Narruzko Zezen elkarteak antolatutako Eibarko Antzerki Jardunaldiek 32. edizioa beteko dute aurten. Hilaren 27an hasiko dira, Unzaga plazan eta Toribio Etxeberria kalean egingo den giza-estatuen erakustaldiarekin. Orotara hogei antzezlan eskainiko dituzte Hezkuntza Esparruan eta Coliseo antzokian; horietatik bederatzi aurrenekoz izango dira ikusgai Euskal Herrian. Sei euskal taldek parte hartuko dute jardunaldiotan, eta horietatik lauk eskainiko dituzte euskarazko obrak: Deabru Beltzak konpainiak Nora zoaz txanogorritxu?, Agerre Teatroak Putzuak lehortzen, Porpolek Toda I. Iruñeko erregina eta Kukubiltxok Haritzaren azalera zehatza. Egitaraua Madrilgo Caricato konpainiaren Calígula obrak itxiko du apirilaren 4an.