Ezpalak 

Malenkonia bainuetxean

Zuriuneak. Argazkiak: Nagore Lozano. Musika: Argazki bat behelainoan. Webgunea: www.zuriuneak.tk.

Bainuetxe batean gerta daitezke gauza asko: asteburu lasai bat, amodio urduri bat, hilketa bat... Baina pasaeran ikusten ditugun lekuak dira normalean: joan, egon, alde. Etxera bueltatzen zara, sosak eta estresak hustuta, eta bainuetxea hutsik geratzen da, norbait, beharbada argazkilari bat, noiz hurbilduko.

Hurbildu da Nagore Lozano Zestoako bainuetxera, eta denbora gelditu du begiekin. Lekua bere bakardade biluzian erakusten duten hamabost argazkirekin osatu du Zuriuneak bilduma. Zuri-beltzean egindako argazkiak dira denak, eta objektuak dira protagonista: erlauntzan bezala bizi diren bainuetxeko giltzak, jangela huts bat, XIX. mendekoa izatearen itxura duen mahai bat, ate itxiak, kafe kikara bat, pianoa...

Horiei testuingurua ematen diete plano orokorragoek, artikulu hau ilustratzen duen argazkiak, adibidez. Zuria eta beltzarekin kontraste harrigarriak egin ditu Lozanok, erdibidekorik gabe, argazkilari piktorialistek egiten zituzten lanak gogora ekarriz.

Irudiei laguntzeko berriz, www.zuriuneak.tk webgunean Argazki bat behelainoan-en bi kanta entzun daitezke, propio erakusketa digital honetarako sortuak. Nota grabeak nabarmentzen dituen piano batek ematen die oinarria kanta biei, eta horien gainean doinu errepikakor bat sortzen da, argazkiak bestela irakurtzen laguntzen duena. Ez daukazu aitzakiarik, etxetik ikus dezakezu erakusketa: murgildu zaitez malenkoniaren bainuetxean.

Iruzkina idatzi

		2180   2179
2181 zenbakia. 2009ko apirilaren 26a Azkena || Hemeroteka

Ale berean...