mafia sareak mugimendu korsikarra desagerrarazteko helburuarekin Frantziako estatuak bultzatu dituztela uste dute. Frantziak azken 200 urteetan korsikarrenganako izan duen jarrera kolonialista ere etengabe salatu dute komunikatuan.

Vallsek, agiria idatzi aurreko egunetan korsikar hizkuntzaren ofizialtasuna ez zutela onartuko esan zuen. Abertzale korsikarren eskaera historikoa da hori. Erantzun gisa, Corsica Libera alderdiko kideek ministroari ongietorririk ez egiteko aldarrikatu zuten, Corsica Infurmazione gunean irakur daitekeenez.

“Valls maisua da dena nahasten, beti bezala maila berean jartzen baititu hilketa beldurgarriak eta demokrazia guztietan lekua duten manifestazioak. 40 urtean bere aurreko guztiak bezala, (…) autoritate ekonomikoaren menpe dago eta jendearen benetako arazoak saihesten ditu. (…) Korsikarren gehiengoak babestutako gure hizkuntzaren estatutu ofizialaren aurka Manuel Vallsek egindako adierazpenak betiko leloa dira. Badakigu ministroaren bisitak ez duela ezer berririk ekarriko eta Corsica Liberako kideok harrera inutil honetan ez dugu parte hartuko”.

FLNC ofizialki 1976an sortu zen eta Korsikaren independentzia aldarrikatzen du. Erakunde honen erasorik ohikoenak uharteko higiezin-enpresen interesen eta estatuaren aparatu ofizialen aurkakoak izan dira. Hemen ikus daiteke urtez urte egindako erasoen zerrenda. Guztira 9 heriotza eragin dituztela irakur daiteke Wikipedian. 2012ko uztailetik ez zuten atentaturik egin. Orduan ere, udatiarrentzat eraikitako hainbat bigarren etxeen aurkako erasoak egin zituen.

Etxe baten aurkako erasoa, 2012ko uztailean.

“Frantziak gure herriaren suntsiketan rol aktiboan jarraitzen du oraindik. Horregatik, edo neurriak hartzen ditu Korsikan bi mende eta erdiz egiten ari den kudeaketa penagarriaren eraginak konpontzeko edo bestela, armak hartuko ditugu berriz ere Frantziak gure eskubide nazionalak onar ditzan”, adierazi dute.

“Corsica Libera” pintaketak Corti herrian. (Arg: L. Arbelaitz)

Informazio gehiago:

FLNC eta Korsikako abertzaletasunaren historia era eskematiko batean azalduta.

Joan den maiatzean ikusi zuen argia FLNCko kide izandakoak elkarrizketatuz egindako dokumental honek. Osorik ikus daiteke frantsesez.

Bideo honetan Ander Arresek ekainaren 8an Irungo Ficobara joateko deia zabaldu du: “Egungo egoera aprobetxatu behar dugu erabakitze eskubidearen alde egiteko, bestela uhin hori galdu egingo dugula uste dugu”.

Zelai Nikolas juristak ere hitza hartzen du Eskoziak 2014an  independentzia erreferenduma egingo duela gogora ekartzeko, baita Katalunian urte berean galdeketa egin nahi dutela ere. Horrez gain, Groenlandian, Quebecen eta Flandrian antzeko prozesuak bultzatzen ari dira eta euren asmoa Euskal Herria halako dinamika batean sartzea izango da.

Nazioen Mundua-ko Angel Oiarbide eta Ander Arresek ere hartu zuten hitza ekimenaren aurkezpenean, baita Kirmen Uribe idazleak ere. Horrez gain, Etxarri-Aranatz, Goierri, Errenteria, Mungia eta Berrizen erabakitze eskubidearen alde sortutako taldeetako kideak izan ziren bertan, beste hainbat pertsona ezagunek lagunduta.

Webgunean ekimena azaldu dute Antolatu dezagun herri komunikazioa izenburupean. Bertatik aterea da ondorengo paragrafoa:

“Badakigu hurrengoko #HerriHarresia Iruñerrian izango dela. Hortaz, gu komunikazio  munduan lanean gabiltzan heinean, parte hartze aktiboa izan beharko genukeela uste dugu. Honela, Aske Gunean komunikazioa indartuko dugu, gurekin batera bertan  lanetan ari direnak laguntzen ditugun bitartean: bideoen muntaia egiten, argazkiak ateratzen, bideoak grabatzen, artikuluak idazten, sare sozialetatik mezua zabaltzen, etab”.

Laguntzeko prest dagoen jendeari herrikomunikazioa@gmail.com helbidera mezu bat bidaltzeko eskatu diote. Blogaz gain, Facebookeko orria ere prestatu dute, eta Twitterren #saretuz etiketa erabiltzen ari dira gaiaz informatzeko.

Yolngu herriko kide den neskatoa eguzkiaz eta itsasoaz gozatzen, ipar Australiako kostaldean.

National Geographic aldizkarian Australiako aborigenei buruzko foto erreportaje ederra egin dute. Uhartean 50.000 urtez bizitu arren, egun Australiako biztanleen %3 baino gutxiago dira. Beren kultura, bizimodua eta mundu ikuskera pixkana desagertzen ari dira. Hala ere, egun oraindik eusten diote eta argazkiok horren froga dira. Amy Toensing-en lana.

Martin Luther King eskubide zibilen aldeko borrokan.

Desobedientzia zibilaz eta indarkeriarik gabeko borrokaz jardun dira Papeles de relaciones ecosociales y cambio global aldizkariaren 120. zenbakian Sabino Ormazabalekin. Elkarrizketa sakona eta interesgarria da, PDFan 11 orrialdekoa. Hainbat gai ukitu dituzte: Euskal Herriko desobedientziaren historia, borroka armatuaren eragina, Joxemi Zumalabe Fundazioa, 18/98 makrosumarioa, kartzela, Indarkeriarik gabeko 500 ekintza, historia kontatzeko beste modu bat liburua, Ziztadak dokumentala (hemen osorik ikusgai), Sufrimenduaren Mapa (osatugabea) liburua…

Erantzunetako bat ekarri nahi izan dut hona, desobedientzia zibilari buruzko eztabaidak protagonismoa hartu duen honetan, gaian sakontzeko lagunduko duelakoan. Elkarrizketa osoa hemen irakur daiteke. José Luis Fernández Casadevantek elkarrizketatu du Ormazabal.

“Legearen mugekin bakarrik funtzionatu izan bagenu, gizateria ez zen egungo egoerara iritsiko. Herritarren kopuru adierazgarri batek legalitatearen muga gainditu duenean gertatu izan dira jendartean aurrerakuntza asko. Baliteke ez izatea legalak aldaketa sozialerako ekimen asko, baina bai legitimo eta nahitaezkoak aurrera egiteko, gizartearen ongizatea bilatzen badute eta ez diruzalekeria pertsonala.

Sabino Ormazabal (Arg: Dani Blanco)

Argi dago, horrek arriskuak dakartza, sufrimendua, isuna, kolpeak, atxiloketak, espetxe zigor posibleak… edo zerbait okerragoa ere bai. Baina aldi berean jendea hezi eta erreferentziak sortzen ditu, jarraitzeko adibideak, erakarpen mimetikoa bultzatu, elkartasuna, ilusioa, errespetua, koherentzia… gainontzekoak interpelatzen ditu, konprometitu egiten du jendea. Ekimen batzuek beren helburuak lortzen dituzte edo hauen parte bat behintzat. Aldatzea ezinezko ziruditen egoerak moldatzen dira. Hala ere, desobedientzia zibila ez da panazea ere, eta badaude horren adibideak, Agadym Izikeko kanpamenduko esperientzia adibidez, Al Aaiunen, militar marokoarrek suntsitu egin zuten eta sarraskia eragin zuten herritar sahararrekin (hildakoak, desagertuak, torturak…).

SAT andaluziarreko jendeak (eta aurretik SOCekoak) urteak daramatza desobedientzia zibilaren bidea jorratzen eta beren ahotsa entzutea lortu dute INEMeko bulegoak, bankuak eta landu gabeko lur sailak okupatu dituzte, merkatalgune handietako elikagaiak sinbolikoki expropiatu dituzte Ecijan (Sevilla) eta Arcos de la Fronteran (Cadiz), gero ondoren beharra duen jendearen artean banatzeko, baita ekintza horiengatik autoinkulpazio mordoa bultzatuz ere. Behin eta berriz esaten dute, iraupen luzeko lasterketa batean murgilduta daude.

Prozesua bera gauzarik garrantzitsuena dela baloratzen badugu, bidea, erabilitako medioak, gatazkak jorratzeko modua eta bere humanizazioa, imajinazioa, konstantzia… desobedientzia zibilaren ekintza ez biolentoa pedagogia hutsa da. Berau asumitzen duenak ez ditu bidean galdu nahi ekintza egitera bultzatu duten printzipioak, ez ditu etorkizun mugagabe baterako utzi nahi. Ez ditu irainduta sentiarazten duten eta aldatu nahi lituzkeen balore eta metodo horiek imitatu nahi. Ardurak ere ez ditu delegatzen. Ekintza txikietatik eta eguneroko keinuetatik abia daiteke borroka, baina ekintza guztiak elkarrekin batzea da asmoa. Hori lortzen den egunean, iritzi publikoan atzera bueltarik ez duen birusa sartua izango da. Desobedientzia zibila oraina da, baina batez ere, etorkizuna”.

Esan bezala, elkarrizketa osoa arras interesgarria da eta hemen irakur daiteke, gaztelaniaz.

Axier Lopez lankideak Begizta blogean gaur goizaldeko bideoen bilduma egin du. Naiz.info-ko bideo hau ere landuta dago, Turrune Ondarruko hedabide lokalak ere egin du bat, eta Info7ko kideek ere goizean zehar bildutako korte onenekin laburpena egin dute.

16:00 Iñigo Urkulluk Ertzaintza zoriondu du eta esan du operazioa “eredugarria” izan dela. garestia izan dela eta ezker abertzalea “alferrik giroa tentsatzen” ari dela.

12:00 Prentsaurrekoa egin dute zubiaren aurrean. “Herri harresiak Donostiatik Ondarroara bezala, orain Euskal Herri osora zabaldu behar dira”, esan du AskeGuneko kide batek.

11:00 Estefania Beltran de Heredia Segurtasun sailburuak Radio Euskadin adierazi du “harro” dagoela Ertzaintza bezalako talde bateko buru izateagatik. Ertzaintzak “harresian zeuden pertsona guztien segurtasuna” bermatu duela gaineratu du.

