Tel Basta aztarnategian, Kairotik 80 kilometrora, egiptoar arkeologoek faraoi baten granitozko burua topatu dute. Hasierako azterketen arabera, estatua Ramses II.a faraoiarena izan daiteke. Egiptoko Antzinako Objektuen Kontseilu Goreneko idazkari nagusi Zahi Hawassen arabera, estatuaren gainerako zatiak laster aurki ditzakete. Baina ez hori bakarrik: Tell Bastan burutzen ari diren indusketan Ramses II.ak eraikitako tenplu bikaina aurkituko dutela uste dute.

Izan ere, Tel Basta –antzina Bubastis hiria zena– Niloren deltako azternategi nagusietakoa da. Bastet katu itxurako jainkosaren hiria zen Bubastis, eta Ramses II.aren garaian, XIX. dinastian, loraldia izan zuen. Horregatik uste dute arkeologoek aurkitu berri duten buru itzela icebergaren tontorra baino ez dela.