Asiako hegoaldean oso ohiko bihurtu da zeruan laino marroi edo arreak agertzea, askotan eguzki-izpiak ere ikusten uzten ez dituztenak. Urte batzuk dira hori gertatzen dela eta bertakoek poluzioari egozten diote egoera hori.
Ezaguna da inguruan deforestazio handia dagoela, basoetan suteak eragitearen ondorioz; hiri handiak daudela eta automobilak milioika; etxeetan ere berogailuak poluzioaren iturri izan daitezkeela, eta abar.
Stockholm-eko Unibertsitateko (Suedia) Örjan Gustafsson-ek zuzendutako taldeak poluzio horren jatorria aztertu du karbono-14a erabiliz. Bi lekutan egin dituzte neurketak, Indian eta Maldiva irletan, eta ondorioek harridura sortu dute Asiako inguru horretako agintariengan: poluzio-lainoen %65aren jatorria biologikoa da, hau da, baso eta belar edo egur errekuntzatik datoz, eta %35 baino ez da petrolioarekin zerikusirik duten substantzien errekuntzatik datorrena.
Arazoa bertako bizimoduari eta ohiturei loturik dago eta konponbideak topatu nahi badituzte bizimodua bera hobetu beharko dute, bestela minbizi tasa edo arnas arazoak handitzen joango dira.
© 2008-2011 Argia.com - Komunikazio Biziagoa
Zientzia eta teknologia 
