Talaian
Inflazioaren eta petrolioaren prezioaren hazkundeak, AEBetako zabor hipoteken krisiak, urtarrilean premiazko produktuek izan ohi dituzten igoerek eta burtsetako azken espekulazio mugimenduek kapitalaren esku dauden komunikabide eta esparru politikoetatik errealitate sozioekonomikoa manipulatzeko balio izan dute. Iritzi publikoari geldiezinezko krisi ekonomiko eta berehalako atzeraldian gaudela sinetsarazi diote. Errealitateak, ordea, ez du espainiar eskuindarrek, PPk eta euren hedabideek, zabaldutako mezu katastrofista elikatzen. Hainbat erakundek aurtengo eta datorren urterako aurreikuspen ekonomikoak egin dituzte eta horien arabera, hazkunde ekonomikoa, pixkanaka murriztuta ere, %3an mantenduko da Espainiar Estatuan zein Euskal Herrian. Horrelako aurreikuspenekin nola onar liteke krisi eta atzeraldi ekonomikoan gaudenik?
Arazoa beste bat da. Arazoa betikoa da. Urteroko hazkunde ekonomikoarekin lortzen diren irabaziak ez dira berdintasunez banatzen eta handienek, banku eta enpresek, orain jasotzen dituzten milioi askotako irabaziak izaten jarraitu nahi dute. Honakoak dira BBVAk eskainitako azken datuak: 2007an 6.126 milioi euro garbi –zergak ordaindu ondoren– irabazi zituen, hau da, 2006an baino %29,4 gehiago. Horretarako beraien mendekoen soldatek igoera handirik ez izatea kontrolatu behar dute, bozeramaileek krisiaren teoria zabalduz. Langile hitzarmenak negoziatzeko garaia heldu den honetan aldarrikapen sozial eta sindikalak geldiaraztea dute helburu.
© 2008-2011 Argia.com - Komunikazio Biziagoa
Bero-beroan 