10:30 Zubi harresia amaitu eta berehala egin duten balorazioa. Txaloak Urtzarentzat, bertaratu diren guztientzat, Etxaburu porra eskuan, Lekittarrak elkartasuna adierazten…

10:00 Eraman dute Urtza Alkorta arrastaka, jendearen txalo eta oihu artean.

12 minutuko bideo hau grabatu dut, Urtza Alkorta atxilotu duten unea bertan jasota geratzen da. Tentsioa asko igo da uneotan, eta bere atzean zegoen jendea aurrerantz etorri da. Ertzainek porrekin kolpe batzuk eman dituzte, baina bi aldeetatik ez zegoen borrokan amaitzeko asmorik.

Mikel Etxaburu eta Urtza Alkorta elkar agurtzen:

Mikel Etxaburu eta Urtza Alkorta elkar agurtzen (Arg: L.A.)

09:45Erlantz, Urtza Alkortaren neba jipoitzen. Axier Lopezek grabatua.

Ertzainak pixkana aurrera egiten zubian. (Arg: L.A.)

09:30Zubiaren erditik atzera dagoen jende guztia zutik. Tentsioa. Urtza Alkorta zutik jarri da eta Ertzaintzari bere indarkeriazko tratuagatik kargu hartu diola erakusten du bideoak.

Ertzaintza pixkana zubia hustutzen.

09:15 Ertzainak eskaileretan gora igo dira.

08:57 Eskailerak igota, zubian goian ertzainak desalojoa.

08:34 Ertzainak Maribi Ugartebururi hurrengoa bera atxilotuko duela. EH Bildu Legebiltzarraren bideoa.

08:15 Ertzaintzako agente batzuei ikusten zaie gauzak ongi egiteko gogoa. Beste batzuei ez. Bideo honetan Beñat Apalategi, Donostiako AskeGunean ibilitakoa eraman duten unean. Apalategik erresistentzia handia jarri du eta arrastaka zeramatenean ere barandari heltzen zion. Azkenean atxilotu egin dute.

Belaunikada eman dio mutil honi Ertzain batek. (Arg: AskeGuneak igota)

Airean zeramaten pertsona bat lurrera bota dute. Jendea berotzen. Aginduak ematen dituen agenteak eskaileretan dauden lehenei: “vais a salir sí o sí”. Tentsioa gora, lehenengoa arrastaka eskailera pare bat behera. Porrarekin barandari eutsitako eskuan kolpeak lehen aldiz. Bosnaka igotzen ari dira agenteak banaka jendea ateratzeko.

7:50etan panorama. Argazkia Axier Lopez.

07:50 Zubi harresiaren erdian Urtza Alkorta irribarretsu (argazkia: @GotorlekuMikel). Jendea “Harro hadi Kantauri itsasoa” kantari, olatuarena egiten… umorea ez dute galdu. Karpan jendea botatzen hasi dira.

Zubi txuriaren azpian lantxak ikusi ditugu. Argazkia Maite Bidartek zabaldu du.

Zubi harresia, argazki panoramikoa (Arg: L.A.)

07:05 Sare sozialetan mugimendu handia dago. #ResistUrtza etiketa proposatu dute eta Twitterren Trending Topic 10 hitzik erabilienen zerrendan sartu da. Atzo #ResistOndarru ere sartu zen. Honelako gauzek gai batera arreta erakartzen laguntzen dute.

#ResistUrtza TT zerrendan

07:00 Zubi harresia barrutik horrelakoa da. Ertzaintza Alamedako kazetariei zuzendu zaie, non egon daitezkeen eta non ez esanaz. Horietako batzuei karnetak eskatu dizkiete. Zubi harresi barruan hainbat kazetari gaude. Zutik egongo gara, ez gara manifestariak, lanean ari gara. Ixiltasuna egin eta ertzaina megafonotik aginduak ematen hasten den bakoitzean jendea oihuka hasten da. Zubitik ez da zer dioen entzuten.

Herri harresia osatu berri. Argazkia: Ion Telleria

06:45 Zubi harresia osatu da. Urtza Alkorta erdian jarri da eta zubian kabitu ezin beste herritar inguruan. Bideoa: Lander Arbelaitz.

05:30 Turruna jo dute eta AskeGuneakoei oharrak eman dizkiete: Ertzaintza Iurretatik atera da eta Markinatik pasatakoan etxafuegoak botako dituzte. Zubi harresia osatzeko prest.

05:00 Aurreko gaueko asanbladan erabaki da goizeko 5:00etan esnatuko dela jende guztia. Ustez 6:00etan etorriko da ertzaintza. Ion Telleriaren argazkiak erakusten duenez, Unai Urruzuno eta Laura Mintegi tartean dira.

Urruzuno eta Mintegi zubiaren sarreran (Arg: I. Telleria)

00:10 Jende bat lotara joan da. Beste asko esna.

^^ Hemendik gora maiatzak 15, asteazkena ^^

23:00 Asanblada egin dute. Bihar goizeko 5:00etan esnatzea erabaki dute. Zubi harresia osatzeko orduan nola jokatu irizpideak ere argitu dituzte: borroka baketsua da eta ez dute onartuko inork bortxakeriarik erabiltzea. Komisaldegian identifikatuko dira.

21:15 Jendea ari da Ondarroara etortzen. Jenderik gehien izango den gaua da gaurkoa.

21:00 Antton eta Miren Amuriza bertsotan.

20:10 Gelditu du euria.

20:00 Euria hasi du gogor, denak karpan sartzen dira. Bertan dantzan ari dira. Jon Gurrutxaga kantuan.

19:10 Itziarren Semeak taldearen kontzertua.

19:00 Urtza Alkortaren hitzak ekitaldiaren amaieran. “Ezin dugu onartu beste euskal herritarrik atxilotzea arrazoi politikoengatik”.

Ion Telleriaren bideoan ikus daiteke nola bete den zubia.

14:00 Bazkaria.

Adin guztietako jendea elkarrekin AskeGunean (Arg: L.A.)

13:30 AskeGuneko kideek esan digutenez, hedabide espainiarrek jakinarazi diete gaur goizalean 6:00ak bueltan etorriko da Ertzaintza Urtza Alkorta atxilotzera. “Euskal herritarrei dei egiten diegu etor daitezen”, esan digute.

13:15 Karpa montatzen hasi dira AskeGunean. Gaur euria dator pronostikoen arabera, eta bertara lotara datozenentzat gunea prestatzen ari dira.

12:10 Arratsaldeko kontzentraziora arrantzalez jantzita etortzeko dei egin dute. Itxuraz lasaitu da giroa, baina tentsio handia dago.

12:00 Programarekin jarraituko dute. DJ Bull giroa lasaitzeko.

DJ Bulli giroa lasaitzea tokatuko zaio. (Arg: Ion Telleria)

11:25 Urtza alkortak hartu du mikrofonoa. Esker oneko hitzak izan ditu (ez da bideoan grabatuta geratu, hasiera zelako) eta nabarmendu nahi izan du, egunotako gertaerak Ondarroako zubi honen inguruan gertatzen ari badira ere, ez dela Ondarroako herri harresia, Euskal Herriko herri harresia baizik. Ondarroakoa ez den jende asko ari da bertan parte hartzen.

11:10 Bi aldeetako eskailerak hartuta daude. Urtza babesteko zubia defendatu nahi dute eta ertzaintzari bidea blokeatzea da asmoa.

Eskailerak hartuta (Arg: L.A.)

11:05 Zubi harresi honen eta Donostiako herri harresiaren arteko ezberdintasun agerietako bat, formatoaz gain, partehartzaileen adinarena da. Ondarroan gazteez gain, jende heldu dexente dago. Adinekorik ere bada.

Adin guztietako jendea (Arg: L.A.)

10:58 Markinatik ez dute baieztatu furgonetak pasa direnik.

10:55 Jendea “Arro hadi Kantauri itsasoa” kantatzen ari da zubian.

10:50Urtza lekua hartuta.

Urtza Alkorta eta herritarrak esertzen (Arg: L.A.)

10:50 Beste bideo bat.

10:40 Adin guztietako jendea igo da zubira. Ondorengo bideo honetan ikus daiteke nola esaten dien Alkortak adineko batzuei jaisteko, eta hauek uko egiten diote eta aurrera jarraitzen dute.

Adin guztietako jendea (Arg: L.A.)

10:30 Sirena hotsak Ondarroan. Iurretatik Ertzaintzaren zortzi furgoneta ikusi dituzte ateratzen. Ondarroara badatoz, baliteke Urtza Alkorta atxilotzen saiatzea.

10:00 Eguneko programa jakinarazi dute: 11:00 kontzentrazioa, 12:30tan DJ Bull, 14:00 bazkaria, 16:00 Palestinari buruzko hitzaldia, 17:30 bakarrizketa, 22:00 Antton.

08:30 Gaua bertan pasa duen jende dexente badoa beren zereginetara. AskeGunea hustu da nolabait eta horrek antolatzaileen kezka sortzen du.

08:10 Eguraldi goibela dago eta euria egingo duela dirudi. Urtza Alkorta gertukoekin hizketan.

Alkorta lagunekin hizketan, kezka aurpegiak. (Arg: L.A.)

07:15 Alarma faltsua. Furgoneta bat basera sartu da. Eta beste bien baieztapenik ez da. Txaloak.

07:00 Jendea esnatzen ari zela, abisua. Furgoneten mugimendua detektatu dute hainbat errepidetan eta harresia osatu dute. Turrunik ez dute jo.

Zubi harresia (Arg: L.A.)

Zubia jendez beteta geratu da (Arg: L.A.)

05:00 Bi furgonetak bueltan joan direla esan dute mikrofonotik. Zubi harresia desegin dute eta asko ahalik eta azkarren lotan jarraitzera doaz. Antolakuntzatik zorionak eman dizkiete denei, azkar erreakzionatu dutelako. Bideoa.

Zubia bete-beteta goizeko 5:00etan. (Arg: Aiert Goenaga)

04:50 Ertzainen 4×4 bat pasa berri da zubiaren ondotik atzean furgoneta zuri bat zuela. Zubi harresia osatua dago.

04:45 Bi furgoneta ikusi dituzte Mutrikutik etortzen. eta #zubiharresia osatzen ari dira. Turrunik ez.

