Alemaniako Fraunhofer Institutuko ikerlariek etxeen segurtasuna handitzeko sistema asmatu dute. Horri esker, ateek eta leihoek beren inguruan gertatzen diren mugimenduenganako sentikortasun handiagoa izango dute.
Leihoetako beira material fluoreszente batekin estaltzen da. Estaldurak nano-partikulak ditu eta horiek erradiazio fluoreszente bihurtzen dute argia. Lanpara ultramore batek beira argiztatzen du, estalduran argi fluoreszentea sortuz, eta leihoen ertzetan kokatuta dauden sentsoreetara ailegatzen da; horrela, inor edo ezer mugitzen bada leihoaren ondoan argi fluoreszente gutxiago ailegatzen da sentsoreetara. Sentsoreek, orduan, gertaera hori interpretatzen dute: txoria izan den, edo pertsona, edo pasatu den automobila...
Interpretazio horren arabera, alarma-seinalea emitituko da ala ez. Orain arteko probak oso onak izan dira, sistemak ederki bereizten baititu automobilek eta txoriek eragiten dituzten argi-aldaketak, esaterako. Gainera, beste abantaila batzuk ere baditu sistemak, hala nola pertsona detektatu bai, baina nor den ez; horrela, ez da bortxatzen intimitate-eskubidea.
Eta hori dena gutxi balitz, sistema merkea da.
© 2008-2011 Argia.com - Komunikazio Biziagoa
Zientzia eta teknologia 
