Koldo Tellitu Ikastolen Konfederazioko lehendakaria eta Berdaitz Goia Komunikazio Biziagoa enpresako kudeatzailea, hitzarmena sinatu duten unean.

Herri Urrats, Ibilaldia, Araba Euskaraz, Kilometroak eta Nafarroa Oinez festak bultzatzeko erabiltzen diren hedapen euskarrietan publizitatea trukatzeko konpromisoa hartu dute Euskal Herriko Ikastolak Europar Kooperatibak eta Komunikazio Biziagoak, ARGIA plazaratzen duen enpresak.

ARGIA aldizkariak, harpidedunen artean jai horien triptikoak banatzeaz gain, hitzordu  horiek abiapuntutzat dituzten erreportajeak plazaratuko ditu. Lehenbizikoa pasa den astean argitaratu zuen: Bernat Etxepare Lizeoko barnetegia. Euskaraz ikasi nahi dutenen bizilekua.

2013ko Ikastolen aldeko jaiak:

Herri Urrats: Maiatzaren 12an Senpereko lakuan, Seaskak eta Iparraldeko ikastolek antolatuta.

Ibilaldia: Maiatzaren 26an Portugaleten, BIEk eta Asti Leku ikastolak antolatuta.

Araba Euskaraz: Ekainaren 16an Amurrion, AIF-ek eta Aresketa ikastolak antolatuta.

Kilometroak: Urriaren 6an Tolosan, GIEk eta Laskorain ikastolak antolatuta.

Nafarroa Oinez: Urriaren 20an Tuteran, NIEk eta Argia ikastolak antolatuta.

Euskal Herriko Laborarien Batasuna (ELB) sindikatuaren ahotsa izateaz gain Iparraldeko nekazaritzaren albiste iturri baliosa den Laborari astekariak eta ARGIAk elkarlanari ekin diote.

Laborari

Hemendik aurrera ARGIAren webguneak azalduko ditu paperezko Laborariren euskarazko eduki nagusiak. Ziur gaude denok aterako garela irabazle elkarlan honetan, eta gehiena Euskal Herri osoko irakurleak, nekazaritza eta elikadura burujabetzaren inguruko aktualitate eta iritziak gertutik segitu nahi dituztenak.

Artikuluek Laborari sinadura eramango dute, eta bertan klik eginez gero, argitaratu ditugun bertako artikulu guztiak kontsultatu ahal izango dira.

Azpiegitura handiei buruzko eztabaida, Kontrak antolatua.

Multimedia kanalean Solasaldien kanala ireki dugula jakinarazi nahi dugu. Bertan hitzaldi, mahai-inguru eta eztabaidak topatuko ditu erabiltzaileak. Gai zehatzen inguruan euskaraz egindako gogoetarako materiala bilduko dugu kanal berri honetan.

Elkarlan berri baten albistea ere eman nahi dugu. Kontra eztabaida programarekin adostasunean, hauek euskaraz egiten dituzten debateak bertan biltzen joango gara, beste material askoren artean.

Kontra orain urtebete sortu zen eurek azaltzen dutenez ”egungo komunikabideetan eta hezkuntzan dagoen hutsune bat betetzeko beharrari erantzuna emateko”. Euskal gizartearen intereseko diren gaiekin eztabaidak antolatzen dituze eta Internet bidez emititu. Zai Zoi Bele ekoiztetxe independenteak ekoizten du eta hilero aktualitatearekin lotura duten gaiak jorratzen dituzte. Azken urteotan publikoki eztabaidatu ez duten alderdien ordezkariak aurrez aurre jartzea lortu dutelako nabarmendu da, besteak beste. Nerea Alias aritzen da moderatzaile lanetan.

Solasaldien kanalera pasa dugun material asko orain arte “Ekitaldiak” atalean biltzen joan gara, baina bertan hitzaldi eta halakoez gain, musika kontzertuak, poesia errezitaldiak, eta bestelako ekitaldiak ere bazeuden. Horregatik, erabiltzaileak kanal batera edo bestera jotzeko helburuak ezberdinak izan daitezkeela ulertuta, bereizketa egitea erabaki dugu, materiala topatzea erraztu asmoz.

Kanal berriko hitzaldi gehienak Koldo Mitxelena Kulturuneak antolatzen dituenak dira, baita TED.com-ek mundu mailako hizlariekin antolatzen dituenak ere, sarean erabiltzaileek itzulitakoak. Sarean topatzen ditugun hitzaldi, mahai-inguru eta eztabaidak ere bertan biltzen joango gara, lekua dutela iruditzen bazaigu.

