Saguntoko Antzokia duela hogei urte bezala uzteko epaia eman du Espainiako Auzitegi Gorenak. 90eko hamarkadaren hasieran zaharberritze lan sakonak egin zituzten erromatar arrastoetan. Marmolezko harmaila erantsi zioten eta ia eszenatoki osoa berritu zuten. Garai hartan PSOE zegoen agintean, bai Saguntoko Udalean, baita Valentziako Generalitatean ere. Orduko oposizioak berritze obrak legez kanpokoak zirela esan zuen, eta hamazazpi urte iraun duen auzia abiatu zen. Egun PPk agintzen du bietan, baina lehen ez bezala, berritze lanak gordetzearen alde ageri da orain. Epaia betetzean, antzokiak zerbitzu kultural berbera eskainiko al du? Eta lanek oraindik eta kalte handiagoa egingo al diete jatorrizko arrastoei? Liskar politiko hutsa bihurtu den honek ez die galdera horiei garbi erantzuten.