Aurrezki kutxen etorkizunaz ari dira hitz egiten. Horretan lagundu du PSOEk eta PPk hitzartu duten Kutxen Legearen erreformak. Beste behin Madrilen hitzartutako legea da, eta Hego Euskal Herrian ere eragingo du, inposatuko zaigu. Erreformak krisi ekonomiko finantzarioa du aitzaki eta kutxen pribatizazioari eta bankarizazioari ateak ireki dizkio. Erreforma baino lehen, Hego Euskal Herriko aurrezki kutxak urratsak ematen hasi ziren, diotenez, krisiari eta lehiakortasunari aurre egiteko. Nafarroako CANek hitzarmenak egin ditu aurrezki kanariarrarekin. BBK-k hainbat saiotan porrot egin du. BBK-Kutxa bateratzeak kale egin zuen, gero Gaztela-Mantxako CCM bereganatzen saiatu zen. Ondoren, Valentziako CAMekin Babeserako Sistema Instituzional bat hitzartzen saiatu ziren. Azkenean, joan den asteburuan, Cajasur bereganatzea lortu du.
Hego Euskal Herriko lau aurrezki kutxak, BBK, CAN, Kutxa eta Vital bakoitza bere aldetik dabil, kontuan hartu gabe Hego Euskal Herriko finantza sistemaren zati natural direla eta erakunde sendoa osa dezaketela. Egitura hori ez osatzeko arrazoi politikoak eta ekonomikoak daude. Horregatik, batzuentzat komenigarria da kutxa horiek Espainiako Estatuko beste erakunde batzuekin bat egin dezaten, bidean Hego Euskal Herrikoen arteko loturak urtu daitezen. Lau aurrezki kutxek batera, finantza gaitasun handia daukate eta kaudimen handia krisitik ateratzen laguntzeko. Batuko balira, gure finantza sistema eraikitzeko hasiera litzateke eta garapen ekonomiko eta sozialerako balioko luke. Horretarako, borondate politikoa behar da. Horren arduradun eta kudeatzaileek, aldiz, badirudi beste zerbaitetan ari direla jolasean.
1# | Wilson Andoni Etcheverria [Facebook bidez] | 2010-07-27 14:23:25
Euskal aurrezki kutxak batzea ondo dago, baina beste aurreki kutxak erosi eta Espainian indartsu izatea garrantzitsua da ere. Ez gara isolatuta bizi; Caja Madrid edo La Caixak gure aurrezkiengatik borrokatzen diren bezala, bertako aurrezki kutxak ere espainiarren aurrezkiak lortzeko erakargarriak izan behar dute, eta horretarako, eskeintza lehiakorrak egiteko, handiak izatea nahitaezkoa da.
© 2008-2011 Argia.com - Komunikazio Biziagoa
Termometroa 