Koordinazio mahaia (Arg: L.A)

03:15 Lau egunetan guztira errepideen zaintza lanetan 200 pertsonatik gora izan dira antolatzaileek diotenez.

02:45 Hau da egoera AskeGunean. Jendearen gehiengoa lo, hala ere, Alameda plazan sakabanatuta jende dexente dago.

00:20 Ixiltasuna gailentzen ari da. Jendea lo zakuetan sartzen hasi da. Jende asko esna.

^^ Hemendik gora maiatzak 14, asteartea ^^

23:00 Emakumeak dantzan plazan. Giro bikaina dago hemen orain. Turrune Ondarruko blogeko kideek igo dute.

22:25 Zubi harresia antolatzeko irizpideak eman dituzte. Emakumeei belarritakoak eta lepokoak ez hartzeko gomendatu diete. Betaurrekoak ere kanpora. Donostian Ertzaintzek hainbati betaurrekoak apurtu zizkiotela aipatu dute.

22:00 Jendea iristen ari da Ondarroara. Geroz eta jende gehiago dago AskeGunean.

300 pertsonatik gora AskeGunean orain (Arg: AskeGunea)

21:00 Sen ari da giroa jartzen AskeGunean.

Sen giroa jartzen (Arg: AskeGunea)

20:20 Horrela dago @AskeGunea orain. Jon Kirruk herri harresiari egindako abestia dago jarrita.

AskeGunearen itxura (Arg: L. Arbelaitz)

20:00 Ondarruko Udalak Udalak aho batez onartu du Alkortaren aldeko adierazpen instituzionala. Oposizioan dagoen EAJko zinegotziak ez dira ez-ohiko pleno honetara etorri.  Zera dio “Ondarroako udalak uste du Alkorta atxilotzea bake bidearen aurka doala. Ertzaintzak bide honetan bere konpromisoak har ditzala eskatzn dugu”. Hemen testu osoa.

Udalak onartutako adierazpena.

19:30 Su Ta Gar taldeko Aitor Gorosabel eta Xabi Bastidak kontzertua jo dute. Turrune Ondarroako blogeko bideoa.

Ondarruk larrialdi deialdia luzatzen dio Euskal Herriko seme alaba guztiei! Euskal Herriak normalizazioa! Lagundu zubi harresia eraikitzen!

— AskeGunea (@AskeGunea) 2013 maiatza 13

19:10 Amaitu dute eta Igor Elortzak egindako kantua jarri dute. Hemen entzun daiteke.

Igor Elortzaren erantzuna Urquijoren Guardia Zibila bidaltzeko proposamenari youtu.be/PvrO8LsuTDw «…igual beharko dabez ta» #ResistOndarru

— Ion Telleria Barrena (@iontelleria) 2013 maiatza 13

19:30 Su Ta Gar taldeko Aitor Gorosabel kontzertuan. 19:15AskeGuneatik deia Euskal Herritik Ondarroara gaua pasatzera joan dadin jendea.

Ondarruk larrialdi deialdia luzatzen dio Euskal Herriko seme alaba guztiei! Euskal Herriak normalizazioa! Lagundu zubi harresia eraikitzen! — AskeGunea (@AskeGunea) 2013 maiatza 13

19:10Amaitu dute eta Igor Elortzak egindako kantua jarri dute. Hemen entzun daiteke.

Igor Elortzaren erantzuna Urquijoren Guardia Zibila bidaltzeko proposamenari youtu.be/PvrO8LsuTDw «…igual beharko dabez ta» #ResistOndarru — Ion Telleria Barrena (@iontelleria) 2013 maiatza 13

17:45AskeGunearen Twitterretik erantzuna Urquijok esandakoaren harira.

Urquijok guardia zibila eta polizia nazionalaren laguntza eskaini dio Jaurlaritzari #herriharresia apurtzeko. Ertzaintza ez dute bidaliko?

— AskeGunea (@AskeGunea) May 13, 2013

Gaia dimentsio handia hartzen ari da. Orain inoiz baino gehiago historia idatzi behar dugu! Denok #herriharresi ra!

— AskeGunea (@AskeGunea) May 13, 2013

17:30 Carlos Urquijo EAEko Espainiako Gobernuak duen ordezkariak Guardia Zibilaren laguntza eskaini dio Eusko Jaurlaritzari Alkorta atxilotzeko. Bere hitzetan “amaitu egin behar da, eta modu eraginkor batean, Zuzenbide Estatuari egiten ari diren burla hau”.

17:00 Film labur bat egiten ari dira AskeGunean eta Urtza bera ere konbentzitu dute parte hartzeko. “Ondarruko Vasca” egin zutenak dira egileak eta pertsonaietako bat ertzain agentez mozorrotuta doa, eta uretan amaitu du. Hemen eszena hori.

16:10 Programazioa konfirmatu dute 17:30ean Igor Elortza eta Arkaitz Estiballes, 19:00etan Sen eta ondoren Su Ta Gar.

16:00 Patxi Saiz bakarlaria giroa jartzen ari da Alamedan. Jendea lurrean eserita eguzki hartzen.

15:45Biodantza ikastaroa egin du AskeGunean herriko dantza taldeak.

Biodantza ikastaroa (Arg: Lea Artibaiko Hitza)

15:35 Jendea berriketan. Atzo herritarrek janari piloa ekarri zutela komentatzen ari dira batzuk: Atuna ,30 patata tortillatik gora, tomate entsaladak, antxoa binagreta erara, enbutidoa, entsalada errusiarrak…

15:30 Egunetik egunera Askegunea indartzen doala ikusten da Ondarroan. Lotzen ari diren programazioa horren isla da. Geroz eta gauza gehiago. Horrez gain, sare sozialetan zabaltzen ari da gauerako Euskal Herriko toki ugaritatik jendea espero da Ertzaintza baletor, Urtza inguratzeko zubian.

15:00 Oso eguraldi eguzkitsua eta endea eguzkitako krema ematen AskeGunean. Bart egiten zuen hotzarekin alde ederra.

14:05 Bazkaltzeko herritarrek ekarritako salda, paella ta bizkotxo eta tartak.

14:00 Bazkariarekin hastea erabaki dute. Bigarren zaintza postukoek badatozela baieztatu arte ez dute turruna joko.

13:40 Abisua eman dute zaintza taldeetako batetik Ertzaintzaren bost furgoneta ikusi dituztela pasatzen Markinatik. Mugimenduak AskeGunean. Ez dute turruna jo, baina halako kasuetan beti gertatu ohi denez, ahoz aho zabaldu da.

12:15 Urtza Alkortak prentsaurrekoa eman du Estefania Beltran de Heredia segurtasun sailburuari zuzenduta. Bere aurkako froga bakarra, berak torturatuta sinatu zuela adierazi du eta galdetu dio ea noiz den bere ustez “atxiloketa egiteko une egokia”. Atxiloketa politikoen aurka daudela adierazi du, eta EAJri posizionatzeko eskatu dio. Ertzaintzak garai berri hauetan izan behar duen paperaz ere galdetu du. Beltran de Herediari Ondarroara etortzeko “dei zintzoa” egin dio, hitz egin dezaten. “Madrildik datozen atxiloketa politikoen aurrean, zein da EAJk egiten duen ekarpena garai berriei begira?”, galdetu du. “Hausnar ezazue eta jakin Euskal Herriaren aldeko hautua egitera gonbidatzen zaituztegula, ongi etorriak izango zarete herri harresian”. Espainiako hedabide asko etorri dira: La sexta, Antena3, EFE, TVE, Atlas… Hemen prentsaurrekoa osorik.

http://www.youtube.com/watch?v=mDnEO8J_Qws

11:45 Nazioartetik gero eta babes gehiago. Twitter bidez David Fernandez CUPeko kideak elkartasuna bidali du.

Sostiene Pereira i afirma Ondarroa: passió per la llibertat enmig d’un pont d’Uribe Kosta #ResistOndarru @askeguneavilaweb.cat/noticia/411458… — David Fernàndez #CUP (@HiginiaRoig) May 13, 2013

11:30 Arratsaldeko programa jakinarazi dute: 17:00etan ipuin kontalaria, ondoren Igor Elortza eta Unai Iturriaga bertsolariak eta gauean Su Ta Gar. 11:30Kontzentrazioa egiten ari dira. Naiz.info-ko Ion Telleriak grabatutako bidoa:

10:30 Nazioarteko prentsan oihartzuna izaten hasi da. Vilaweben atzo gauekoaz albistea idatzi dute.

09:30 Herritik auto bat dabil megafonia bidez AskeGuneara joateko dei eginez.

09:20 Hedabidetara deiak egiten hasi dira AskeGuneako komunikazioko taldekoak. Kataluniatik hasi dira, atzo gertatuaren berri emanez.

09:00 Lehen asanblada egiten hasi dira, eguneko lanak banatzeko.

08:30 Durangotik Ertzaintzaren lau furgoneta ikusi dituzte zaintza taldekoek pasatzen. AskeGunearen ondotik antena parabolikadun furgoneta bat ere pasa da, ziurrenik telebistaren batekoa. Horrek jendea alertan jartzen du hemen.

08:00 Jendea esnatu eta gosaltzen hasi da. Jende asko lanera edo ikastera joan da eta antolatzaileak ahal dutenei bertan egoteko esaten ari dira.

07:00 Turrunek jo du herri osoan eta lo zegoen jende asko kolpean esnatu da. Ez da AskeGunearekin zerikusirik duen ezer. Antxoa dakarte arrantzaleek portura.

04:00Hirugarren aldiz AskeGuneko jende guztia esnatu eta ziztu bizian zubira joan da. Berriz ere Ertzaintzaren bi furgoneta pasa dira. Ondoko errepidetik pasa dira eta azkenean joan egin dira. Hotz handia egiten du zubian eta hamar minutu denak goian egon ostean, jendea berriz ere lotara joan da.

Zubi harresia eratuta, Urtza Alkorta erdian dago ehunka herritarrek babestuta. (Arg: AskeGunea)

Bolanderak botatzen dituzte zaintza taldeek abisua pasa bezain pronto. (Arg: L. A.)

02:40Turrune Ondarroan. Jendea esnatu eta zubira joan da. Lehen aldian baino askoz azkarrago eratu da harresia. Ertzaintzaren bi furgoneta dira. Donostiako AskeGunea jendearen hizpide. Han ere atxilotu aurreko gauean 00:00etan eta 04:00etan hurbildu ziren Ertzaintzaren bi furgoneta eta jende guztia esnatu zen horregatik. Jendea kezkatuta dago ea zenbat aldiz pasako den polizia autonomikoa jendea esnatzera.

