Oiartzunen ginen bertako eskolak antolatu Atharratzeko ikastolaren aldeko bazkarian. Bazkalosteko emanaldi laburrari, zuberotarrek plazan emandakora egin genuen. Musikariak, kantariak eta dantzariak. Konpleto. Agerraldi profesional petoa gure gozamenerako. Biharamunean Tolosaldeko Urkizu gaineko pagadi batean Et Inkarnatus harizko orkestrak kontziertoa eman zuen. Anfiteatroan, pinudiak jan ez duen eremuan garo lehorra azpi tapiz eta malkarra eserleku. Behealdean orkestrako musikariak erdi borobilean, gibelago Iruñeko eta Baigorriko gaiteroak osagarri. Hots orekatua pagoen ostrajea biltzaile. Errepertorioa, pieza ezagunez osatua eta tartean Piazzolaren tango jolastiak, ohiko jazz zaleen asegarri. Bukaerarako, Ana Otxoak bere ahots landuaz eta bereziki bere teknikak ahalbidetzen zion indar espresiboz pagadia antzoki bilakatu zuen. Plazer bat bertaratu ginenentzat. Miel Zeberio zuzendariak joan den hamar urtetan eginiko kontziertoen laguntzaile konplizeak publikoki eskertu zituen. Izen bi baino ez ditut gogoan, Antxon Bandres eta Pako Etxeberria, bestelako merituak medio ezagunak. Bestelako mundu bat posible da.
© 2008-2011 Argia.com - Komunikazio Biziagoa
Hiruko Txikian 
