Bi emakume, elkarrekin hizketan, ez gizonei buruz: uste baino zailagoa fikzioan

Gorka Bereziartua
0

Alison Bechdel komikigilea.

Merezi du gaiak leku bat, martxoaren 8an tankerakoak mainstream bihurtu eta martxoaren 9an berriz ere mapatik erabat desagertu baino lehen: ezagutzen duzue Bechdel Testa?

Diagonaleko artikulu bati esker izan nuen haren berri. Fikziozko lanetan genero desbideratzeak neurtzeko balio duen hiru puntuko galdetegi sinple-sinplea da.

1) Istorioan agertzen al dira bi emakume gutxienez? (Rol esanguratsuren bat dutenak, izena eta abar).
2) Hitz egiten al dute emakumeek elkarrekin?
3) Solasaldian, gizon bat ez den zerbaiti buruz ari al dira?

Testa pasatzeko hiru galderen erantzunak “bai” izan behar du. Erraza beharko luke, ezta? Ba, azkeneko Oscar sarietan film onenaren saria irabaz zezaketen gehienek ez zuten pasa.

Komiki honetan argitaratu zuen Alison Bechdelek bere araua lehenbiziko aldiz (egin klik irudian handiago ikusteko).

Testaren sortzaileak, Alison Bechdel komikigileak –hitz egin genuen berak idatzitako Fun Homeri buruz–, honela azaldu zuen zerk eraman zuen galdetegia sortzera:

“Arraroa zen pentsatzea fikzioan agertu diren emakume handi horiek denak, Jane Austen arte, beste sexuaren bidez ikusiak izan zirela; ez hori bakarrik, beste sexuarenganako harremanean bakarrik ikusi zituzten. Eta hori emakume baten bizitzako oso zati txikia da”.

Testak baditu gabeziak noski: galbahea pasatzen duten lanek ez dute zertan ez-sexista izan, oso oinarrizko galdetegia baita. Eta posible da lan batzuek testa ez pasatzea, istorioaren ezaugarriengatik –Charles Strossek seinalatu zuen Umberto Ecoren Arrosaren izenak erdi aroko monasterio batean kokaturik dagoelako ez duela gainditzen; dena den, beheko eguneraketan agertzen den bigarren artikulua leituta, horrelako baieztapenak problematikoak dira–.
Edonola, tresna baliagarria da gure imaginario kolektiboa eraikitzen duten produktu kulturalak genero ikuspegitik aztertzeko. Zineman, komikietan eta bideo-jokoetan aplikatzen dituzten webguneak badaude. Animatuko al da norbait euskal literaturarekin?
Eguneraketa (2013-III-7, 16:23):
Gai honekin lotutako pare bat artikuluren berri eman dit Leire Lopez Ziluagak. Señoras que hablan de música blogekoa bata (“Bi emakumek Bin Ladeni buruzko iritziak elkartrukatzen badituzte, gizonei buruz ala politikaz ari dira?”) eta egile berak Su Ombligo blogean argitaratutako beste hau: “Zertaz hitz egiten duten emakumeek zineman: Bechdel testa”.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

ARGIAko Blogarien Komunitatea - CC-BY-SA