Zubi harresia behetik ikusita (Arg: Axier Lopez)

Zubi harresia jendez beteta. (Arg: Lander Arbelaitz)

01:00 Berriz ere jendea lotara joaten ari da. Askori dexente kostako zaie lo berriz hartzea.

00:50 Ondarroako jendea etxera joan eta zakuak hartuta plazara dator. Horrenbeste jende ez da AskeGunea abiatu zenetik egon.

00:40Arazoak dauzkat konexioarekin eta bideoak ezingo ditut unean bertan igo. Hemen Naiz.info-ko Ion Telleriak grabatutako bideoak. Urtza Alkortaren hitzak lehen harresia osatu ostean. Bertan dauden guztiak eskertu ditu.

Hau da Alkortaren atxiloketa oztopatzen saiatuko den harresia. (Arg: AskeGunea)

Zubira igo aurreko uneak (Arg: L. Arbelaitz)

^^Hemendik gora astelehena, maiatzak 13^^

20:30 Sarera igo dute herri harresiari buruzko kantua. Jon Kirru artista ondarrutarrak egin du Donostiakoa gertatuz gero. Hemen entzun daiteke.

20:15 Kontzertua lotu dute 21:00etarako. Xabi Solano, DZ eta Ines Osinaga. Gauean ahalik eta jende gehien eduki nahi dute Ondarroan.

19:30 Zubia koloretako puxikekin apaindu dute. Bertara begira izango dira begi guztiak Ertzaintza etortzen denean.

18:50 Programarekin jarraitzen dute AskeGunean. Trapezio eta oihalekin akrobaziak hasi dituzte zubian. http://www.youtube.com/watch?feature=player_embedded&v=XfhM3DgbhBo

17:15 Giro lasaia dago Alameda plazan. Aurretik ez zegoen tentsioa ekarri dute turrun hotsek.

16:45Herritik auto bat dabil altabozetatik herritarrei AskeGunera joateko dei eginez.

AskeGunea sirena jo ostean, bertso saioan. (Arg: L. Arbelaitz)

16:25 Bertso saioa herri harresiari buruz.

16:15 Jendeari jakinarazi diote Ertzaintzaren furgonetak ikusi dituztela Iurretatik ateratzen. Markinan zaintza taldea dagoela adierazi dute, beste hainbat lekutan bezala. Mugimendua ikustean abisua pasako dutela adierazi dute. Zubi harresiaren estrategia azaldu dute: Lehenik plazan bilduko dira harresian parte hartuko dutenak. Ondoren, zubira igoko dira eta zubi osoa hartuko dute. Urtza Alkorta erdian jarriko dute. Behin oharra jakinarazita, hurbildu diren herritarrei adierazi diete AskeGunean egoteko ahalik eta denborarik luzeenean. “Pixka bat surrealista dirudien arren, normaltasuna mantentzen saiatuko gara eta bertsolariak hasiko dira orain”, esanez eman diote hasiera saioari.

16:05 Turrune Ondarroan. Jendea AskeGuneara hurbiltzen ari da eta ia hutsik zegoen gunea jendez betetzen ari da.

14:30 Bazkaria. Atzoko Antxoa Egunean sobratu ziren antxoak eta xolomoa piperrekin ogitartekoak prestatu dituzte guztientzat. Prezioa, borondatea.

13:00 Kontzentrazioa egin dute.

12:30 Prentsaurrekoa egin dute AskeGuneko kideek. Bi mezu nabarmendu dituzte: Batetik, gaur gauean bidal dezaketela Ertzaintza, eta beraz, herritarrei dei egin diete gaua bertan pasa dezaten. Bestetik, EAJri dei egin diote ez dezan Ertzaintzarik bidali. Torturapean sinatutako autoinkulpazioa froga duen kasu honetan ez dezatela polizia autonomikoa bidali eskatu dute. “Nahi badute bidal dezatela Guardia Zibila edo Polizia Nazionala, eta gehitu zaitezte herri harresira, baduzue lekua”.

11:45AskeGuneako pareta batean murala egiten ari dira. Elkar eutsita dagoen jendea eta atzean zubia.

Murala egiten.

11:30 “Prentsaurreko garrantzitsua” eskainiko dutela adierazi dute antolatzaileek eta prentsa deitzen ari dira.

11:25 Euria goian-behean ari du Ondarroan. Karpak eta guneak lekuz aldatzen ari dira. Pronostikoak dio 15:00tatik aurrera eguzkia.

11:10 AskeGunea sarean mugimendua sortzen ari da. Horren adibidez da Twitterren #ZubiHarresia eta #HerriHarresia etiketek daukaten mugimendua. Horrez gain, jendea bideoak egiten ari da. Hau adibidez.

11:05 Gaurko eguna prestatzen ari dira antolatzaileak. Bart leku askotatik etorri zen jendea.

Atzo Mutriku, Berriatua, Donostia, Markina, Gordexola, Billabona, Oñati, Mallabia.. ta beste mila txokotik etorri zen jendea! #herriharresia

— AskeGunea (@AskeGunea) 12 mai 2013

11:00 Ondarroako Aurrera Futbol Taldeak dutxak eskaini dizkie herri harresian parte hartzera etorri direnei.

10:45 Laura Mintegiri bideo-elkarrizkeat hau egin nion atzo, baina konexio arazoengatik, ezin izan dut orain arte sareratu. Mintegik dio Urtza Alkortari babesa ematera etorri dela. Militantzia politikoagatik zigortu nahi duten euskal herritar bat dela eta gehiago daudela antzeko egoeran. Horrez gain, AskeGuneaz EH Bilduko legebiltzarkideak dio

http://www.youtube.com/watch?v=LNs4_KKVHs4

10:30 AskeGuneko kideek adierazi dute gaur gauean edo bihar goizaldean etor daitekeela Ertzaintza Urtza Alkorta atxilotzera. Horregatik, herritarrei dei egin diete gaua bertan pasa dezaten.

09:00 Komunikazio taldea lanean hasi da.

08.00 Jendea gosatzen hasi da.

07:00 Jendea esnatzen hasi da.

01:00 Bigarren egunaren laburpena egin dute komunikazio taldeko kideek. Hemen ikus daiteke.

^^Hemendik gora igandea, maiatzak 12^^

00:00 Musika amaitu da eta jendea lotara joaten hasi da. Sentsazio orokorra da gaur gauean ez dela Ertzaintza joango AskeGunera Urtza Alkorta atxilotzen saiatzera. Igande gaua edo astelehen goizaldeko hipotesia zabaltzen ari da. 22:30 Mac Onak taldearen kontzertua.

22:00 Ondarroakoa ez den jende ugari AskeGunean lotarako ideiarekin.

Herri askotatik etorri zarete gaur; Oñati, Donosti, Mutriku, Bakio, Getxo… Ea oraindik zerrenda luzatzerik badugun! Bota nondik zatozten!

— AskeGunea (@AskeGunea) 11 mai 2013

20:30 Laura Mintegi eta Unai Urruzuno EH Bilduko legebiltzarkideak bertan dira dira besteak beste.

19:40 Hau izango da Ertzaintza etortzean joko duten sirena. Turruna deitzen diote Ondarroan. https://twitter.com/AskeGunea/status/333264371872567296

19:10 Kontzertua hastear da.

19:00Euskal Herriko leku ugaritatik jendea iristen ari da AskeGunera. Plaza bere punturik beteenean dago orain.

AskeGunearen itxura. (Arg: L. Arbelaitz)

18:00Donostiako zigortuen senideak Ondarroara etorri dira Urtza Alkortari babesa adieraztera. Argazkian Egoi Alberdiren amarekin besarkada, aita ondoan.

Urtza Alkorta Egoi Alberdiren amarekin besarkatzen, ondoan aita duela (Arg: Lander Arbelaitz)

17:30Akrobazia tailerra egin dute.

Akrobazia tailerra (Arg: L. Arbelaitz)

16:30 Musika jarrita dago eta eguraldi ona egiten duenez, giro lasaia dago Alamedan. Jendea eguzkitan kafea hartzen.

14:30 Bazkaria. Makarroiak txorizo eta tomatearekin denentzat. Horrez gain, jendeak ekarpenak egin ditu, adibidez, argazkiko emakume honek fritoak ekarri ditu. Donostiako AskeGunean bezala, jendea prest dago mugimendu hau horrela ere laguntzeko.

13:45“Zubi harresia” kontzeptua irudikatu nahi izan dute eta argazkiak ateratzeko baliatu dute.

Zubi harresia egingo dute Ondarruko AskeGuneko kideek. (Arg: Lander Arbelaitz)

Zubi harresia beste ikuspuntu batetik (Arg: AskeGunea)

13:35 Urtzak esker oneko hitzak izan ditu bertaratu diren herritarrekiko. Ondoren AskeGuneko kide batek planteamentua azaldu du. Zubira igoko dira Ertzaintza datorrenean.

13:30 Itzuli da manifestazioa AskeGunera. Berriz jendez bete da Alameda plaza. Bertakoek 1000 lagun bat daudela diote. Eguraldia hobetu da eta eguzkia atera du.

13:25 Trikitilariak etorri dira AskeGunera. Dantzan ibili da jendea.

13:10Gernikako Akordioak deitutako manifestazioa abiatu da. AskeGuneko jende gehiena joan da bertan.

Gernikako Akordioak deitutako manifestazio burua. (Arg: Askegunea)

13:00 Joan dira pertsona hauek, baina jendeak Alamedaren erdian zutik jarraitzen du.

12:40Tentsioa igo da bat-batean. Susmagarriak zirela iritzi dute pertsona batzuk eta plazaren erdian Alkorta jarri dute. Helikopteroa ere badagil Ondarroan. Probokaziotan ez erotzeko dei egin dute mikrofonotik.

Urtza Alkorta jende multzoaren erdian kokatu dute. (Arg: Lander Arbelaitz)

12:05 Furgoneta batzuk ikusi dituztela esan dute mikrofonotik, lasaitasuna mantentzeko, baina tentsioa ez galtzeko eskatu diote jendeari. Helburua AskeGunean ahalik eta jende gehien egotea da.

