Txandan 

Beldurrik gabe

Ez dakigu bere izena, baina ba omen da Amerikako Estatu Batuetan emakume bat beldurra sentitzeko gai ez dena. Izan ere, emozioak kudeatzen dituen burmuinaren zatia kaltetua omen dauka. Urbach-Wiethe gaitza dauka eta oso bakanak dira gaitz hori dutenak. Esaten dutenez, emakumea ez da gai arriskuez jabetzeko, eta hori dela eta edozeinek saihestuko lituzkeen egoerak eta tokiak (animalia arriskutsu bat inguruan, beldurrezko film bat, auzo undergroundak, arma bat berari zuzendua...) ez dira beretzat apartekoak, areago, ikaragarrizko jakinmina sorrarazten diote. Emakumea gai da alai edo triste jartzeko, baina ez ikaratzeko.

Pentsa ezazu zer izango litzatekeen beldurrik gabe bizitzea; besteen aurpegian ikara ezagutu ahal izan gabe; heriotza gero eta gertuago dagoela pentsatu gabe; arriskuei erreparatu gabe. Pentsa zer izango litzatekeen bakardadeari beldurrik ez izatea; onartua izateari; maitatua izateari; bidaiatzeari; jendez inguratuta egoteari. Besarkadak emateko gai izango zinateke? Norbaiti eskutik heltzeko? Bizi ahal izango zinateke beldurrik gabe?

Iruzkina idatzi

		2259   2258
2260 zenbakia. 2011ko urtarrilaren 16a Azkena || Hemeroteka

Ale berean...