"Agertokian gitarrarekin bakarrik abestu behar baduzu, gauzak argi izan behar dituzu"

Bakarlarien ezaugarri bat da zentzu askotan biluzten direla. Zu izenetik hasi zara...

Azken urteetan Uek talde bat bihurtu da eta desberdindu egin nahi nuen, horregatik izenarena. Uek-en geldiunea beharrezkoa zen, zirkuitua txikia da eta jadanik bi urte eta erdi egin ditugu jotzen jarraian: bi diskorekin 70 kontzertu egin ditugu.

Orain arte doinu gogorrei, esperimentazioei eta rockari eman diozu. Xamurtasuna eraginkorragoa da?

20 urtetan rock taldeetan ibili naiz, 11 disko grabatu ditut, mota guztietako kontzertuak egin ditut. Badakit zer den rock talde batean egotea, baina beste gauza asko ere ikusi nahi ditut. Disko honek behar nuen aldaketa eman dit: lasaiago funtzionatzen dut, emanaldiek beste intentsitate bat dute, jendearekin harreman zuzenagoa... Bueltatuko dira soinu gogorragoak, ez dago presarik.

Nabaritzen da abesten gero eta hobeto moldatzen zarela eta gehiago arriskatzen duzula...

Hiru urte dira Uek-ekin abesten hasi nintzenetik eta asko ikasten ari naiz. Baina, gaur egun formatu akustikoarekin nire ahotsa deskubritzen nabil. Agertokian gitarrarekin bakarrik zaudela abestu behar baduzu, gauzak argi izan behar dituzu.

Melodiak gogoratzen kantuan abesti zaharren gaineko bilaketari buruz idatzi duzu. Nolakoa da buruan daukazun melodia berreskuratu eta kanta osatzea?

Gehienetan melodia batek ematen dit hasiera, eta batzutan gitarra zati batek. Mugikorrean grabatzen ditut ideiak, denbora asko pasatzen bada ahaztu egiten zait-eta; bestela, sekula ez da izaten hasierako ideia berdina.

Zure zain aitatasunarekin lotuta dago, ezta?

Bai, Nora alaba jaio baino hilabete batzuk aurretik egin nuen; momentu horretan sentimendu eta sentsazio asko izaten dira; aitatasunarekin zerbait aldatzen da, sentsazio berriak bizitzen dira eta konposatzeko orduan abestietan nabaritzen da.