Argia astekaria webgunearen hasiera

Munlet eta Eureka Hot IV. Sarean bueltaka jakin dugu azken hilabete honetan Euskal Herriko bi talde interesgarrik euren disko berriak doan deskargatzeko moduan jarri dituztela Interneten. Munlet taldeak (argazkian) bere emaitza berria dakar, Clinica de ruidos izenekoa: elektronika, punk eta rock doinuak nahasten dituzten kantak dira eta Creative Commons lizentziapean banatuko da. Joan den urteko Bilbo Hiria Pop Rock lehiaketan bigarren saria eskuratu zuten. Diskoa deskargatzeko http://ttiki.com/245 helbidera jo besterik ez duzu. Eureka Hot IV taldeak berriz, AEBetako musika beltza lantzen du punk rockaz lagundurik. Sei kanta ditu diskoak eta kritikaren txaloak jaso zituen. Deskarga http://ttiki.com/244 helbidean.

Txapa irratiak Bergarako musika taldeen kantekin CD bat argitaratuko du. Herriko gaztetxean taldeek egindako kontzertuak grabatzen arituak ziren horretarako, baina ez zuten denen grabazioak lortzerik izan. Aitzakia hoberik bai jaialdi bat antolatzeko? Joan den asteburuan kontzertu maratoia egin zuten, Txaparrada Musikala. Talde bakoitzari 20 minutuz agertokia utzi eta emaitza grabatu zuten. Orain kanta bana aukeratu beharko dute diskorako. Gainera, banda bakoitzari buruzko informazioa bilduko duen liburuxka ere prestatzen ari dira.