Etxekoak kanporatzen
Gure artean daude. Geroz eta gehiago dira. Kezkatzen hasia naiz ez ote gaituzten jango. Azkenaldian nonahi, kalean, tabernan, erosketak egiten aurkitzen ditut eta, zer nahi duzue esatea, ez naiz ohitzen, deseroso sentitzen naiz inguruan ditudanean, mehatxua dira gure gizartearentzat. Berdin zait euskaraz ari baldin badira ere, nahiago nituzke nigandik urrun. Ozen hizketan, eskua luzatu eta besoa hartu, mundu guztia beraien legera bizi behar dela pentsatzen.
Euskotar pedigria duten arrazistez ari naiz.
Ana Urkizak Deian zutabe bat idatzi du eta ulertarazi dit zergatik daukaten izen hori horrelako pieza periodistikoek, zementuzko zutoin baten kontra muturrez jota ez bainuen min handiagoa hartuko.
Esaldi batzuek XIX. mendean idatziak dirudite (“Kirol medikuek dakite ondo azaltzen haien hanketako zuntzak eta baita hezurdura ere, europarrenekin konparatuta, nola diren ezberdinak. Lohi artean ibiltzeko aproposagoak, diotenez”). Artikulu osoak beldurra izerditzen du, afrikarra mehatxuarekin identifikatuz. Eta zalantza daukat bukaeran egiten den entrenamendurako deia ez ote dagoen Sturmabteilung estiloko zerbaiten premia aldarrikatzetik urrats bakarrera.
Kanpokoak etxeratu? Eta etxeko batzuk kanporatzen baditugu?
Izan ARGIAko bazkide: astekariko harpidedun edo argia.comen laguntzaile
3 Iruzkin
Trackbacks/Pingbacks
- The war against cliché | zuzeu.com - [...] To, hainbertze urtez neure burua ispiluan ikusten, eta haren artikulua irakurri arte ez naiz ohartu.Arrazista izatea leporatu diote Urkizari. ...
Niri ere Urkizaren artikulua ez zait batere gustatu (batez ere, elkarren antzik ez duten bi gai koktel berean nahasten dituelako), baina mundu osoko gizataldeen artean diferentzia fisiko nabarmenak badaudela esateak ez du zertan “XIX. mendeko” kutsua eduki beharrik. Afrikar jatorriko beltzek kaukasikoek baino masa muskular handiagoa omen dute, eta ekialdeko asiarrek txikiagoa europako zuriek baino. Antza denez, ezaugarri fisiko horiek badute nolabaiteko eragina kirol profesionalaren munduan.
Bestalde, merezi du ikustea Lasarteko krossaren historia osoan izan diren irabazleen zerrenda: asko, beharbada gehienak, atzerritarrak, eta ez denak afrikatik etorritakoak.
Liz, eta mendialdeko etiope baten, itsasoko eritreo baten, pigmeo baten, Cameruneko oihaneko baten eta bosquimano baten artean nork du masa muskular handiagoa? eta poloniar baten, kazajo baten eta euskaldun baten artean? zertaz ari gara?
Sentitzen dut Urtzi, baina arrazoi du Urkizak. Darwin aspaldi ohartu zen. Bere prestutasun fisiko partikularretik gure paradisuan integatzeko aukera ematen dio Naturak arraza bakoitzari. Galdetu bestela Günther Wallraft.i Fisiologikoki egokiago dira turkiarrak Alemanian tanke toxikoak garbitzeko lan-segurtasun eta osasunerako inolako babes neurririk gabe. Maghrebtar nerabeek kamioipeetan lapazorri gisa itsatsita eusteko dohaia, Algecirastik honaino…! hori bai integrazioa. Errumaniar eta portugaldar igeltseroak San Mames Barrian egunean 14 orduz lan egin dezakete, opor edo jaiegunetan atseden hartu beharrik gabe gainera, halajaina!. Olinpiada horretan gureak egin du. Aspaldi utzi genion halako proba fisiko “primario”tan trebatzeari. Larru beltzekoek gainezka egingo digute: zula dezagun etxepean bunkerra, erosi hamabost urterainoko jaki desidratatuen pack.a eta arma gaitezen hezurretaraino. Apalduko ditugu bai azkenean, halafede! Guk emango diegu bai… integrazioa.