Txandan 

Hamabosgarrenean

Hamabosgarrenean aidanez... Zuetako inork ba al daki munduko hamabosgarren mendi garaiena zein den? Interneten irakurri dudanez Gyachung Kang du izena, Nepalen dago, noski, eta zortzi metro falta ditu guk hitzetik hortzera erabili eta ezagun izateko. Sistema metriko dezimalaren kapritxoz, hamalau dira (eta ez sei, hamar edo hogei) “munduko mendi garaienak”, “zortzimilakoak”. Pasabanek Manaslu igo duela eta, beste behin, mendizaletasuna produktu bihurtu dugula otu zait. Balentria egin duen lehen gizona, lehen emakumea, lehen euskalduna, lehen... edozer. Lehen. Sherpa edo “porter” andanak inguratutako espedizioez, euren kultura edo bizi baldintzez, ezer gutxi dakigu; ikusi gabe nekez sinetsiko luke euskaldun arruntak. Geure presa, abiada, erronkak, zirku mediatikoa, obsesio txoroa bertara eraman ditugu, globalizazioa lagun, 1950an Herzog Annapurnan paratu zenetik. Tira, bertara eta Pirinioetako “hirumilakoetara” eta, Mont Blancera eta poloetara, eta... Mendizaletasun eta naturzaletasunaren izpiritua hamabosgarrenean dago, aidanez. Edo hogeigarrenean, edo milagarrenean, edo... nik dakita.

Iruzkina idatzi

		2155   2154
2156 zenbakia. 2008ko urriaren 26a Azkena || Hemeroteka

Ale berean...