Argia astekaria webgunearen hasiera

Angel Erro

1. Aipu faltsuen bilduma baterako asmatu nituenen artean bada bat, Chestertoni egotzi niona, hain begi-bistakoa eta –mintzen dit aitortzeak– hain erraza, ezen oso litekeena baita Chestertonek berak esan izana. Aipuak halaxe dio: “Mundu guzti-guztia bi multzotan banatzen da: dena bi multzotan banatzen duten manikeoak eta beste guztiok”. Aipuaren jatorria egiaztatzea nolabaiteko erronka gisan hartu dut, azken finean eta poetaren hitzak berrituz, “gezur bat beti gerta zitekeen”, eta behin horretara jarria, badakit ez dudala lasaialdia berreskuratuko, ezta idazle ingelesarekiko konfiantza osoa ere, erantzuna ezagutu arte, azkenean berak holakorik inoiz ahoskatu edo are pentsatu ere ez zuela mingarriki deskubritzen dudan arren. Hala ere, nire ikerketa hori beste behin baterako utziko dut. Gaur, aurrekoarekin lotura zeharkakoa duen kontu batez jardun nahiko nuke: besteez, hau da, ni (edo, gehienez jota, gu) barnean hartzen ez nauen (edo gaituen) giza konstruktoaz.
(Aurrera jarraitzeko, ni bazara, Angel Maria Erro Jimenez alegia, 8. puntura jo ezazu; beste edozein kasutan 5.a irakurri)