"Disko honekin borobiltasuna nahi genuen, geruza ezberdinak, gozotasuna"

Hotzikara aldaketa uneetan ematen da, on eta txarretan. Txar batzuk ezagutu ditut, baina zer aldaketa on nahiko zenukete?

Normalean esperientzia txarrekin lotzen dugu. Baina gozamenarekin ere lotu daiteke. Adibidez, kanta eder batek ere sor lezake. Eta gu gustura, kontzertura gerturatutako lau katuei gozamenezko hotzikara eragitea lortzen badugu.

Anestesiaren eta batez ere Ibonen ahotsaren eragina antzematen da. Zarauzko taldeak askori zabaldu dizkigu ateak?

Bai, Anestesiaren dosi handiak sartutakoak gara. Gainera, ahots guturalak Euskal Herrira zabaltzen asko lagundu duen taldea da, jendearen belarria egina dago. Hala ere, oraindik “musika oso ona, baina ahotsa…” bezalako komentarioak entzuten ditugu!

Zeren bila jo zenuten Fideleneara?

Musika estilo hauetan Mikel Kazalisek besteko esperientzia gutxik izango dute Euskal Herrian. Ez genekien gure kantek nolako indarra eduki zezaketen diskoan, eta harrituta gelditu ginen. Aupa Mikel!

S.O.S kanta existentziala da. Aje egun txar baten idatzia da?

Ez dakigu biharamuna geneukan edo lo hartu ezineko gaua zen, baina betiko zalantzak eta ezinegonak dira. Asko kosta zitzaigun letrari norabide bat ematea, oso gai zabala baita. Baita musika egokia bilatzea ere, baina gustura geratu gara.

Sepulturaren posterrak paretara itsatsita daude oraindik Usurbilgo lokalean? Badirudi 1990eko hamarkadako taldeak dituzuela gustukoen…

Sepultura bezalako taldeen eragina nabarmena da, haiek bultzatu gintuztelako musika ildo honetara, baina egia da azken urteotan irrati eta telebistatik iristen zaigun musikak ez gaituela guztiz betetzen; eta betiko talde eta estiloetatik irten nahi izanez gero, asko bilatu behar duzula zure kabuz. Hala ere, ez gaude 1990eko hamarkadan estankatuta, badira talde potente ugari ondorengoak ere. Adibidez, Willis Drummond.