Badakit, I know, abertzaleak ez direla azkar Frantziako bozketan –bereziki, ezen bere garaian Polpot odoltsua hagitz miretsi zutelako– sozialistak pasarazteko eta beti nahiagoko dutela eskuineko hautagai bat ezarri herriak kudeatzeko giderren jabe. Borroka ala departamendua sustengatzen duten ber eskuin-muturrekoak berdin onartuko lituzketela (gaizki) pentsatzera makurtzen naiz, 1940ko hamarkadan, antzeko aitzakiengatik, euskaltzale andanak Vichy nazizalearen lerroetan sartu zirenean bezala.

Badakit, I know, sozialistak ez direla perfektoak, ezker muturrekoak zein ekologistak aurka dituztelako, abertzale sutsuez gain. Hargatik Baionako hauteskundeetan, abertzaleak behintzat, egiazki dioten bezain ezkerrekoak izan balira Etxetoren alde bilduko ziren eskuineko Jean René Etxegarai jaunari –estimagarria eta planttakoa alaina– bidea mozteko. Hogeita sei boz eskas izan zituen Etxetok eta biharamunean, kafearen tenorean, baionar askok hiri politikaz, irudiz eta giroz aldatzeko aukera handia galdu zela murdukatzen zuen.

Badakit, I know, besterik ere kontatzen dela bazterretan.