Kanalean topatuko dituzuen solasaldi batzuk:

Azpiegitura handiak (Eztabaida)

Nafarroa post UPN. Noiz, nola, norekin? (Mahai-ingurua)

Bikoizketa vs. Azpitituluak (Eztabaida)

Emakumea eta kartzela (Mahai-ingurua)

Indarkeria sexistari buruzko foro herritarra (Mahai-ingurua)

Erlijioa, Jainkoa eta Fedea Euskal Herrian (Eztabaida)

Euskararen jatorria, zalantza artean igerian (Hitzaldia)

Ipar Euskal Herria. Zer, nola, noiz. (Eztabaida)

Euskararen kontrako diskurtsoa neutralizatzeaz (Hitzaldia)

Norvegiako Atzerri ministroa “Elkarrizketaren defentsan” (Hitzaldia)

Mundua aldatu duten argazkiak (Hitzaldia)

Jean Haritschelhar izan da Deabruaren Abokatua saileko azken elkarrizketako protagonista.

Ohartuko zineten, ARGIAren 2013ko lehen aleak esku artean erabiltzen hasi ahala, azken urteetan aldizkariari hasiera eman izan dion Deabruaren Abokatua saila desagertu dela.

2007ko apirilaren 29an argitaratu genuen lehen aldiz –Markos Zapiaini egin genion elkarrizketa orduan (pdf)–, eta joan den abenduaren 30era bitartean 262 elkarrizketa eman ditugu bertan. Behin baino ez zuen huts egin atalak, 2011ko urriaren 30ean, ETAk jarduera armatua betiko uzteko erabaki historikoak aldizkarian “leku” egitera behartu zuenean. Oraingoan, baina, haren hutsa ez dagokio momentuko beharrari: behin-betikoa da.

Elkarrizketa labur, bizi eta zirikatzaileak egiteko sortu genuen Deabruaren Abokatua; zuek epaituko duzue, noraino lortu dugun hala izatea. Bidea egiten hasi bezain laster konturatu ginen oso perfil zehatzeko pertsonaiak eskatzen zituela era horretako elkarrizketak. Ez zen nahikoa esateko gauza interesgarriak edukitzea; Abokatuaren doinuarekin bat etortzen ere jakin behar zen. Ahal zen heinean pertsonaia ezaguna izatea ere nahi genuen, lehen kolpean, argazkia ikuste edo izena irakurtze hutsez, irakurlea erakarriko zuena. Erronka polita, zaila ere bai batzuetan. Zorionez, oso kolaboratzaile finen esku egon da lan hori bost urte eta erdi pasa hauetan: Sustrai Colinak hasieratik bukaeraraino egin du Deabruaren Abokatuaren ibilbidea, eta bidaide izan ditu Fermin Etxegoien lehenik eta Aritz Galarraga ondoren. Eskerrik beroenak hirurei.

Euskal Herria txikia da, eta “deabrugaiak” agortuz zihoazkigula iruditu zitzaigun halako batean. Horregatik sailari amaiera duina ematea erabaki genuen, geure buruei aukera eman gabe nola-halako betelanean hasteko. Rockero ospetsuak bezala, Deabruaren Abokatua heriotzan eder ager zedin nahi genuen. Pena pixka bat ematen du ia sei urtez lagun izandakoari adio esateak, baina erabakiaz damutuko ez garelakoan gaude. Eta agian, uste baino lehenago, bueltatuko dira elkarrizketa laburrak ARGIAra, abokatu batek eginak ez badira ere.

TtanTtakun Donostiako irrati euskaldun librea da, 107.2an entzun daiteke edo beren webgunean.

Joan den ostegunean Donostiako Ttan Ttakun irratiko Taosa saioan ARGIAko webgune berriari buruzko saioa egin zuten. Lander Arbelaitz webguneko erredaktore-burua gonbidatu gisa hartuta, ia ordubeteko saio atseginean, azken aldaketa honetan hartutako erabakiak xehetu zituzten. Gorka eta Unai esatariek webguneari buruz esateko dutena ere entzun ahal izan genuen.

Hemen entzun dezakezue saio osoa, eta webgunearen nondik norakoetan sakondu nahi duenak, saio hau aukera ona du egindako lanaren atzean dagoen arrazonamentua ulertzeko.