12:00 Ertzaintza Urtz Alkorta atxilotzera “operatiboki egoki ikustean” joango da, Beltran de Herediak Radio Euskadin esan duenez.

https://twitter.com/eitbcomNoticias/status/333157236656439296

11:45 Arzuagak dioenez, Garzonek huts egin zuen ETA kale borrokarekin lotzen lehen teoria batean, ondoren Segi/Jarrai kale borrokarekin lotzen saiatu zen baina hor ere huts egin zuen. Azkenean “Jarrai/Segi ETA da” asmatu zuen.

11:30 Julen Arzuagaren hitzaldia hasi da. ‘La maza y la cantera’ liburua aurkeztera.”Euskal gazteria, errepresioa eta elkartasunaz”.

10:00 Komunikazio taldeak lanak banatu ditu. Batzuk sare sozialez arduratuko dira, beste batzuek hedabideetara deiak egiten hasiko dira.

9:30 Eguneko lehen asanblada egin dute. Eguneko lanak banatu dituzte. Komunikaziorako jendea eskatu dute. Hainbat dira betetzeko dituzten turnoak ere: zaintza, garbiketa, programazioa… Lanean jarri dira.

8:30 Mikrofonotik erdi-lo zegoen jendea esnatu dute. Gosaria prestatzen ari dira AskeGuneko kide batzuk. Atzo Enkarterrietatik Euskal Herriko esnea ekarri zuten AskeGuneko jendearentzat.

7:00 Jendea esnatzen hasi da. Ertzaintza ez da joan Urtza Alkorta atxilotzera.

1:30 Lotara joateko deiegin dute. Asko jada lo daude 15 bat kanping denda daude muntatuta. Jende dexente dago esna. Hau da panorama bideoan:

00:15 Eguneko irudiekin bideo-muntaia bat egin dute eta proiektatu. http://www.youtube.com/watch?v=SjJJtPdGaL8

[^^Hemendik gora larunbata, maiatzak 11^^]

23:45 AskeGuneako webgunera manifestua igo dute hainbat hizkuntzatan: euskaraz, gaztelaniaz, frantsesez, ingelesez, katalanez.

23:30 KEU eta Mikel giroa jartzen aritu dira. Mikelek poemak irakurri ditu eta KEUk bere abesti batzuk kantatu ditu.

23:00Biharko egitaraua. Goizean Julen Arzuaga EH Bilduko legebiltzarkidearen hitzaldia izango da. Ondoren Gernikako Akordioak deituta “Konponbide garaia da, atxiloketa gehiagorik ez!” lemapean manifestazioa egingo dute. Arratsaldeko programa lotzen ari dira AskeGuneko kideak. Bihar Ondarroan Antxoa Eguna da horrez gain, eta espero da giroa izatea herrian.

Ostiraleko eta larunbateko egitaraua.

21:30ETBk albistegian eman du AskeGunearen albistea. Donostiakoan kritikak jaso zituen telebista publikoak, gaiari egindako jarraipenagatik.

20:00 Afaria prestatu dute bertan dagoen jendearentzat. Tortilla, txitxarroa errea, saltxitxak eta beste ekarri dituzte jateko.

19:00Asanblada eta manifestazioa egin dute. Bi zutabetan joan dira “Kartzelak hustutzeko garaia da, herri harresia eraiki” lemapean. AskeGunetik askorik urrundu gabe ibili dira eta Urtza Alkorta aurrean joan da.

16:00Bazkalosteko asanbladan arratsaldeko egitaraua azaldu dute. Musika, hitzaldiak eta bideo emanaldiak izango dira, besteak beste.

Bazkalostean asanblada (Arg: Axier Lopez)

15:45 Musika jarri dute. Giro lasaia dago.

15:00Bazkalordua. Herritar ugarik jatekoa ekarri dute jendeak AskeGunea utz ez dezan eta Alkortaren inguruan manten daitezen.

Bazkaria guztientzat. (Arg: Twitter/Erreharria)

14:20Urtza Alkortarekin mintzatu da Axier Lopez. Hemen bideoa.

14:05Sirena jo dute eta herritarrak zubira joan dira. Bertan osatuko dute harresia Ertzaintza etorriko balitz.

Herritarrak zubian.

13:50 Jendea zutik dago eta Ertzaintza etorriko balitz zer egin behar duten azaltzen ari dira. Desobedientzia zibila praktikatuko dute.

Jendea argibideak entzuten (Arg: Axier Lopez)

13:45Adin guztietako jendea bildu da Ondarroako Alamedan.

Jende heldua ere bildu da harresian. (Arg: A. Lopez)

13:40 Lagun eta ezagunak besarkatzen ari da Urtza Alkorta.

13:35 Komunikazio Gunetik adierazi dute Ertzaintzaren komisaldegian mugimenduak ikusi dituztela eta balitekeela une batetik bestera saiatzea Alkorta atxilotzen.

Ertzaintzako koartelean furgonetak prestatzen ari direla adierazi berri dute komunikazio gunetik #herriharresia — Axier Lopez (@axierL) 2013 maiatza 10

13:30Alkortak hartu du hitza. “Oxigeno bonbona bat da hau, pertsonalki gogorra izan daitekeen arren berriz kartzelara joatea, militante moduan aurrera egiteko indar berrituta sartuko naiz”.

Urtza mikrofonoa eskuetan (Arg: Axier Lopez)

13:25AskeGunearen antolaketa eta irizpideak adierazi dituzte. Axier Lopezen bideoa.

13:05 Ondarruko sarreretan kontrolak daude. Mutrikuko bidetik eta Berriatuan Guardia Zibila dagoela jakinarazi dute sare sozialen bitartez.

13:00Geroz eta jende gehiago Ondarroako Alamedan. Urtza Alkortaren inguruan eseri dira.

Herri harresia Urtzaren inguruan (Arg: Axier Lopez)

12:55Urtza Alkorta agertu da Alamedara. Ezkutuan izan da orain arte. Jendea bere inguruan esertzen hasi da. Ion Telleriaren argazkia.

Urtza Alkorta herri harresian. (Arg: Ion Telleria)

12:50Urtza iritsi da. Axier Lopezek grabatutako bideoa.

Ireki da Ondarruko AskeGunea! #denokondarrura !! — AskeGunea (@AskeGunea) May 10, 2013

12:40 Eleaken izenean Txerra Bolinagak hitz egin du. Ondarrutarren erantzuna nabarmendu du eta adierazi du gizarteak parte aktiboa behar duela Espainiako justiziak hartzen dituen neurri hauek desaktibatzeko eskatzeko orduan. 12:35Sortu eta EH Bilduko ordezkariak Alamedan daude. Ion Telleriaren argazkia. “Geroz eta indar gehiagoz tinko eta lasai erantzungo du herri honek. Herri hau eraikitzen joango gara desobedientziatik. Gauzak egiteko beste modu batzuk daude arlo guztietan”.

Sortuko kideak Ondarroan. (Arg: Ion Telleria)

12:30Alameda plaza betetzen ari da. Ordu honetarako dago herri harresia osatzeko deia egina. Axier Lopezen argazkia.

Alameda plaza betetzen doa. (Arg: Axier Lopez)

12:25 AskeGunea antolatuko dute Ondarroan. Donostian hasitako bideari eutsiko diote antolatzaileek diotenez, bai formetan baita estetikan ere. Desobedientzia zibila erabili nahi dute, herri harresia antolatu Urtza Alkortaren inguruan. Puxika laranjekin apaindu dute Alameda plaza eta informazio gunea ere jada prestatu dute. 12:20 Alamedan 100 bat pertsona daude Lea Artibaiko Hitzak dioenez.

Momentu honetan 100 lagun inguru daude Alamedan. Dena prest dago #herriharresia osatzeko. @askegunea lea-artibaietamutriku.hitza.info — LEAKO HITZA (@LEAKOHITZA) May 10, 2013

12:15Hau da egoera Alamedan orain. Axier Lopez lankideak grabatutako bideoa.

12:10Donostiako gazte kondenatuek atxilotu aurreko egunean grabatu zuten bideoa igo dute AskeGuneko YouTube kanalera. Bertan hurrengo auzietan ere herri harresia antolatzeko dei egiten dute.

12:00 Urtza Alkorta ondarrutarra atxilotzeko agindua du Ertzaintzak. ETArekin kolaboratzea egozten diote. Alkortak salatu zuen torturatu egin zutela eta behartuta autoinkulpazioa sinatzera behartu zutela. Bi urte eta erdi egin ditu kartzelan eta beste bi urte eta erdiko zigorra bete behar du. Herri harresia antolatu nahi dute kondenatua babesteko. Zuzeneko jarraipena egingo dugu hemen. Bideo honekin hasi da dena.

Preso sahararren askatasunaren aldeko manifestazio bat orain gutxi / Flickr: arribalasqueluchan!

Mohamed El Burhimi Marokoko Ait Melloul katzelan hil zen atzo astebetez elikagairik hartu gabe egin ostean. Otsailak 20 (O20) mugimenduaren eta Marokoko Ikasleen Batasun Nazionala (UNEM sigla frantsesetan) ikasle sindikatuaren gose grebak marokoar estatuko kartzela askotan zabaldu dira. 22 urte zituen El Burhimik.

Epaitegi militar marokoarrak ezarritako 10 urteko kartzela zigorraren aurka abiatu zuen gose greba apirilaren 30ean 22 urteko ekintzaile sahararrak. RASD News informazio gune sahararrak jakitera eman du albistea Facebook bidez.

El Burhimi egun Marokoko estatu osoan gose greban dauden preso politikoetako bat zen. Iturri sahararren arabera dozenaka dira eta batzuek 60 egun baino gehiago daramatzate jan gabe kartzeletako egoera orokorrari soluzioa exijitzeko.

Joan den martxoaren hasieran, adibidez, UNEM sindikatuko dozenaka ekintzailek gose greba hasi zuten. Joan den abenduaren 17an atxilotu zituzten, eta hori bera salatzeaz gain, jasan zituzten torturen eta egun pairatzen dituzten tratu txarren berri eman zuten.

Horrez gain, Marokoren demokratizazioa eskatzen duen Otsailak 20 mugimendu sozial eta politikoko 12 presok era mugagabean elikagaiak hartzeari utzi zioten maiatzaren 1ean. Espetxeratuta dauden ekintzaileen eskaerak entzun ditzaten exijitu nahi dute, eta protesta modu hau kartzela guztietara orokortzeko dei egin dute.

Hainbat iturriren arabera, “Marokoren okupazioaz geroztik antolatutako manifestaziorik jendetsuenak” egiten ari dira Mendebaldeko Saharan.

