Gaur eman du albistea Xabier Mendiguren Elizegi Elkar argitaletxeko editoreak Twitterren: orain arte Alberdaniako editorea izan den Inazio Mujika Iraola Ereinentzat lanean ari da. Nontzeberrin irakur daitekeenez, Fermin Etxegoienen azken liburua aurkeztu du.
Azken hilabeteetan han-hemenka ibili da Alberdania ez zegoela egoera onean. Gainera, 1993an Mujikarekin batera editoriala sortu zuen Jorge Giménez urtarrilean Eusko Jaurlaritzan hasi zen lanean Hizkuntza Politikako Ikerketa eta Koordinazio zuzendari.
Juan Luis Zabala Berriako kazetariak hitz egin du Mujikarekin eta Alberdania ez dela itxi baieztatu dio, baina editoriala martxan jarri zuten bi kideak bestelako zereginetan ari direla ikusita eta udaberrian libururik argitaratu ez dutela kontuan izanda, etorkizuna ez dago batere argi.
5 Iruzkin
Albistea irakurrita pena bikoitza hartu dut. Batetik, albistea bera tristea delako. Ahots propioa duen argitaletxe bat egoera horretan ikustea ez da atsegina. Bestetik, konpetentziako editore batek horren berri ematea ez zait dotorea iruditzen, ezta etikoa ere ia. Akaso dotorezia falta puntual bat da, baina susmoa dut gure literaturaren isla ere badela, gurean dagoen hutsalkeria eta txutxumutxukeriarena.
Besarkada bero bat Inazio eta Jorgeri. Eta animo.
Aupa Aritz, mila esker zure iruzkinarengatik:
Tira, tokatzen zaidan partearengatik: blogean pieza hau idatzi badut, izan da irakurle naizen aldetik jakin-mina neukalako eta pentsatu dudalako beste hainbat irakurleri ere interesatuko zitzaiela.
Ez da gai erosoa hizketarako, baina Alberdaniak azkenaldian ezer argitaratu ez duela ikusita, gertatzen ari denaz inon informazio zehatzen bat aurkitu nahian nenbilen. Alde horretatik, Inazio Mujikak Ereinekin liburu bat aurkeztea ez zait txutxumutxua iruditzen, informazioa baizik.
Espero dut gauzak berriz bide onera etorriko direla eta Alberdania martxa normalean hasiko dela, baina, bitartean, gertatzen ari denari buruzko informazioa eskaintzea ere badagokigu kazetarioi.
Kaixo, Gorka.
Mila esker zuri erantzuteagatik. Kazetari zaren aldetik, normala iruditzen zait albistearen usainean ibiltzea, eta, dudarik gabe, irakurlearengan arreta piz dezakeen berria da. Hain garbi ikusten ez dudana zera da, beste argitaletxeko editore batek albistea twitterren zabaltzea. Alberdaniakoek jakingo dute zergatik ez duten lehenago albistea zabaldu. Niri, behintzat, ez zait oso jokabide zintzoa iruditzen konpetentziak albistea zabaltzea. Agian, leialtasunaren eta etikaren mugak lausotzen ari zaizkigu. Edo neu naiz zurrunegia. Edonola ere, ez zait serioa iruditzen.
Aupa Aritz,
Bai, ulertzen dut diozuna; nik bakarrik esplikatu nahi nuen zergatik argitaratu dudan hau blogean, zalantzarik gera ez zedin interes informatiboagatik egin dudala.
Ondo segi!
Aritz, tamalez, pertsona batzuk oso sizinianoak dira.