Iturria: Ttan Ttakun irratia.

Hau da gaurtik aurrera Argiak izango duen itxura berria.

Zeri erantzun behar dio nagusiki azal berriak? Galdera egin eta erantzun bila abiatu ginen duela urtebete, Interneteko azal berria behar genuela pentsatzen hasi ginenean. Eta erantzuna zera izan zen: “Argian egiten dugun guztia gaur egun baino hobeto bildu behar du. Era ikusgarriagoan, erabilgarriagoan eta gure Interneteko kazetaritza moldean sakonduz”. Gaur aurkezten dugun atariarekin abiatzen gara helburu horien bila.

Ikusgarriago badago, erabilgarriago ere bai eta orain frogatzea dagokigu Interneteko euskarrian gure kazetaritza egiteko tresna ere badela, hori, ibiliaren ibiliz egiten baita. Funtsean, ARGIA astekarirako, Interneterako, Larrunerako eta Urtekarirako ekoizten dugun informazio kopuru handi horri bistaratze egokiagoa eman nahi genion gure azalean. Eta, bidenabar, tresna eraginkorragoa eskuratu eguneroko eta uneoroko produkzioan sakontzeko. Azenarioa jarri dugu begien aurrean eta orain erredakzio osoak urrats bat gehiago eman beharko du berau osatzeko. Horra gura jardueraren hirukia: sortu (gurea), sailkatu (besteena), eskaini (gurea eta besteena).

Baina gure produkzioaz gain, bestelako edukiak ere jartzen ari gara sarean, nagusiki ikus-entzunezkoak. 2006an ekin genion ikus-entzunezkoen ekoizpenari, baina berehala ikusi genuen biltegi lana ere egin genezakeela, bai erreferentzia guneak finkatzeko, bai    erabiltzaileari kalitatezko edukiak eskaintzeko. Film laburrak biltzeari ekin genion, gero dokumentalak eta ondoren ekitaldiak, batez ere hitzaldiak. Orain, webgune berriak herri ekimenean sortutako lanak ere bilduko ditu, izan flash mob, lip dub edo dena delakoa.

Blogetan ere sakondu dugu, bai gure kazetari eta kolaboratzaileen blogei garapen bat emanez, bai blogari gehiago erakarriz. Neurri batean, sare sozialek itzali egin dute garai bateko blogen indarra. Twitterreko jarioak edukiak informazioaren zabortegi erraldoi horretara bideratzen ditu, eta blogak jarraitzen du izaten blogari bakoitzaren eduki biltegi ederra, eta edonoren eskura dagoena. Bloga da sarean kazetaritza edukiak –edo bestelakoak– biltzeko tresna sendo, aske eta malguenetakoa. Gaur egun, munduko kazetaritza sendo eta konprometituenetakoa blogetan egiten da.

Eta utzi ditugu jorratu gabeko atalak ere. Halako berrikuntza bati ekiterakoan nekez borobildu daiteke dena kolpean, hobe garapen leiho bat irekita uztea.  Guk, adibidez, sare sozialekiko interakzioaren hobetzea hurrengo urrats baterako utzi dugu. Berdin erabiltzailearen parte hartzearena. Irakurle edo ikus-entzuleak parte hartu ahal izango du bere iruzkin eta proposamenekin gure edukietan, baina ez nahiko genukeen aukera guztiekin. Sareak izugarri zabaldu ditu edozein herritarrek kazetaritza jorratzeko aukerak, baina gaur gaurkoz, ez dugu sinesten erabateko horizontalitatean. Aurrerago, alabaina, izango dugu gai honetan sakontzeko aukera. Baditugu parte hartzeari buruzko ideiak, eta datozen hilabeteetan joango gara indarrean jartzen apurka.

Eta sosak? Esaten da Internet merkea dela, eta bai, ohiko jardueran bada, esaterako, papera baino merkeagoa. Baina berrikuntzak informatikarien, programatzaileen esku dira neurri handi batean eta hauen esku lana garestia da. Garestia den moduan halako berrikuntza bat nolakoa behar duen izan erabaki eta zaintzen duten profesionalen jarduera. Internet merkea izan daiteke, ezin ukatu, baina Interneten berritzaile izan eta berau norberaren jarduerara egokitzea, garestia izaten jarraitzen du.

On egin eta bota zure iritzia.