Akropoli kutsatua Atenasko Akropoliak naturaren eta gizakien mehatxu mordoa jaso du historian zehar, baina azken hamarkadetan orain arteko etsairik gogorrenaren aurka ari da borrokan: kutsadura. Akropoliaren zaharberritze zerbitzuko zuzendari Maria Ioannidou-ren esanetan, kutsadurak egituraren, eskulturen eta pinturen xehetasunak suntsitzen ditu.

Horiek berreskuratzeko teknologia berriak baliatu nahi izan dituzte. 40 prozedura ingururekin proba egin dute, eta azkenean, laser infragorria eta ultramorea batzen dituen metodoa aukeratu dute.

Lehenik eta behin Partenoia zaharberritu dute teknika hori erabiliz, eta orain Kariatideen galeriaren txanda da. Hala ere, metodo horri esker ezin dute kutsaduraren kaltea erabat eten; haren eragina apaltzea baizik ez dute lortzen. Borroka oraindik ez dutela irabazi, alegia.