Informazio gehiago:

Mendebaldeko Sahara kanala Argian.

Periodismohumano webgunean Otsailak 20 mugimenduari buruzko informazio interesgarria, artikuluak, elkarrizketak eta abar gaztelaniaz.

Ferrolgo gazteenek hezkuntza galegoz jaso ahal izango dute datorren ikasturtetik aurrera.

6 urte arteko Galiziako haurrentzat hezkuntza galegoz emango duen Avoaescola proiektuko lehen eskola aurkeztuko dute bihar Ferrolen. Galicia co Galego (GcG) plataformak bi urtetan egindako lanaren emaitza da. Datorren ikasturtean irekiko ditu ateak, Praza Pública-k argitaratu duenez.

Galiza co Galego proiektua 2010ean aurkeztu zuten eta beren buruari hezkuntza sare “herrikoi eta pribatua” bultzatzea ezarri zioten lehen helburu gisa. Ferrolgo Avoaeskola da sare honetako lehen emaitza.

Orain arte galescola-k ziren funtzio pedagokiko hau betetzen zuten eskolak, BNG eta PSdG-ren gobernuak bultzatuta. Hala ere, PP 2009an botetera itzuli zenean, galescola programa ordezkatu egin zuen A Galiña Azul programagatik, eta egun ez dago gazteenentzat hezkuntza galegoz ziurtatuta.

Galicia co Galego-ko kideek adierazi dute PP gobernura itzuli denetik hizkuntzaren aurka “eraso bortitzak” egin dituela eta horrengatik sortu behar izan dutela hezkuntza sistema “laikoa, plurala, demokratikoa, baloreetan oinarritua eta kalitatezkoa”, eta galegoa hizkuntza ardatz duena.

Galizian martxan jarri nahi duten eredu honek estaturik gabeko beste hainbat naziotako hezkuntza proiektuekin antzekotasunak ditu, hala nola, Ipar Euskal Herriko Seaska, Ipar Kataluniako Bressola, Occitaniako Calandreta edo Bretainiako Diwan ereduekin.

Iruzkinetan Txerra Rodriguezek jakinarazi digunez, lehendik bada galegoz irakasten duen eskolarik: Semente izenekoa Santiagon. Bertan izan ziren gainera Euskal Herritik joandako hainbat pertsona, esperientzia bertatik bertara ezagutzeko (hemen kronika). Ferrolgo honen berezitasuna da Avoaescola sarea izan nahi duenaren lehen fruitua dela.

Bideoa ez da beste munduko ezer, baina gaian interesa duenarentzat, bertan informazio gehiago.

Ertzaintzak herri harresia inguratu du 6:00ak bueltan. (Arg: L. Arbelaitz)

Donostian azken egunotan bizi izan duguna askok ez dugu denbora askoan ahaztuko, eta batez ere gaurkoa. 800 bat pertsonak tinko eutsi diote beren militantzia politikoagatik atxilotze agindua zuten gazteei babesa emanez. Goizeko 6:00etan esnatu dituzte lo zeudenak, baina ertzainek ez dute lortu harresia gainditzea. Sekula baino jende gehiago zegoen Bulebarrean. Duintasun handiz eutsi diote gazteek, inongo biolentziarik erabili gabe, baina aldarrikapenetan oso tinko. Tentsio une handiak bizi izan dira, ondorengo bideoetan ikus daitekeenez. Ertzaintzak ere bere estrategia oso pentsatuta ekarri du eta banaka-banaka jendea atera du sei gazte zigortuengana heltzeko. Hauek izan dira sei atxilotuak: Mikel Arretxe, Oier Lorente, Aitor Olaizola, Egoi Alberdi, Ekaitz Ezkerra eta Adur Fernandez. Imanol Vicente eta Naikari Otaegi ez dira egunotan AskeGunean izan, beren erabakiz.

Bideo dexente grabatu ditut, ondoren ikus ditzakezue, baina azkenekoa da onena. Ertzaintzaren itxitura gainditu eta herri harresia barnetik ageri da, 20 minutuko bideoam, azken 20 minutuak. Gazte zigortuak nola eraman dituzten ikus daiteke, baita bertan elkarri tinko eutsita zeudenek bizi izan dituzten uneak. Benetan oso indartsua izan da han zeudenek transmititzen zuten mezua.

Ertzaintzarekin izandako bi kontu ere aipatu nahi nituzke. Lehena, harresiko jendea ateratzen hasi direnean, eta beraiek esandako lekutik pasa gabe nintzela, agente bat niregana etorri da, eskuan prentsa akreditazioa nuen, eta hala ere, grabatzeko erabiltzen ari nintzen mugikorra lurrera bota didate kolpe batez. Ni neu ere lurrera bota naute eta oinarekin zapalduz zeukaten nire mugikorra berreskuratu ahal izan dut in extremis. Konturatu gabe bideoan grabatu da unea, ez naizela exageratzen ari ikus dezazuen. Azkenean, mugikorra eta prentsa akreditazioa eskuan, kioskora eraman gaituzte.

Honen ondoren, kioskoan sarrarazi gaituzte kazetari guztiak eta bertatik ateratzea debekatu. Esan didatenez hainbat argazkilarik negoziatu dute Ertzaintzarekin kazetarion posizioa, baina onartezina da halako kaiola batean sartu eta bertatik ateratzea debekatzea. Gure betebeharra informatzea da, eta horretarako mugimendu askatasuna behar dugu. Oso urrun geunden nire ustez, bai behintzat mugikorrarekin bideoak grabatzeko.

Espainiako lege injustuak medio 6 urte kartzelan egingo dituztenengatik, herri harresian tinko eusten ari zirenengatik, une horretara iristeko hainbeste indar jarri duten guztiengatik eta bertan egon ez arren gaia jarraitu nahi zuten guzti horiengatik, kazetariok gertaera ahalik eta modurik profesionalenean irudikatzeko ardura genuela uste dut. Munduari hemen gertatu dena erakutsi behar genion, kanpoan ere oihartzuna izan baitu herri harresi honek. Azkenean, kioskotik korrika atera eta Ertzaintzaren despiste une batean harresian sartu naiz salto batean. Barkatu bere gainera erori naizen horri, minik egin badiot. Uste dut nabarituko duzuela aldea lehen bideoetan ikusten denaren eta azkeneko 20 minutukoaren artean. Eskerrak baita ere, elkar ezagutu gabe, nire telefonoaren bateria amaituta berea eman didan harresiko kideari (izena ez dut gogoratzen, barkatu). Honi esker grabatu dugu azken testigantza eta garrantzitsuena: bertan jendeak izan duen jarrera benetan eredugarria betirako grabatuta geratu da. Eskerrak!

Lotara joan aurretik, eskerrak Twitter bidez egin dizkidazuen iruzkinengatik. Estimatua dago.

Lehen bideoan, “Apala” Bulebarreko jendetzari azalpenak ematen.

9:00 Ehunka pertsona pilatuta daude Donostiako Boulevarda inguratzen. Jendeak errepidea moztu du furgonetak atera ez daitezen. Ertzaintzak beste bide batetik eraman ditu eta tentsioa asko igo da.

8:00 Ertzaintza gogor ari da kondenatutako kideengana heltzeko lanean. Behin harresitik ateratzean eskumuturrak bihurritzen dizkiete askori. 20 minutuko bideoa grabatu dut eta bertan ikus daiteke kondenatuengana nola heltzen diren. “Auziperatuak, maite zaituztegu!” oihuak harresiko kideen artetik.

7:35 Hemen bigarren bideo bat barnetik grabatuta.

7:25 Hau da harresiaren barnetik ikusten dena.

7:15 Ertzaintzako hainbat agente bortizkeria (kolpeak, zapalduak, ileetatik tiratzea…) erabiltzen ari dira era baketsuan erresistitzen ari diren herritarren aurka. Harresiaren barnera sartu naiz eta bertatik grabatuak dira ondorengo bideoak.

7:00 Hau da AskeGunearen egoera operazioa hasi eta ordubetera.

6:45 Geroz eta erresistentzia handiagoa jartzen ari dira harresiko kideak, eta hauek ateratzen ari diren ertzainak ere gero eta bortitzago ari dira.

6:35 200dik gora ertzainek harresia inguratuta daukate eta jendea banaka-banaka ateratzen ari dira kondentuenganako bidea egin nahian.

6:30 Ari dira agenteak harresiko kideak banaka-banaka ateratzen. Bitartean oihu eta aldarrikapen artean eusten dio jendeak. Ondorengo bideoan “Eusko Gudariak” abesten.

6:25. Kazetariok Boulevardeko kioskoan sartu gaitu ertzaintzak eta ez digute bertatik ateratzen uzten. Hau onartezina da. Halako neurriak bakarrik har daitezke gertaerak oso biolentoak direnean eta kazetarion integritate fisikoa arriskuan dagoenean, edo poliziaren lana oztopatzeko arriskua dagoenean. Ez da kasua.

6:20. Kazetari txartela agerian nuen arren, Ertzaintzak eraso egin dit eta mugikorra kentzen saiatu da. Lurrera bota naute hainbaten artean, eta ondoren, mugikorra zapaltzen ari zen ertzain bat. Lurrera bota eta hau hartzea lortu dudanean bideo hau grabatu dut nahi gabe mugikorrarekin. [Eguneraketa: AskeGuneko komunikazio taldeko kideek erasoa hainbat angelutatik grabatu eta sareratu dute].

00:30 Hau da AskeGunearen egoera orain.

[^^Hemendik gora ostirala, apirilak 19^^]

23:50 AskeGunearen etxe batetik ikusita.

Jendetza AskeGunean. (arg: Lander Arbelaitz)

23:30 Hedabide ugari AskeGunean gaua pasatzeko prest.

23:00 Beñat Apalategi bertan bildu den jendetzari argibideak eman dizkio. Horrenbeste jende biltzea inondik ere ez zutela espero adierazi du. Ingurua txukundu eta lotarako prestatuko dute gunea. Ohikoa baino perimetro zabala prestatuko dute lotarako. Jendeari ixiltasuna eskatu diote, ez baitaki inork noiz etorriko den Ertzaintza. Jendeak deskantsatu behar duela adierazi dute mikrofonotik. “Burua hotz”, aldarrikatzen du.

“Gure erantzuna desobedientzia da. Ez diegu utziko gazteak eramaten, horrelako herri batekin posible da. Aupa zuek! Ikaragarriak zarete! Gora euskal gazteria!”, esanez amaitu du Apalategik. Hunkituta dago, malkoei eutsi ezinik.

Lotarako izen eman behar da mahai honetan. (Arg: Makoki / AskeGunea)

22:00 Antolakuntzatik diotenez, 2.000 bat pertsona daude Boulevardean.

Sei gazte kondenatuak bertara etorri direnei eskerrak ematen. (Arg: Makoki / AskeGunea)

20:30 Kondenatuek hitza hartu dute. Gaua bertan pasako dutela adierazi dute. Bideo honetan Oier Lorenteren hitzak. Animoak bero daude eta “jo ta ke, irabazi arte!” oihuak entzuten dira AskeGunean.

20:00 Geroz eta jende gehiago dago AskeGunean. Sare sozialetan jendea Donostiara datorrela adierazten ari da oraindik, eta domino efektu antzeko zerbait gertatzen ari da.

19:00etako kontzentrazioa. (Arg: Makoki / AskeGunea)

19:00 Eguneroko kontzentrazioa. Ez da sekula horrenbeste jende egon AskeGunean kontzentrazioan. Jendea etorri eta etorri ari da.

18:20 AskeGuneko kideek diote ziurrenik gaur etorriko dela Ertzaintza, Espainiar estatuko hedabideetako kazetariak etorri dira arratsaldean. “Hauek ez dira alperrik etortzen”, diote.

18:00 Nazioarteko hedabide ugari ari dira AskeGunearen jarraipena egiten. Adibidez, Russia Today hedabidearen albiste agentziak atzo grabatu genuen bideoa jarri du webgunean eta Aske Guneko kideei deitu diote esanez kamera bat bidali nahi dutela.

17:45 Jexux Mari Irazu etorri da eta streaming bidez ikusi ahal izango da AskeGunea hainbat orduz. Jendea bere aletxoa jartzen ari da hemen.

17:30. Musika dago jarrita.

Martin eta Funosas ehunka pertsonaren aurrean hizketan. Kioskoa motxilaz beteta. (Arg: Makoki / AskeGunea)

Aurore Martin eta Anaiz Funosas (Arg: Makoki / AskeGunea)

17:00etatik 17:30etara Aurore Martin eta Anaiz Funosas etorri dira Auroreren herri harresiaren esperientzia azaltzera. Bertako gazteei babesa eman diete.

Giroa AskeGunean (Arg: Makoki, AskeGunea)

16:00 – 17:00-ak arte musika egon da.

15:40 Aniak lagundu du giroa lasaitzen bere kantuekin.

15:20 Azkenean ez da ezer ere gertatu. Zurrumurruak nekearen ondorio dira. Musika jarri dute berriz ere giroa lasaitu asmoz, nahiz eta kostako den. Zabaldu dutenez gauean egin lezakete saiakera, eta hori baliatuz, Aske Gunetik deialdi nazionala egin dute Donostiara etortzeko. Twitter bidez jendea Donostiara ateratzen ari dela jakinarazten ari dira.

Deialdi nazionala #AskeGunea -ra joateko, atxiloketak gauean izan daitezke! Herri oso baten gainetik pasa beharko dira! ANIMO! #Basque8

— Herriak Aske (@HerriakAske) 2013 apirila 18

Une hau irudikatzen duen Ikor Kotxen argazkia.

Une hunkigarria (Arg: Ikor Kotx)

15:10 Hemen jendea hunkituta dago, kasua balitz ere, elkar agurtzen. Nekea oso nabarmena da eta bart bi-hiru ordu egin ditu lo jendearen gehiengoak. Horrek zurrumurruak erraz zabaltzea dakar.

12:30 – 13:30 Deskontrol taldeak kontzertua hasiko du kioskoan. Euria ari du. Gazte giroa nagusi AskeGunean.

12:00 Kontzentrazioa.

11:00 eta 12:00ak artean paroa egin dute Donostiako ikastetxe eta lanbide heziketako eskoletan eta harresietan hurbildu dira Aske Gunera.

11:15 Nazioarteko hedabideetara deitzen ari dira komunikazio taldeko kideak, AskeGunean gertatzen ari dena lehen eskutik kontatzeko. Hainbat dira albistea jaso duten hedabideak. Sona izaten haste ari da gaia. AskeGuneko jendea oso haserre dago EiTB gaiari ematen ari zaion tratamenduagatik eta “zentsura” aipatzen dute.

11:00 Bart gertatuaren kronika igo dute komunikazio taldeko kideek webgunera. Bertan dagoen jendeari hau itzultzen laguntzeko eskatu dute eta hainbat izan dira kioskora igo direnak. Oraingoz gaztelaniaz, frantsesez, ingelesez eta katalanez jartzeko lanean ari dira.

09:00 Gosaldu ostean, jendea martxan jarri da eta lotarako erabili den lekua garbitu, txukundu eta egunerako prestatu dute denen artean.

08:00 Gosaria banatu dute. Jendea nekatuta dago bart Ertzaintzak egin zuen bigarren bisitaren ondorioz.

07:00. Jendea esnatzen ari da. Euria ari du. Ehunka pertsona daude Donostiako Boulevardean.

04:00. Berriro etorri dira Ertzaintzaren bi furgoneta eta auto bat. Sirena jo dute eta jende guztia, gehiena lo zegoena, berriz antolatu da herri harresi forman. Autoak joan direnean berriz ere poza zabaldu da eutsi izanagatik, baina baita kezka ere, gauean gehiagotan esnatuz gero, goizaldean jendea nekatuta egongo delako. Bigarren herri harresiaren bideoa.

02:00. Jendea lotara joan da. Tentsio handia bizitu du jendeak gaur, baina irribarreak dira nagusi hemen.

Jendea lo goizeko 2:30etan.

00:25 Oier Lorente eta Aitor Olaizolaren adierazpenak bi bideo hauetan grabatu genituen.

Herri harresia prest Donostian. (Egilea nor den ez dakit)

00:15 Ertzaintza etorri da eta herri harresia sortu dute. Bideoan ikus daiteke osorik.

23:00 Iñigo Urkullu elkarrizketatu dute ETB1en eta internet bidez jendea ea ertzaintza bidaliko ote duen galdetzeko eskatzen ibili da. Xabier Usabiaga aurkezleak galdetu dio eta Urkulluk finean baietz esan du, ertzaintza bidaliko dutela. Hemen kortea.

21:00. ETBko albistegian ez dute AskeGunea aipatu.

Oraintxe bukatu da @eitbcomberriak eta benetan lotsagarria @askegunea ri buruzko inungo aipamenik ez egin izana #eajezbidaliertzaintza

— Aitor Larburu (@Larburu) 2013 apirila 18
20:45. Twitterren #EAJezbidaliertzaintza etiketa erabiltzen ari da internauta asko. Horren adibide hainbat txio.

.@iurkullu Ertzainak bidaliko dituzu euskal gazte errugabeak atxilotzera? #euskadigaldezka #EAJezbidaliertzaintza #askegunea

— Igor Elortza Aranoa (@ielortza) 2013 apirila 17

Nik ere eskatzen diot @eajpnv_eu-ri #HerriHarresira batzeko eta Ertzainik ez bidaltzeko! #askegunea #eajezbidaliertzaintza

— Aiora (@probatxoa) 2013 apirila 17

#EAJezbidaliErtzaintza #EAJezbidaliErtzaintza #EAJezbidaliErtzaintza #EAJezbidaliErtzaintza #EAJezbidaliErtzaintza #EAJezbidaliErtzaintza

— TheklanEH (@theklaneh) 2013 apirila 17

20:20. EAJri herri harresiaren parte izateko eskua luzatu diote Aske Gunetik eta “Madrildik agindutak lege injustuak betetzera Ertzaintza ez bidaltzeko” eskatu diote. Hemen testua osorik eta azpian bideoa.

Mikel Arretxe eta bere aita gaur kontzentrazioan.

17:50. Arratsalde osoan zehar ikasleak biharko konpromiso egunerako pankartak egiten aritu dira.

17:00. Marrazki tailera “0 urtetik 100da piko urtera bitarteko jendearentzat”, aurkezpena egin duenak esan duenez.

16:15. Kontxita Beitiak ikastolen sorrera eta desobedientzia zibilaren inguruko hitzaldia eman du. Karpa txikia bete da. Eta aldi berean, lehen sorospen ikastaroa eman dute egunero AskeGunean dabiltzan hiru medikuk.

Bakarlaria Aske Gunea girotzen.

14:30. Bazkaria janari ekologikoarekin lan egiten duten Gipuzkoako hainbat koperatibak prestatu dute.

13:30. Julen Arzuaga EH Bilduko legebiltzarkidea etorri da “La Maza y la cantera” liburua aurkeztera. Horrez gain, Askapenak antolatuta, Saharari buruzko dokumental bat proiektatu dute eta gaiari buruz aritu dira. Hemen Aske Guneko hainbat argazki.

Estrategia komunikatiboa azalduz hainbat pankarta.

Xake partida hastear.

12:30. LABeko Ainhoa Etxaide etorri da eta ESK, STEILAS eta LABen izenean gazteei babesa eman diote. Nabarmendu duenez, sindikatuak beti eskubide zibilen aldeko lana egin dute eta horregatik babesa ematera etorri nahi izan dute. Hemen bideoa:

12:00. LABeko 150 bat kide etorri dira AskeGunera beren babesa adieraztera.

11:30. Komunikazio lantaldea kanpoko hedabideetara deiak egiten ari da, webgunean jarri duten informazioa (5 hizkuntzatara bolondresek itzulia, euskaraz, gaztelaniaz, ingelesez, frantsesez eta katalanez) eta bideoak zabaltzen hasteko.

11:00. “Zapalduen antzerkia” oraintxe bertan AskeGuneko kioskoaren atzean. Karpan berrz jendea eserita berriketan eta gosaltzen. Antzerkiarekin, polizia etortzen denerako erresistentzia teknikak ere landu nahi dituztela adierazi dute antolatzaileek. Hemen bideoa:

Apirilak 17, asteazkena. 10:00. Bi bideo hauetan ikus daiteke zein zen giroa lehen arratsa pasa behar zuten herritarren artean.

Blog honetan Donostiako Aske Gunearen zuzeneko jarraipena egingo dugu. Laburpen gisa, joan den asteartetik Aske Gunea antolatu zenetik, egunero ehunka pertsona zortzi zigortuak babesten ari dira. Atzo arte etxeetara joaten ziren herritarrak zutabeak antolatu eta zortzi gazteak babestuta Aske Gunera eramateko. Egun osoa bertan igaro ostean, 20:30ean etxeetara eramaten zituzten.

Astelehen goizean gazteak atxilotzeko agindua eman zuten, eta ordutik, planteamentua 24 ordutara zabaltzea erabaki dute. Bart egin dute lehen aldiz lo Donostiako Boulevardean eta antolatzaileen arabera, 400 bat pertsona izan dira lo-zakuetan gaua pasa dutenak.

Izan ARGIAko bazkide: astekariko harpidedun edo argia.comen laguntzaile

Espetxe zigorra ezarri dieten Donostiako zortzi gazteak. Goian ezkerretik: Aitor Olaizola, Mikel Arretxe, Oier Lorente, Ekaitz Ezkerra tea Naikari Otaegi. Behean ezkerretik: Imanol Vicente, Adur Fernandez eta Egoi  Alberdi. (Arg: Lander Arbelaitz)

Mikel Arretxe. 1985. Egiarra. Hernanin bizi da. Lehendik bi urte egon zen kartzelan antzeko muntaia batengatik. Askatu eta urtebetera auzi honengatik atxilotu zuten, eta inkomunikazio aldian era basatian torturatu. Bikotekidea du. Lanean ari da. Sei urteko kondena.

Imanol Vicente. 1986. Amara Berrikoa. Lanean ari da Spining klaseak ematen ditu eta bikotekidea dauka. Sei urteko kondena.

Naikari Otaegi. 1983. Amara Zaharrekoa. Bikotekidea eta bi seme-alaba ditu: Zazpi hilabete eta hiru urtekoak. Espetxeratzen badute alabarekin sartuko da honek 3 urte egin arte. Sei urteko kondena.

Egoi Alberdi. 1988. Amara Zaharrekoa. Izotz enpresa batean lanean ari da. Bikotekidea du. Atxilotu zutenean gogor torturatu zuten. Sei urteko kondena.

Aitor Olaizola. 1983. Alde Zaharrekoa. Lanean ari da taberna batean. Bikotekidea du. Sei urteko kondena.

Adur Fernandez. 1985. Altzakoa. Grosen bizi da. Bikotea du. Nekazaritza kooperatiba bateko kide da, kontsumo talde bateko baratza lantzen du.

Oier Lorente. 1982. Alde Zaharrekoa. Lanean dabil autobus gidari gisa eta Orixe Ikastolako jangelan haurrei bazkariak ematen. Bikotekidearekin bizi da.

Ekaitz Ezkerra. 1986. Loiolakoa. Hernanin bizi da bikotekidearekin. Lanean ari da. 5 egunez torturatu zuten inkomunikazioan. 6 urteko kondena.

Eta jada atxilotu zuten Ekaitz Ibero. 1986. Loiolakoa eta Antiguon bizi zen. Auzi berekoa da, baina absolbitu zituztenen taldekoa. Aske Gunean hasieratik egon da, atxilotze agindua zuelako ordea beste kausa batengatik. Torturapean autobus bat erre izana sinatu arazi zioten. Epaiketan bere torturatzailea aurrez aurre ikusi zuen eta antsietate erasoa izan zuen. Bi hilabete ezkutuan pasa ostean Aske Gunearen lehen egunean agertu zen. Hurrengo egunean ertzaintzak atxilotu egin zuen bere inguruan erresistentzia baketsua erabiliz bera eutsita jarri zen jendea kolpeka hartuz. Hainbat pertsona ospitalera bidali zituzten.

Gazte zigortuek esker ona adierazi dute beste behin eta hemendik aurrera atxilotze aginduarekin euren etxeetara sar daitezkeela jakitun, AskeGunea 24 orduko planteamentu batera pasatzea erabaki dute. Zigortuetako sei ez direla hemendik aurrera bananduko adierazi dute, ez direla bakoitza bere etxera joango. Hortaz, herritarrei lo ere egitera joateko deia luzatu dute, beraz lotarako zakuarekin joateko gonbidapena luzatu diete. Sirena hotsa ere prestatu dute ertzaintza joaten denean jartzeko.

Bideo arrakastatsua sarean.

Gaur aste bat beteko du Aske Guneak eta egun hauen laburpen bideo bat jarri zuten atzo sarean. Auzolanean zazpi hizkuntzatan azpititulatu dute erabiltzaileek: euskaraz, ingelesez, gaztelaniaz, frantsesez, katalanez, italianoz eta portugesez. Hemen ikus daiteke:

Gazte zigortu batzuk inguruan babesa adieraztera joandako herritarrekin.

Inkognita handia da Madrilek Donostiako gazte zigortuen gaia zenbat luzatuko duen. Honek, normala denez, ezinegona sortzen du Donostiako Boulevardean. Dena den, injustiziako egoera hau osatzen duten elementuek potentzial handia dute elkarrekin. Oraingoz auziperatuen defentsan antolatu direnek indarra transmititu dute hainbat zirkulotan. Aske Gunearen ideia eta zigortuak babesteko hartutako neurriek, etxeetaino ehunka pertsona bila eta bueltan joatea bereziki, herri harresia eraikitzeko lehen harri indartsuak dira. Aurrera pauso bat emateko ordea, babes zabalagoa lortzea ezinbesteko izango du mugimendu honek, eta horretarako aldarrikapenak, mezuak eta ekintzak ongi kudeatu beharko ditu.

Baliteke Madrildik gaia azkar itxi eta mugimendu hau errotik moztea. Hori horrela gertatzen bada, sortzen ari den mugimendua trinkotzea lortu gabe desegin liteke.

Estatuak gaia luzatzea da beste aukera. Fruiturik jasotzen ari ez dela ikusten duen jendea eguneroko konpromisoak mantentzeaz  nekatzea bilatuz. Oarsoaldeko gazteekin antzeko zerbait gertatu zen, eta bi hilabete ezkutuan egin ostean, azkenean atxiloketak probokatu zituzten beren buruak Maria Cristina Hotelari kateatuta. Ausartuko nintzateke esatera hau dela Aske Gunean biltzen ari den jendeari beldurrik handiena ematen dion egoera: gauza luzatzea. Irakurketa bat da hori, buelta baduena. Mugimendua indartzeko lan egitea egunez egun, denbora bera aldeko faktore bilakatzea.

Aske Gunea-ren inguruan herritarrak antolatzen ari dira, eta lan ongi eginez gero, orain arte problematika horretara hurbildu ez den jendea erakartzea lortzeko aukeran da. Euskal gazteria azken urteetan jasaten ari den atxiloketa prozesu etengabe hau geratzeko modu bakarra Estatuari faktura ordainaraztea dela analista ugarik diote. Horretarako egoerak asko aldatu behar du gaur gaurkoz. Aldarrikapena soziologikoki ezker abertzale zabal horretan biltzen den herritar multzotik ateratzea ezinbestekoa du, bestela argi ikus daiteke Estatuari atxiloketak egitea erraz sueratzen zaiola. Asumi ditzake “betiko leloa” duten manifestazio, prosteta eta Euskal Herriko herri eta hirietan pankartak. Segiko kide izateagatik sei urte kartzelara joango diren zortzi gazteren gaiak ordea, batzuk torturatuak eta froga faltsuekin muntatuak, badu nahikoa osagai kanpoan ere atxikimenduak lortzeko komunikatzen asmatuz gero. Mario Zubiagak independentziari buruzko azken Larrunean zioen moduan, “irainaren erabilera egokiagoa egin behar dugu (…) Euskal Herria Espainiarekiko iraindua irudikatzea lortu behar da”. Ikusi beharko da baita ere, gazte hauek Segikoak izate horrek zenbateraino oztopatzen duen jende berria hurbiltzea, batez ere iraganean erakunde honekiko kritiko izan direnak.

Hori lortzeko baina, lehen egunetan ikusi dugunari buruz gogoeta orokor bat beharrezkoa da. Komunikazioa plan egituratu bat. Garrantzia dute erabiltzen diren irudi, hitz eta argumentuek. Egia gordina da, Donostiako herritarren gehiengo haundi batek ez dakiela Boulevardean gertatzen ari den ezer ere. Horri erantzun bat ematen asmatu behar dute atxiloketak zaildu nahi dituztenek. Irudimen kolektiboa eta estrategia positiboa behar dira besteak beste mugimendu askori begiratuta ikusten denez. Orain arteko inertzietatik aterako diren ekintzak eta diskurtsoa landu beharko ditu Aske Guneak egunerokotik bista altxatu eta epe ertaineko zerbait planteatzen badu.

Azken bi urteotako adibideei begiratuz gero, gertaera zehatzak baliatu zituzten hainbat herrialdetako masak antolatu nahi zituztenek. Gazte hauek –eta beste asko– beren ideia politikoengatik eta egungo egoeran atxilotu nahi izatea bere burua lozorro kolektibotik atera nahi duen herritar multzo anitz horren akuilu izan liteke, baldin eta masa horrek halako zerbaiten beharra ikusten badu.

Eta hor sartzen da denboraren kontua. Zenbat eta denbora gehiago izan, lana ongi eginez gero, geroz eta jende gehiagorengana hel daiteke zabaldu nahi den mezua. Auzoz auzo, herriz herri, mezu humanoa herritarrei eskura helaraziz. Pankarta eta pintaketez harago plantemantu serio bat nola egin pentsatu beharko du Aske Gunean biltzen den jendeak. Gaiari zenbaterainoko tono politikoa eman behar zaio? Gazte zigortuen figura humanoa indartu behar al du?

Denbora behar du Donostiako auziperatuen ingurutik abiatutako talde honek ohiko zirkuloetatik kanpo babesa lortzeko, indar guztiak horretan jartzeko, behe-behetik hasita. Donostia mailako elkarteetatik, auzoetan eskura informazioa ematetik, nazioarteko harremanak baliatzeraino. Zortzi donostiar hauek plantoa egin diote espainiar justiziari, jende askok zilegitasuna ematen dion jarrerarekin. Poliziari hauek atxilotzea kostatzen bazaio eta atxilotzean ohikoa baino jende gehiago haserretzen bada, ziur Madrilen deserosotasunen bat edo beste sortuko duela.

Boulevardean ereindako Aske Guneari herri harresiaren ideian aurrera egitea tokatzen zaio, ahalik eta sendoen gainera.